Hilassi Ergaano 10 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Korneeliyo Beetero waha

¹ Ilkerengeetti Kaaysareya ka, etoo Korneeliyo layadeehe koobbintoo iskareete, iskarti ꞌDeylaan layadeeh itoollo, a jire.

² Usu ichoow minkiis tuumman kol tuumman wihi Waakh kahamaadicho yeeleene, toro la Waakh a karooraan. Us ꞌdooꞌdi Yaꞌhuude miskiine weyti gargaare, toro kol tuumman Waakhe wahta.

³ Maantooka geeddi sahaꞌd saagaassi maalimeet ka, fooltabchotoo arge. Fooltabcho ka wihi us mujjum arge, a herti Waakhe itimiyye, “Korneeliyo,” itidah.

⁴ Korneeliyo iche roorro ka indo katoolliche, wihi us worsate, “A mehe Kamur?” Herti Waakh wihi iche ilaabte, “Waakh weysihaah a daage, wihi at miskiino siisso la a arge, kaasooꞌhele.

⁵ Toollaka ꞌdooꞌdoo ilkerengeetti Yooba ierege, etoo Siimon layadeehe magahiiskoo addan toro Beetero layadeeh a soowaho.

⁶ Usu, Siimonhi ukto kaaho toro haaggicho beyti buure afiche yaal iche leefiddiya.”

⁷ Chirri herti Waakhe kootte leeyyeedde katabte ka, Korneeliyo falfa lamma minkiis kajirto ichoow etoo iskareet soowahe. Et la a ki ullaka weyti Yeedi Waakh khuccho toro la Korneeliyo rubeytiis yaakhicho.

⁸ Wihi yitah tuumman icheeke ilkerengeetti Yooba ierge.

Beetero fooltabcho arga

⁹ Ibeenki kaas sooraaho geeddi sahaꞌd lihti maalimeete ꞌdooꞌdaas ilkerengeetti Yooba isoodowwaate ka, Beetero min sartiisti hafan ikore, Waakh wahte.

¹⁰ Beetero weyti ankaye, wohoo us yaham ꞌdoone. Golol lakarchaayi fooltabcho arge.

¹¹ Sereyti bakkaahte arge, wohoo iꞌdi dafarti buurenye il isoosohti arge. Dafarta la laddad affarcho lasookhuccha il liisoowoya.

¹² Dafartaas wahanyeyyohi fil tuummane iche goya kajira. Bina ichoow hoola ichoow binahi uur il kajiito ichoow chimbirohi saraate fil tuummanenye kajira.

¹³ Hooyoo la Beetero wihi us iyidah, “Beetero, kah wahanyeyyoha agiise aham.”

¹⁴ Beetero wihi us ilaabe, “Kamur koloo kalday laka iꞌdaas mee! A mehe an injire wihi biꞌdire ommos wihi miꞌdab ieheynan ma umhan.”

¹⁵ Hooyi Waakh koli lammaatteet usu leeyeede wihi us yidah, “Wihi Waakh munyaache wihi biꞌdire iikhaatin.”

¹⁶ Waha kol seyyahe yitaaheene, chirraas on dafar goobi Waakh liilaabe.

Korneeliyo ꞌdooꞌdoo Beetero iergata

¹⁷ Beetero wihi fooltabchota tahe kamalalaayi, ꞌdooꞌdi kootte Korneeliyo sooergate, inti min kajiro a abte, arite toolla.

¹⁸ ꞌDooꞌd waheene, usu etoo marteenye Beetero layadeehe magahiis koo addan Siimon layadeeh inta fiddiyo worsateen.

¹⁹ Beetero wihi fooltabcho tahe kamiyyaantaayi, Rubeyti Munyee wihi iche itidah, “Siimon, reeroo seyyahenye kisooyowte kalla.

²⁰ ꞌDeerka kahe, il ikhubo. Icho raahin akaroorin, iꞌdi tahe ani icho sooerge.”

²¹ Beetero il ikhubte wihi us reer iyidah, “Eti atin sooyowatteen a ani. A iꞌdoh itimaateen?”

²² Reer wihi us ilaabe, “Etoo Korneeliyo layadeehe koobbintoo iskareet itoollo kanimiy. Ulla a etoo fissane Waákh karooro, yaafti Yaꞌhuud tuumman la weyti inkaanyitto. Hertoo Waakhe munyeenye usu minkiis a kiwaho ꞌdee wora a daago itidah.”

²³ Beetero ꞌdeerka ꞌdooꞌd min goya iwahe martiiste. Ibeenki kaas sooraaho ka Beetero ꞌdooꞌd raahe. ꞌDooꞌdoo ilkerengeetti Yooba ka Kiriisto rummeeste laka Beetero raahe.

Beetero min Korneeliyo irta

²⁴ Ibeenki kaas sooraaho ka, ilkerengeetti Kaaysareya sooeleeleen. Korneeliyo la icho suge, hiiyyiis ichoow aalassiiski us weyti ꞌdoono minkiis iwahe.

²⁵ Chirra Beetero min soogelo ka Korneeliyo Beetero or kasoodowe, inkaanyit ka ortiis ka jilbo il kaguꞌdde.

²⁶ Iꞌdaasenyi Beetero sookahche, “Sookah, annaka a weeli enenyet one!” iyidah.

²⁷ Beetero Korneeliyo leeyyeedaayi min gele. ꞌDooꞌdi ittaawe la intaas a kajira.

²⁸ Beetero la wihi us ꞌdooꞌdaas iyidah, “Weyti a garattaane amurreteen eti Yaꞌhuude yaafohi addan kachimmamo ommos minassicho gelo a buusantahe. Iꞌdaasenyi Waakh mehe ituse ya, an et an a biꞌdir ommos a suuj adeeh mele.

²⁹ ꞌDeerka chirri enenyet liisooꞌdiiche ka, ma jijjiitanne imiy. Anna mehe kiworsada ya, mehe iwahte?”

³⁰ Korneeliyo wihi us ilaabe, “Maan affar kutte, anihi sahaꞌd saagaassi maalimeete chirree minkeey goyaka Waakh wahdi iche dog laan on etoo gaaddi dakhane torrogoot khabo orteey sootolossate.

³¹ Wihi us iyidah, ‘Korneeliyo, Waakh weysihaah a daage, toro wihi at miskiino siisso a arge.

³² Toolla ilkerengeetti Yooba enenyet ierege, etoo Siimon layadeehe magahoo ka la Beetero layadeeh a soowaheen. Us minki etoo Siimon layadeeh ka a marti. Eta la ukto mujjummoocha, beyti buurenye afiche yaal.’

³³ Anna ꞌdeerka chirraas on enenyet kisooerge, alla weyti gon haaggisse a timiyyee. Toollaka nah tuumman kalla Waakh ortiis tololla wihi Kamur dah kiyidah dagansanna.”

Beetero Korneeliyo ichoow minkiis ba Wori Haaggan icheeka

³⁴ Beetero la yeede wihi us yidah, “An kola saggi Waakh rumanka yaafo tuumman ekka iekkaacho a arge.

³⁵ Iꞌdaasenyi Waakh ꞌdooꞌdi il tuummane usu karooro wihi fissan yeelo a khaatta.

³⁶ Atin farniinki Waakh ꞌdooꞌdi Issiraayel isooerge a garattaan. Farniinka la Wori Haaggane cheeke, Yeesso Kiriisto ka innohi enenyete ichoow Waakh a isinebeyne. Yeesso Kiriisto la a Kamuri weeli enenyet tuumman.

³⁷ Wihi inkoo Yoohanahi Enenyet Baattissiyo wori baattissiyo cheeke boroofenhi Gaalilaaya lakasookhabte ichoowka ili Yaꞌhuud tuumman eleele yitah a garattaan.

³⁸ Saggi Waakh Yeessohi Naasaret Rubeyti Munyee ichoow miig isiiche a garattaan. Jeenteti Waakh ileejiruu us meel tuummane irte, wihi haaggan yeele, ꞌdooꞌdi Seytaan sina kawaaricho samaache.

³⁹ “Nah la wihi tuummane Yeesso ili ꞌdooꞌdi Yaꞌhuud ichoow ilkerengeetti weene Yeerusaleem ka yeele garticho a laabna. Yeesso massalaaba kakaaheene yigaaseen.

⁴⁰ Iꞌdaasenyi Waakh ibeenki seyyahnaatteet ka omoot kasookahche, enenyet tuse.

⁴¹ ꞌDooꞌd tuumman mee usú arge, iꞌdaasenyi nahi goorat Waakh nah soobahsate woriis cheekno, usu leegolossanne on inkoo us sookahe agarre.

⁴² Waakh la amure nah ibahche, ꞌdee Wori Haaggan ꞌdooꞌd icheekna, toro saggi us eti Waakh soobahsate ꞌdee ꞌdooꞌdi jiro ichoow ki tuume ba ihukkumo iyahe cheekna.

⁴³ ꞌDooꞌdi Waákh íyeyyeedo tuumman wihi usu miinsane icho cheekeen, eti Kiriisto rummeeste tuumman, usu ka uskeel a liikakuta.”

Rubeyti Munyee ꞌdooꞌdi yaafohi Yaꞌhuud ieheynan isooyagta

⁴⁴ Beetero yeyyeedaayi Rubeyti Munyee ꞌdooꞌdi dagansati tuumman isooyagte.

⁴⁵ ꞌDooꞌdi Yaꞌhuude Kiriisto rummeeste Beetero sooraahe la, Rubeyti Munyeenye yaafohi Yaꞌhuud ieheynan laka isooyagte weyti kagirmeeste.

⁴⁶ Iꞌdi tahe ꞌdooꞌdi yaafohi addan ichohi afi icho idaagin kaayyeedo toro Waakh saaꞌdo, iche daageen. Beetero ꞌdeerka wihi us yidah,

⁴⁷ “ꞌDooꞌda iꞌdi goorat inno Rubeyti Munyee iꞌhelluu, icho laka Rubeyti Munyee a ꞌheleen. Etoo ichohi bicche ka labaattissiyo a tirta?”

⁴⁸ ꞌDeerka amur ibahche, magah Yeesso Kiriisto ka icho a labaattissiyo. Icho la Beeterohi geeddoo icho leefiddiyo daaheen.