Hilassi Ergaano 11 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Beetero saggi ꞌdooꞌdi yaafohi Yaꞌhuud ieheynan Kiriisto irummeeste cheeka

¹ Ergaano ichoow ꞌdooꞌdi Kiriisto rummeeste Yaꞌhuudiya kijiro tuumman saggi yaafohi Yaꞌhuud ieheynan laka Yeedi Waakh ikhaatteen daageen.

² ꞌDeerka maanti Beetero ilkerengeetti weene Yeerusaleem ikore ka, ꞌdooꞌdi Yaꞌhuude Kiriisto rummeeste usu leejaakhe.

³ Wihi icho iyidaaheen, “At minassi ꞌdooꞌdi ikhandiyanne iratte icho leegolossatte.”

⁴ Beetero la wihi yitah tuumman idowdowe, wihi us kasookhabte us iyidah,

⁵ “An ilkerengeetti Yooba iche kajire, Waakh wahdaayi, fooltabcho arge. Wohoo iꞌdi dafartoo buurenye goobi Waakh ka laddad affarcho lakhuccho il liisoowoyo garabeey lasooyissil arge.

⁶ Goya yeye, wahanyeyyohi fil tuummane arge. Bina ichoow hoola ichoow binahi uur il kajiito ichoow chimbirohi saraate dafar goya kajira.

⁷ Anna hooyi, ‘Beetero kahe, wahanyeyyoha agiise, aham,’ idowo daage.

⁸ “Wihi an ilaabe, ‘Kamuroow, mele, iꞌdi tahe injire gololi liiumhane ommos biꞌdire afeey ma gelin.’

⁹ “Hooy la koli lammaatteet goobi Waakh ka sooyeede wihi us yidah, ‘Wihi Waakh munyaache wihi biꞌdire iikhaatin.’

¹⁰ Waha kol seyyahe yitaaheene, ꞌdeerka toro goobi Waakh liijiite.

¹¹ “Chirraas on ꞌdooꞌdi seyyahenye ilkerengeetti Kaaysareya ka ani liisooergate, minki an fiddiyo kajiro sooeleele.

¹² Rubeyti Munyee wihi iche ani itidah, ‘ꞌDooꞌdaas a leejijjiitanne, raah.’ Reera lihenye koo Kiriistee laka ilkerengeetti Yooba ka iraahe ichoowka ilkerengeetti Kaaysareya isleeiranne, nah tuummamba min Korneeliyo isleegelle.

¹³ Ulla saggi herti Waakh minkiis ka isoobahte, ‘ꞌDooꞌdoo ilkerengeetti Yooba iergo, eti magahiis Siimon layadeehe magahoo ka la Beetero layadeeh a soowaho,’ itidah, nah isoocheeke.

¹⁴ ‘Ulla farniine kikeena, farniinkaas ka ati ichoow minkaah tuumman a atin lariba,’ itidah.

¹⁵ “Chirri an yeede on Rubeyti Munyee iꞌdi goorat iche inno orey inno ikasooyagtuu icho laka isooyagte.

¹⁶ Chirraakka wihi goorat Kamur yidah kasooꞌhele, ‘Yoohana enenyet bicche kabaattissiye, iꞌdaasenyi atin Rubeyti Munyee ka a atin labaattissiya.’

¹⁷ ꞌDeerka chirri Waakh siinti Rubeyti Munyeenye us goorat innohi Yeesso Kiriistohi Kamure rummeysanne inno siiche icho laka siiche, anihi Waakh tirrimo a ayyo?”

¹⁸ Chirri icho waha daageen ka wihi Beetero yeele ꞌdiiꞌdin katabeene Waakh saaꞌdeen. Wihi icho yidaaheen, “Kola ꞌdeerka Waakh yaafohi Yaꞌhuud ieheynan laka uskeel a kasoolaabe, ꞌdee jiro ꞌhelaan.”

Saggi ꞌdooꞌdi Yaꞌhuud ieheynane ilkerengeetti Antiyookhiya kajiro Wori Haaggan idaage

¹⁹ ꞌDooꞌd Kiriistoki lataaꞌhiche jeenteti sinayyohi ꞌdooꞌd loomhichuu inkoo Isiteefano layigis geeddi ili Foniikiya ichoow kurti bicche dahcho kajirto Kuuburo layadeeh ichoow ilkerengeetti Antiyookhiya irte. ꞌDooꞌdi yaafti Yaꞌhuud kalday Wori Haaggan icheekeen.

²⁰ Iꞌdaasenyi gaasichokoo ili Kuuburo ichoow ilkerengeetti Kureene kayimiyye, ilkereengeetti Antiyookhiya irte, ꞌdooꞌdi yaafohi Yaꞌhuud ieheynan Wori Haaggane Yeessohi Kamure miinsan icheekeen.

²¹ Miigti Kamur icho a leejirte, ꞌdeerka ꞌdooꞌdi ittaawe wori Kamur rummeeste toro raahe.

²² Urur Kiriistoki ilkerengeetti weene Yeerusaleem wora daage, icho la Barnaba ilkerengeetti Antiyookhiya iergeen.

²³ Maanti us intaas sooeleele us saggi icho haaggi Waakhe buurenye icho imunneynan iꞌheleen arge ka, weyti hamaade, ulla icho uur miigoocha ꞌdee rumanka uurassicho tuumman ka Kamur raahaan.

²⁴ Barnaba la a etoo haaggane, Rubeyti Munyee buuhto toro la Yeesso kakhuufo. ꞌDooꞌdi ittaawe la kamur kakhuufe.

²⁵ Barnaba ꞌdeerka ilkerengeetti Taarso irte, Saawulo yowte.

²⁶ Chirri us Saawulo ꞌhele ka, sookhaate ilkerengeetti Antiyookhiya keene. Barnaba ichoow Saawulo guꞌhoo tuumman urur Kiriisto isꞌheleene, toro la ꞌdooꞌdi ittaawe wori Waakh mujjum abcheen. Ilkerengeetti Antiyookhiya iche abatti kolooraat ꞌdooꞌd Kiriisto lakiidah.

²⁷ Maanassaas ka ꞌdooꞌdoo Waákh íyeyyeedo ilkerengeetti weene Yeerusaleem kasookhubte ilkerengeetti Antiyookhiya yimiy.

²⁸ Kichekoo magahiis Agaabo layadeeh kahe, Rubeyti Munyee ka, saggi abaartoo suuje dowwanoha ka harrati sirgaali Rooma anti tuumman igesso orey on cheeke. Abaartaas la maanti Kilaawudiyo karnat yitahye soomarte.

²⁹ Abatti ebba gargaar geeddi us yabuuꞌd ꞌdooꞌdi Kiriisto rummeeste ili Yaꞌhuudiya ibihin gooche.

³⁰ Waha yeeleene, Barnaba ichoow Saawulo gargaari lasoobahche idiibeene, ewweenki urur Kiriisto woyo iergeen.