Galaatiya 6 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Haag isiyeela

¹ ꞌDooꞌd Kiriistokaaw, chiꞌ etoo uskeel yeele, atinhi Rubeyti Munyee atin woyto samacchaar jiti haaggan isoolaaba. Iꞌdaasenyi ebba a isyaakhicho uus kajmeti uskeel kaluguꞌddo khaatine.

² Huleesi jiro eti addan fuulo isleeokkhicha. Iꞌdaas ka amur Kiriisto a buuhissaan.

³ A mehe chiꞌ etoo wohoo iskoogyahe, ꞌdeerka us etoo addan igargaarin, iꞌdaas ka a isekkeesta, jeenteti us wohoo ieheynan u.

⁴ Ebba wihi us yeelo a fiiricho, a iskeeylajo, uus etoo addan iskeekkaanne.

⁵ A mehe ebba keley on huleesiis siꞌda.

⁶ Eti wor Kiriisto laabcho la, eti woraas abcho wahanyeyyohi haaggane us khabo a leegismo.

⁷ Iisekkeysanna, et Waakh ekkeesti mele. Ebba ilinti us gosiis goya kachibe on gurnaankiche gurta.

⁸ Eti wihi uuriis goya kijiro uskeel imoono kahamaadicho on yeelo, iꞌdi ilinti gos lagessuu gurnaanki us uskeelaas kaꞌhelo, a baabakki usu labaabiicho. Iꞌdaasenyi eti wihi us yeelo, wihi Rubeyti Munyee kahamaadicho yahiin, iꞌdi ilinti gos lagessuu, gurnaanki jiroti imassanne Rubeyti Munyee kaꞌhela.

⁹ Uus inno haaggi inno yeello kaꞌharin giꞌde. A mehe chiꞌinno ajjibaat ikhaatin, maane a tamiit, ti inno gurnaan ꞌhello.

¹⁰ Maantaka, maambaaw inno jitoo ꞌhelle, enenyet tuumman haag iyeello. Kach ka la, ꞌdooꞌdassi Kiriisto rummeeste haag iyeello.

Yeedi ꞌdaꞌddaboot ichoow bariito

¹¹ Chiirnaanka burbuurenye an dahanteey ka atin isoochiire bal yeya!

¹² ꞌDooꞌdi khandi atin ihosso, a ꞌdooꞌdi enenyet ortiis ka ishahhaaggin ꞌdoono. Iꞌdane yeelaan uus ꞌdee jeenteti wori massalaaba Kiriisto miinsane enenyet ribo ka sina loomhin.

¹³ ꞌDooꞌdi Yaꞌhuude khandiiti laka, amurre Muusa tuum ma raaho. Iꞌdaasenyi icho atinhi atin lakhandiyo ꞌdoonaane, ꞌdee khandihiin ka eylajaan.

¹⁴ Ani ka la, omootti Yeesso Kiriistohi Kamureene massalaaba kayumuy on menye, wohoo addane an keeylajo ma jiraan. Massalaaba Kiriisto ka, wahanyeyyohi harrata a kamassade toro la wahanyeyyohi harrata ma idakhtaan.

¹⁵ A mehe khandi ommos khandiwaayyo mee khumman. Wihi khumman, a atihi kola uumacchotoo husub titah.

¹⁶ Waakh ba ꞌdooꞌdi yeeda raaho tuumman nebey kakaala, toro uur isoonugleesta. ꞌDooꞌdaas la rumanka a ꞌdooꞌdi Waakh gon.

¹⁷ Wahane kamassicha. Uus etoo kalday laka sina ikawaarin. A mehe gumaarreti an khabo, saggi an bowꞌda Yeesso iahe tussa.

¹⁸ ꞌDooꞌd Kiriistokaaw, Yeesso Kiriistohi Kamureene ba rubeyohiin imaala. Aamiin.