Galaatiya 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Eti amurre kanool ommos ki Kiriisto kakhuufo koh eti fissan liiekkaacha?

¹ ꞌDalammeti Galaatiya, ayyo atin katibte? Rumanka Yeesso Kiriistohi massalaaba lakakaahe a atin liisoonyiikhe!

² Wohoo kaldaye atin kaaban ꞌdoona. Rubeyti Munyee jeenteti atin amurre Muusa ikhucchisseene iꞌhesseen, bal jeenteti atin Wori Haaggan idaagteene, irummeysatteen?

³ Saggane ꞌdalam itahiin? Inkoo atin jiroti husub Rubeyti Munyee leesookhabatteen, toro miigti weeli enenyete kamassin ꞌdoontaan?

⁴ Sinati atin tuhum, a ti ilmarhaatteet on a? Rumanka ti ilmarhaatteet mee!

⁵ Waakh Rubeyti Munyee a atin siicha, wihi ittaawenye weeli enenyet yeelin iubaaꞌdan goytiin ka yeela. Waha a jeenteti atin amurre Muusa iraahteen a? Mele! A jeenteti atin Wori Haaggan idaagteene irummeysatteen gon.

⁶ Iꞌdaas ka Aburaaham, “Wihi Waakh yidahye rummeeste, Waakh usu eti fissan iekkaache.”

⁷ Waha abda, nyaakhut Aburaaham a ꞌdooꞌdi Waakh kakhuufo on.

⁸ Chiirnaanneti Waakh saggi Waakh berri yaafohi Yaꞌhuud ieheynan kakhuufnaanki icho usu kakhuufaan ka ꞌdooꞌdi fiffissan iekkaacho a cheekte. Waakh ꞌhor on Wori Haaggan Aburaaham icheeke, wihi us iyidah, “Ati ka yaafohi harra tuumman a liimaala.”

⁹ ꞌDeerka ꞌdooꞌdi Kiriisto kakhuufo tuumman, iꞌdi Aburaahamhi Waakh kakhuufuu, Waakh icho ichoow usu ba a imaala.

¹⁰ ꞌDooꞌdi tuummane raahnaanki us amurre Muusa raaho kanool a falanyahe. A mehe wihi chiiran, “Eti orey ikasohanne wihi Buuggi amurre Muusa kachiiran tuumman iraahin a falanyahe.”

¹¹ Wihi nyiikhsan, et amurre Muusati us raaho ka Waakh eti fissan iekkaacho mele. A mehe, “Eti fissan kakhuufnaanki us Waakh kakhuufo ka a jira.”

¹² Amurre la kakhuufnaanki Waakh lakakhuufo ma kanoole, iꞌdaasenyi, “Eti wihi amurre ꞌdoonto tuumman raaho, amurre jirotiis dakhatta.”

¹³ Kiriisto falohi amurre Muusa a inno kasoogatte inno soofure, iroonoteen u lafale. A mehe wihi chiiran, “Eti tuummane geey lakalooꞌdiche a falanyahe.”

¹⁴ Us a inno gatte ꞌdee imaalnaanki goorat Waakh Aburaaham imaale, yaafohi Yaꞌhuud ieheynan laka Yeesso Kiriisto ka imaala, ꞌdee kakhuufnaanki inno Kiriisto kakhuufno ka, ayyinti Rubeyti Munyeenye goorat Waakh gooche ꞌhella.

Dahal amurre menye wihi Waakh ayyiche lakeela

¹⁵ ꞌDooꞌd Kiriistokaaw, iyookkoti wohoo orran dakkhan inno garanni atin tusa. Chirri et lamma ayyintoo iskadaagte, et ayyintaas ꞌdol ilaabo ommos wohoo addan kakhayo mele.

¹⁶ Toolla la ayyinti goorat Waakh Aburaahám igooche, Aburaaham ichoow weel nyaakhut nyaakhutiissa miinsantahe. Chiirnaanneti Waakh, “Ichoow nyaakhut nyaakhutiissa,” mee tadeeh, iꞌdaas ka kootte a ꞌdooꞌdi ittaawe gone. Iꞌdaasenyi mehe tadeeh ya, “Weel nyaakhut nyaakhutaahha.” Iꞌdaas ka la a etoo kaldaye, a Kiriisto la.

¹⁷ Wihi an eldi kallaayo, Waakh Aburaaham ayyintoo igooche. Amurre Muusati inkoo guꞌh kud affar ichoow guꞌh tomon seyyah kutte timiy la, ayyintaas Waakh ma jebinne, ayyinti Waakh gooche ma suujaan.

¹⁸ A mehe chirri wihi enenyet muꞌdan amurre Muusati laraaho kanoolyahiin, kola ayyinti goorat us gooche ma kanool gon. Iꞌdaasenyi Waakh haaggiiski buure ka, ayyintaas ka Aburaaham wihi usu muꞌdan a siiche.

¹⁹ Amurre Muusa ꞌdeerka mehe liisoobahcheey? Jeenteti Waakh liidaagiwwaaye iche lakasookhaye ichoowka weel nyaakhut nyaakhut Aburaaham ki goorat Waakh ayyintaas ka yeele yimiy. Waakh herti Waakh ka amurretaas a chuukhe. Muusa la Waakh ichoow ꞌdooꞌdi Yaꞌhuud dahcho gele, ꞌdooꞌdaas amurre ikeene.

²⁰ Chiꞌ koobbin lamma ayyintoo isleegoosso, dahgele laꞌdoona. Iꞌdaasenyi Waakh rubeytiissa on keley ayyintaas Aburaaham igooche.

²¹ ꞌDeerka amurre Muusa ichoow ayyinti goorat Waakh gooche a isbuusanyahiine elannaay? Waakh meesseen bujiiy! A mehe chiꞌ amuroo jiro keeno jiro, iꞌdaas ka ꞌdeerka amurreti laraaho ka Waakh enenyet ꞌdooꞌdi ortiis ka fiffissane iekkaacha.

²² Iꞌdaasenyi Chiirnaanneti Waakh mehe cheekta ya, uskeel weeli enenyete harra tuumman a hide, ꞌdee ꞌdooꞌd Kiriisto ayyinti Waakh gooche, kakhuufnaanki Yeesso Kiriisto lakakhuufo ka ꞌhela.

²³ Geeddi goorat wori Yeesso lakakhuufo iimaatan la, amurre Muusa a inno hidde, toro inno toorribte, ichoowka wori Kiriistohi lakakhuufo lasoobabbakkaahiche.

²⁴ Maantaka amurre maantaas ersinkeen eheete, ichoowka Kiriisto yimiyye, ꞌdee ꞌdooꞌdi Waakh ortiis ka fiffissan inno liiekkaacha jeenteti inno usu ikakhuufnuu.

²⁵ Toolla jiti Kiriisto lakakhuufo yimiy la, amurre Muusa ma inno yaakhisso.

Atinhi Yeesso Kiriisto kakhuufteen a nyaakhuti Waakh

²⁶ Kakhuufnaankaas atin Yeesso Kiriisto kakhuufteen ka, atin tuumman a nyaakhuti Waakh.

²⁷ A mehe atinhi baattissiyo ka atin ichoow Kiriisto ba wohoo kalday tahiin, a iꞌdoo atin jiro Kiriisto iꞌdi gaadeet u gessatteen.

²⁸ Kola enenyet seley ma gaan. Iꞌdi maanta Yaꞌhuud ichoow yaafohi Yaꞌhuud ieheynan, ommos bowꞌda ichoow ꞌdooꞌdi bowꞌda ieheynan, ommos mejel ichoow deyyeho seley ma gaan, a mehe atin tuumman Yeesso Kiriisto ka a wohoo kalday.

²⁹ Atin koo Kiriisto a titaaheen gone, atin laka ꞌdeerka a nyaakhut Aburaahame, toro la ayyinti goorat Waakh Aburaaham igooche, atin laka a muꞌdantahiin.