Hilassi Ergaano 16 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Timooti Baawulo ichoow Siila ikhaya

¹ Baawulo ichoow Siila koloo ilkerengeetti Deerbe tabeene, saahka ilkerengeetti Luussira irteen. Etoo abatti Kiriisteenye Timooti layadeehe abartiis Kiriisto rummeysatte la intaas a kajire. Abartiis a inanti Yaꞌhuude, iꞌdaasenyi aabbahiis a yaaftoo Yaꞌhuud ieheynan.

² ꞌDooꞌdi Kiriisto rummeeste ilkerengeetti Luussira kajiro ichoow ki ilkerengeetti Ikooniyo kajiro la weyti haag Timooti cheeke.

³ Baawulo usuhi Timooti khaatti leeirti ꞌdoona, ꞌdeerka khandiye. Waha a jeenteti ꞌdooꞌdi Yaꞌhuude intaas kajiro saggi aabba Timooti yaaftoo Yaꞌhuud ieheynan iyahe toro us ikhandiineynan igarti.

⁴ Geedda icho kolba ilkerengeettoo irtaan la, ayti goorat ergaano ichoow ewweenki urur Kiriisto woyo ilkerengeetti weene Yeerusaleem ka goocheen iche ꞌdooꞌd Kiriisto icheekaane ꞌdee a raaheen.

⁵ ꞌDeerka ururre Kiriisto kakhuufnaanki icho Kiriisto kakhuufaan ka uur lamiigooche toro il baryo ꞌdooꞌdi Kamur kakhuufo kasookhayme.

Fooltabchoti Baawulo ilkerengeetti Tuurowa ka arge

⁶ Jeenteti Rubeyti Munyee ichohi boroofenhi Aassiya Wori Haaggan kacheeko itirattuu, irteene ili Furiijiya ichoow Galaatiya dah kagoocheen.

⁷ Chirri icho baggati ilkerengeetti Miisiya eleeleen ka, boroofenhi Biꞌduuniya gelin leheete iꞌdaasenyi Rubey Yeesso icho tiratte.

⁸ ꞌDeerka ilkerengeetti Miisiya dah kagoocheene ichoowka ilkerengeetti Tuurowa ikhubteen.

⁹ Ibeen ka Baawulo fooltabcho ka etoo ili Makedooniya isootoollo hawwaasti, “Kaale Makedooniya amiite, nah gargaar,” idowo arge.

¹⁰ Inkoo Baawulo fooltabcho arge ka, chirraas on tannabanne, anki Makedooniya miinsanne. Wihi nah goonne Waakh a nah wahe, ꞌdee icho Wori Haaggan icheekna.

Saggi Liidiya Kamur irummeysatte

¹¹ Kooban korre ilkerengeetti Tuurowa kakahne, kurti bicche dahcho kajirto Sammoꞌdaraake eleelle, ibeenki kaas sooraaho ka ilkerengeetti bicche aficho kajirto Neyyaboolis layadeeh gelle.

¹² Intaas ka kahne, ilkerengeetti Fiiliffi gelle. Fiiliffi la a ilkerengeetti oraate ili Makedooniya. Makedooniya la ꞌdooꞌdi ili Roomeenye anta. Ilkerengeettaas geeddoo fiddiine.

¹³ Seeri Lanaso ka aritti ilkerengeeteet kabahne, hawti ꞌdusso iranne. Kol nah intaas ka meessi Yaꞌhuud kaweesti ꞌhello koognahe. Orrommanne, oboorrihi intaas ka urure leeyyeene.

¹⁴ Deyyehoti nah dagansatte goyaka too a makhaabassoo Liidiya layadeehe, ilkerengeetti weene ꞌDiyaaꞌdira katimiyye darfohoo mummuggeyyee ororisso. Iche la Waakhe wahatta, Kamur la uuriche fure, ꞌdee wihi Baawulo essi iyoꞌhatta.

¹⁵ Chirra iche ichoow ꞌdooꞌdi minkiche kajire tuumman labaattissiye ka, goobiche nah iwahte, “Chirri atin ani eti Kamur rummeeste ikhaattaan, kaaleya minkeey fiddiya,” nah itidah. Iche la nah hawwaassatte.

Baawulo ichoow Siila jeenteti icho ginna ibahcheen u lahida

¹⁶ Maantooka, nahi inti lakaweesti isohanni, inantoo bowꞌdeenye ginna dakhatti, ginna la miigti iche wihi sooyateeh kacheekto siisso, nah ꞌhesse. Iche la ꞌdooꞌdi iche ifasso jeenteti iche wihi sooyateeh icheekto on u, a kamurroosse.

¹⁷ Riirtaayi nah ichoow Baawulo nah sooraahte, riirte, “ꞌDooꞌda a falfayyohi Waakkhi weyti ween! Saggi atin liiribo, iche atin icheekaan,” elatte.

¹⁸ Iche la ibeenneti ittaawe iꞌdaas yeesse ichoowka Baawulo weyti hollowe, iurgiye, ginna leeyeede wihi us iyidah, “Antohi magah Yeesso Kiriisto ka, amure kibahcha, inanta kasoobah!” Chirraas on ginna inám kabahte.

¹⁹ Chirri ꞌdooꞌdi inanti bowꞌdee leh saggi icho kola khajjeeli icho chilimme kaꞌhelaan ikhabin kase ka, Baawulo ichoow Siila khabteene, khaateene, inti lakoororsati ka, ꞌdooꞌdi intaas ka ꞌdooꞌd hukkumo igeecheen.

²⁰ ꞌDooꞌdi Rooma intaas ka ꞌdooꞌd hukkumo igeecheene, “ꞌDooꞌda a Yaꞌhuude, toolla la ilkerengeettaanya sina ikeenaan,” iyidaaheen.

²¹ “Icho hugummetoo amurreti sirgaali Rooma buusane nahi Rooma ikhaatanne iraahin iche enenyet abchaan.”

²² Urur tuumman la jaakh ka leekahe, ꞌdooꞌdi wewween la amuri Baawulo illeh darfo lakabahcho lajaho bahche.

²³ Inkoo icho weyti jaheen ka, jeela ka hideene, eti jeela yaakhicho amur ibahcheene mujjum a latoorribo.

²⁴ Eti jeela yaakhicho la, chirri us yeedaas daage ka, khaate, jeela goyaka minki goyaatteet gesse, gurtunki buure luhlo gesse, kahide.

²⁵ Geeddi ibeene il ekka seley kagowe ka, Baawulo ichoow Siila Waakh wahteene, geeyohi Waakh laka dowteen. ꞌDooꞌdi addane hidan la a dagansata on.

²⁶ Koloo kalday on harra weyti sesseehte ichoowka daddaabohi ilaate minassi jeela laka weyti korkokeen. Chirraas on afassi jeela tuumman furnameene, gaꞌdaarreti kootte ꞌdooꞌd lakahide la fuffuratte.

²⁷ Chirri eti jeela toorribo sookahe, us saggi afaf ifurayyihiin arge ka, kol ꞌdooꞌdi hihhidan firde koogyahee, birlabiis sooꞌhiire isigaasan leheet.

²⁸ Iꞌdaasenyi Baawulo weyti riire, “Iisigaasan, nah tuumman inta on kajirra,” iyidah.

²⁹ Eti jeela iween banay a lasookhaato yidahye, soonyaame, usuhi hamar ka seeho Baawulo ichoow Siila orcho ka jilbo il kaguꞌdde.

³⁰ ꞌDeerka Baawulo ichoow Siila khar isoobahche, “Era, mehe yeela ꞌdee Waakh iriba?” worsate.

³¹ Wihi icho ilaabeen, “Yeessohi Kamure rummeyso, ꞌdee ati ichoow minkaah tuummamba a atin laribaa.”

³² ꞌDeerka usu ichoow eti minkiis kajiro tuumman Yeedi Kamur icheekeen.

³³ Ibeenkaas goya on eti jeela iween icho khaate, jiissicho dikhe, ꞌdeerka chirraas on usu ichoow minkiis tuummamba labaattissiye.

³⁴ Eti jeela iween icho minkiis geeche, gololoo icho yamhiin siiche. Usu ichoow minkiis jeenteti icho Waakh irummeesteen u weyti hamaadeen.

³⁵ Saahta chirdeer ka, ꞌdooꞌdi ꞌdooꞌd hukkumo iskarticho ergate, “ꞌDooꞌdaas soofura,” yidah.

³⁶ Eti jeela iween la wihi us Baawulo iyidah, “ꞌDooꞌdi ꞌdooꞌd hukkumo farniin a sooꞌdiiche, ‘Baawulo ichoow Siila a lafuro,’ yidaaheen. Toolla kaha, nebey leeirda.”

³⁷ Iꞌdaasenyi Baawulo wihi us iskar iyidah, “Chirri ꞌdooꞌdi Rooma nah liiekkaacho laka, icho ꞌdow on ka nah jaheene, toro jeela nah geecheen. Toollaka toro dagsi nah kabahchaan? Mele! Icho rubeycho a yimaateene, a nah bahcheen.”

³⁸ Iskare la yeeda khaatte, ꞌdooꞌdi ꞌdooꞌd hukkumo igeesse, ꞌdooꞌdi ꞌdooꞌd hukkumo la chirri us saggi ꞌdooꞌd ki ili Rooma iyahe daage ka roorro gesse.

³⁹ Iyimaateene, “Nah ikakuta,” iyidaaheene, jeela kabahcheene, hawwaasteene ꞌdee ilkerengeet a kabaheen.

⁴⁰ Inkoo Baawulo ichoow Siila jeela kabaheene, min Liidiya irteen ka ꞌdooꞌd Kiriisto ꞌheleene, uur miigoocheene, ꞌdeerka katabeen.