Hilassi Ergaano 12 - Wori Haaggane Yeesso Kiriisto Miinsan Ayyinti Husube Waakh Enenyet Igooche

ꞌDooꞌdi Yeesso kakhuufo weyti sina loomhicha

¹ Geeddassaas on ka karnati ꞌHerood Agiribba layadeeh urur Kiriisto goyaka ꞌdooꞌdoo khabte, usuhi sina omhicho ꞌdoonaa.

² Yaakoobohi walaal Yoohanee birlabe lakayigis.

³ ꞌHerood la chirri us saggi ꞌdooꞌdi Yaꞌhuud waha ikahamaado arge ka, Beetero laka sookhabte jeela gesse. Wahaas la maanti Daawti Makaateti Liikhasin iche yitaaheen.

⁴ Inkoo Beetero jeela lagesse, Beetero a lakhaate iskarti toorribto rabit affarenye rabite ba la et affar tahe liigeeche ꞌdee toorribta. ꞌHerood la mehe ꞌdoona ya, usuhi Beetero inkoo daawti Baasakka kutte ꞌdooꞌd tuumman ortiis ka hukkumo.

⁵ Beetero ꞌdeerka jeela lagesse. Iꞌdaasenyi urur Kiriisto jeentetiis u weyti Waakh wahte.

Herti Waakh Beetero jeela ka soofurta

⁶ Ibeenki ꞌdee saahka ꞌHerood Beetero soohukkumo ka, Beetero et lamma iskareete dahcho urꞌda, biingo lamma lakahide, tooba etoo iskareete lakahide, iskarti lammeenye aritti jeela toorribto la a jirta.

⁷ Koloo kalday on hertoo Kamur soobahte, minki ꞌdooꞌd lakahido banay kaababeen. Herti Waakh la Beetero barbar ꞌdaarte, “Dowwa sookah,” itidah. Chirraas on gaꞌdaarreti kootte Beetero dahano kahidan diddihte.

⁸ Herti Waakh la wihi iche Beetero itidah, “Saabaah jurkhiche, kobohaah gesso.” Beetero la iꞌdaas yeele. “Kabuuꞌdaah laka gesso, isooraah,” itidah.

⁹ Beetero la raahe, jeela kaleebahe, iꞌdaasenyi saggi wahaas herti Waakh yeesse rumanka iyitaaheen ma kasine, kol us fooltabcho argo on koogyahe.

¹⁰ Eti oraate arit yaakhicho ichoow ki lammaatteet kasookuteene aritti gaꞌdaare ilkerengeet liikabaho sooeleeleen. Arite la keley on furnante icho la tabeen. Inkoo icho inti jitat iskachibaan sooeleeleen ka, chirraas on herti Waakh usu katabte.

¹¹ Beetero ꞌdeerka neybaate, wihi us yidah, “Toolla rumanka a uba, Kamur hertiistoo a isooerge, hiinaan ꞌHerood ichoow wihi tuummane ani isooyateehe ꞌdooꞌdi Yaꞌhuud garti ikaribe.”

¹² Chirri us iskase ka min Maariya irte. Maariya la a abar Yoohanahi toro magahiiskoo Marko layadeeh. Minkaas la ꞌdooꞌdi ittaawenye Waakh wahti iche kajira.

¹³ Beetero la yimiyye afafhi kharaat gugguꞌdde inanti falfeenye Rooda layadeeh itimiyye leeyeedde.

¹⁴ Chirri iche hooy Beetero garatte ka weyti hamaadde, min ma furin ba nyaante ꞌdooꞌd saggi Beetero khar itoollo icheekte.

¹⁵ ꞌDooꞌd la wihi us inám iyidah, “At a sirgo!” Iname la matah miigeysatte, “Mele, a rum,” itidah. Icho la toro, “A hertiisti Waakh,” iyidaaheen.

¹⁶ Iꞌdaasenyi geeddaas tuumman Beetero afaf on soojaha. ꞌDaꞌddaboka afaf fureene, chirri icho Beetero argeen ka weyti girmeesteen.

¹⁷ Ulla dahan ka gammadicha iyidahye, saggi Kamur jeela ikasoobahche icheeke. “Waha Yaakoobo ichoow ꞌdooꞌdi Kiriisto rummeeste icheeka,” iyidahye, bahe intoo addan irte.

¹⁸ Baryo ka, iskarti Beetero toorribto mal gele, jeenteti wihi Beetero kayitah u.

¹⁹ Inkoo iskar ꞌHerood weyti Beetero yowatte waayte ka, ꞌHerood iskar wowworsate amur bahche iskar omoot igooche. ꞌHerood ꞌdeerka ili Yaꞌhuudiya kakahe irte ilkerengeetti Kaaysareya geeddoo fiddiye.

Karnati ꞌHerood Agiribbahi oraate yamuut

²⁰ Karnati ꞌHerood Agiribbahi oraate ꞌdooꞌdi ilkerengeetti Tiiro ichoow ꞌdooꞌdi ilkerengeetti Siidon ba weyti kahollowe. Icho la saamo ka irteene sooargeen. Kolooraat la eti uranti karnat iweene Bulaastas layadeeh iche ankicho leekeeneen. Irteene ꞌHeroodha nebey daaheen, iꞌdi tahe ilicho il ꞌHeroodhane golol kaꞌhela.

²¹ Ibeenkoo isliigooche ka ꞌHerood darfohiiski karnannoon gessate komborti antoot koorronte, ꞌdooꞌd itolche.

²² Urur la rirriire, “Weeli enenyet mee yeyyeedo, waakkhoo yeyyeeda,” yidaaheen.

²³ Chirraas on jeenteti ꞌHerood Waakh ikoolin u, hertoo Kamur usu guꞌdubte, ulla deyyah uur yumheene, yumuy.

²⁴ Iꞌdaasenyi Yeedi Waakh orey on isohte, ꞌdooꞌdi ittaawe la Yeesso rummeeste.

²⁵ Chirri Barnaba ichoow Saawulo hilicho buuhicheen ka, ilkerengeetti weene Yeerusaleem kasoonokhteene, Yoohanahi magahoo Marko layadeeh khaatteene ilkerengeetti Antiyookhiya irteen.