Hilassi Ergaano 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Rubeyti Munyee ergaano isooyagta

¹ Ibeenki daawti Beentekos soomarte ka, ꞌdooꞌd Kiriisto tuumman intoo kalday kasoourure.

² Koloo kalday on riiriitoo iꞌdi hafari buure iyeedo goobi Waakh kayimiyye, minki kootte icho goya fiddiyaan tuumman buuhiche.

³ Wohoo iꞌdi ꞌdabi bolkhee argeen. Wahaas la seley goggoweene, yimaateene, eti intaas kijire tuumman koorronteen.

⁴ Icho tuumman Rubeyti Munyee buuhisse, saggi Rubeyti Munyee igargaartuu la afi icho idaagin kaayyeedin sookhabteen.

⁵ ꞌDooꞌdi Yaꞌhuude Waákh karooro ilal tuumman kayimiy la, ilkerengeetti weene Yeerusaleem a kajira.

⁶ Chirri icho hooyaas daageen ka urureen. Jeenteti ebba ꞌdooꞌd Kiriistoki aficho kaayyeedo idaaguu girmeesteen.

⁷ Weyti girmeesteene wihi icho isworsateen, “ꞌDooꞌda tuummane yeyyeedo ꞌdooꞌdi boroofenhi Gaalilaaya menya?

⁸ ꞌDeerka saggoh eteenyo ba saggi icho afi ilassi nah kadelanne ikaayyeedaan idaagna?

⁹ Bal yaafohi inno nahe yeya, yaafti Baaꞌdiya ichoow ti Meediya ichoow ti Eelam ichoow ti ili Messabotaamiya ichoow ti ili Yaꞌhuudiya ichoow ti ili Kabadookiya ichoow ti ili Boontus ichoow ti boroofenhi Aassiya,

¹⁰ ichoow ti Furiijiya ichoow ti Bambiiliya ichoow ti Miissiri ichoow yaafti ili Kureene haggeenye Liibiya layadeeh ichoow martiti ilkerengeetohi Rooma katimiy. Martitaas gaasoo

¹¹ a ꞌdooꞌdi Yaꞌhuud ichoow ki wihi Yaꞌhuud wahti iurgiye. Gaaseenyokoo laka Kireete ichoow ili Araabo kayimiy. Iꞌdaasenyi nah ichohi girmohi Waakh yeele afeenyo ka cheeko a daagna!”

¹² Iche tuumman girmeysatte il fooliis waayte, “Iche waha a mehe?” isworsatte.

¹³ Iꞌdaasenyi enenyet gaasiiskoo a kachaarta, “ꞌDooꞌda farsoti sabiibe buurenye khaatte!” iche essa.

Beetero urur leeyyeeda

¹⁴ ꞌDeerka Beetero ergaanoti addane tomon ichoow koowe khabaayi tolossate riire, wihi us urur iyidah, “Yaafteeyti Yaꞌhuud, ichoow atinhi ilkerengeetti weene Yeerusaleem taalliin tuumman, alleya waha a atin idowdowo. Wihi an eldi mujjum nabah isuda.

¹⁵ ꞌDooꞌda farso mee khaatte, iꞌdi maanta atin ielattaan u, a mehe il toolla a sahaꞌd seyyahti chirdeereet on.

¹⁶ Iꞌdaas menye, waha atin agarteen a wihi goorat eti Waákh íyeyyeedo Yoowel layadeeh cheeke,

¹⁷ “ ‘Ibeenneti ꞌdaꞌddaboot, iche Waakh essa, Rubeyteey weeli enenyet tuumman a kakhuba. Yeeletiin ichoow albehiin wori Waakh a kaayyeedaan. Mejeliinki nunnugul fooltabcho a arga. Mejeliinki araarrinyee issilloyyo issilloota.

¹⁸ Falfayyoheey, wihi mejele ichoow wihi deyyah laka maanassaas Rubeyteey a isookhuba, woreey kaayyeedaan.

¹⁹ Inti saraat ka an girmo yeela, harra ka wahanyeyyohi miigti Waakh tuso yeela, diig a khubta, ꞌdab ichoow uunki buure la harra ka kahaan.

²⁰ Geeddi ibeenki Kamure khummane toro girmee iitaahan, orrah a luurgiyicha mugꞌdi tateehe, yeyyah laka guꞌduutta koo diige yateeh.

²¹ Eti tuummane, magahi Kamur waho la a lariba.’ ”

²² Beetero toro wihi us yidah, “ꞌDooꞌdi Issiraayeloow, bal yeeda nabah isuda! Waakh Yeessohi Naasaret ka wihi weeli enenyet yeelin iubaaꞌdan ichoow girmo ichoow wahanyeyyohi miigti Waakh tuso a atin tuse. Iꞌdaakka Yeesso rumanka antohi Waakh khabo a atin tuse. Atin la wahaas a garattaan.

²³ Waakh saggi goorat us igooche us ꞌhor igartuu, Yeesso dahanohiin a soogesse. Atin la gargaari ꞌdooꞌdi uskeel leh ka usu massalaaba kakaahteene tigaaseen.

²⁴ Iꞌdaasenyi Waakh usu omoot a kasookahche, bolokkhi omooteet kasoofure, a mehe omoote usu jeyin ma tabuuꞌd.

²⁵ Wihi usu miinsane karnati Dawuud layadeeh yidah, “ ‘An kol dakkhan Kamur ortaaya kaarga. Jeenteti us garabeey itoolluu, walah isesseehicho mele.

²⁶ ꞌDeerka an uureey ka weyti hamaada, harrabeey laka weyti Waakh koolicha. Sarteey laka khajjeel a khabta.

²⁷ A mehe meessi ꞌdooꞌdi tuume kijiro goya ma ikatabto, ommos Falfataahti Munyee ma ꞌdiisso ma suusahto.

²⁸ Jiti jiro lakeelo a itusse, chaꞌan ortaah toollo la weyti ikahamaadissa.’

²⁹ “Yaafeey, wihi aacchiheenki karnatenye Dawuud layadeeh miinsan roorro laane atin abcha. Dawuud a yumuyye, lahawwaale. Kaassintiis la ichoow uliba intane inno kaleejirta.

³⁰ Iꞌdaasenyi us eti Waákh íyeyyeedo eheete, ayyinti Waakh usu daato ka igooche ꞌdee eti hiiyyiise komborti antoot gesso a garte.

³¹ Dawuud wihi berri Waakh yeelo iche arge. Saggi Ki Lasubhe omoot liikasookahcho cheeke. Usu iꞌdi ꞌdooꞌdi tuumuu meessi ꞌdooꞌdi tuume kijiro goya ma lakatabine, ommos sartiis ma suusahin.

³² Waakh Yeessoha omoot a kasookahche, nah tuumman la gartaas a laabna.

³³ A laweynaache, Waakh anki dahantiisti miigeet loorrommiche. Waakkhi Aabbahiise Rubeyti Munyeenye us ayyiche kaꞌhele. Waha buurenye toolla atin agarteene toro la daagteen tuumman la, Rubeyti Munyeenye kayamiitiin.

³⁴ A mehe Dawuud goobi Waakh ma ikorine, iꞌdaasenyi wihi us yidah, “ ‘Waakkhi Kamure wihi us Kamureey iyidah, “Dabankeeyki miigeete antoot orrommo,

³⁵ ichoowka chiiytaah tuum dahanohaah a soogesso.” ’

³⁶ “Maantaka ꞌdooꞌdi Issiraayel tuumman, waha a abti giꞌde! Waakh rumanka Yeessoha atin massalaaba kakaahteen, a soobahsate, Kamur ichoow Ki Lasubhe kayeele!”

³⁷ Enenyet uus yeedaas daage, yeed rumanka khaniine, wihi us Beetero ichoow ergaanoti addan worsate, “Yaafeey mehe yeello?”

³⁸ Beetero la wihi us ilaabe, “Etiimba uskeeliis a kasoonokhti, antohi magah Yeesso Kiriisto ka a atin labaattissiyo, ꞌdee Waakh uskeeliin a atin ikakuto. Waakh la ꞌdee siinti Rubeyti Munyee a atin siicho.

³⁹ Ayyintaas atin ichoow nyaakhutiin ichoow enenyeti fogaat ichoow ebbaaw addane Kamuri Waakkheene soowahti iche miinsantahe.”

⁴⁰ Beetero toro enenyet yeedassoo addane ittaawenye iꞌdaase katootooche. Toro hawwaaste wihi us iyidah, “Taba ꞌdooꞌdi weyꞌdane uskeel leh iskariba.”

⁴¹ ꞌDooꞌdi yeediis khaatte labaattissiye. Maalinkaas ꞌdooꞌdi ururicho isookhaye, a geeddi et elif seyyah.

Fiddihi ꞌdooꞌdi Kiriisto rummeeste

⁴² Icho kol tuumman wihi ergaano abisse raaheene toro kulankoo kalday isleekhabeen. Icho ichoow ꞌdooꞌdi Kiriisto rummeeste ba isleegolossateene, toro Waakh isleewahteen.

⁴³ Ergaano girmo ichoow wahanyeyyohi miigti Waakh tuso haaggisse, enenyet tuumman la roorro gesse.

⁴⁴ ꞌDooꞌdi Kiriisto rummeeste tuumman mujjum isleefiddiye, wihi icho khabeen tuumman laka isleegismeen.

⁴⁵ ꞌDooꞌdaas hoolahicho ichoow meehichooda ororicheene, ebba geeddi sinatiis tahe u, chilimme lasiiche.

⁴⁶ Orrahti sookorto tuumman, uranti minki Waakhe buurenye isikayamiitiine Waakh wahtaan. Toro goobassicho ka, uuri haaggan ka isleegolossataane, hamaadaane,

⁴⁷ Waakh koolichaan. ꞌDooꞌd tuumman la icho jilhaate. Maan dakkhan la Kamur ꞌdooꞌdi us ribo a ikasookhaye.