Fiiliffi 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Saggi Kiriisto isinuglaachuu, atin laka isnuglaacha

¹ Kola atin ichoow Kiriisto a wohoo kalday gone, wahaas uur ma atin miigoochaan a? ꞌDooninti us atin ꞌdoono ka la, usu menya uur atin khoboocho? Atin ichoow Rubeyti Munyee la kulankoo kalday ma isikhabtaan a? Kiriisto ꞌdoonintiis ichoow uurnugleeliis a atin tuse menya?

² Maantaka taba isdaaginti atin isdaagtaan ichoow ꞌdooninti atin isꞌdoontaan ichoow maloo kaldaye atin khabtaan ichoow uuroo kaldaye atin isikhabtaan ka, hamaadeey tuum buuhicha.

³ ꞌDooꞌdi wihi awtiissa on yowti ommos immarah serey isgeecho iitaahana, iꞌdaasenyi ꞌdooꞌdi isnuglaacho ateeha, ꞌdooꞌdi addan saggi us atin ikakhummanyahe iekkaacha.

⁴ Wihi wihiine kalday on aw iikhabina, wihi ꞌdooꞌdi addan laka aw ikhaba.

⁵ Taba giꞌde mali Yeesso Kiriisto khabe khaba.

⁶ Us sagag dakkhan ka iꞌdi Waakhe eheete, eheetteey laka us wihi usu muꞌdane Waakh ekkatiis kayeelo ma kadagin.

⁷ Iꞌdaasenyi weynaan tuumman a kasootabe. Saggoh u? Iꞌdi bowꞌda yitahye, saggi weeli enenyet idesse, ꞌdooꞌdi usu arge la, weeli enenyet on arge.

⁸ Usu a isnuglaache. Saggoh u? Ayti Waakhe raahe, ichoowka omoote ititahye, omoottaas, a ti usu massalaaba lakakaahe.

⁹ Maantaka Waakh Kiriisto inti weynaan tuumman ka kussane gesse, toro la magahi magahenye tuumman kussan laka siiche,

¹⁰ ꞌdee magah Yeesso ka, wihi serey kijiro tuumman ichoow wihi harra sarche kijiro tuumman ichoow wihi harra goya kijiro tuumman, jilbo il a kaguꞌddaane,

¹¹ toro la icho tuumman saggi Yeesso Kiriisto Kamur iyahe ꞌdow ka a cheekaane, ꞌdee Waakkhi Aabbaheene lasaaꞌda.

Harra ka iꞌdi yiyyihimohi ababo ateeha

¹² Aalasseeyki an weyti ꞌdoono, atin waansiheey kol tuumman a raahteen. Geeddi an atin leejire kalday on menye, toolla an atin ileejirin weyti raahtaan. Maantaka, hamar ichoow roorroti atin Waakh karoortaan ka, orey isohda ribnaanki Waakh atin ribo jirotiin goyaka hol kadowa.

¹³ A mehe Waakhe malassiin woya ꞌdee wihi usu kahamaadicho ꞌdoontaane, toro la yeelin tabuuꞌdiin.

¹⁴ Taba wihi atin yeessaan tuumman ka, ꞌdooꞌdi iriir leh ommos ꞌdooꞌdi nyunnyuwo iitaahana.

¹⁵ Iꞌda ka nyaakhuti Waakhe wohoo rucchul laka liikacheekanne toro la eloo rucchul laka ikhabine tateehiin. Atin ꞌdooꞌdi iꞌdeenye khollokkhane toro ꞌdooꞌdi addan baabiicho goycho ka, a iꞌdi yiyyihimohi harrata ka mugꞌdi goya kabildiikho,

¹⁶ geeddi atin yeedi jiroti rummaat lakaꞌhelo ꞌdooꞌd icheektaan. Ibeenki Kiriisto soonokhti ani a atin keeylajo, hili geeddi an abuuꞌd tuumman an haaggiche uus ki ilmarhaatteet eheynan.

¹⁷ Chirri liiyagiis laka, diiggeey a iꞌdi sadakhati soorriyotiin lakakhube, an weyti atin leehamaada, toro la hamaadeey atin leegisma. A mehe hiliin a iꞌdi soorriyoti atin Waakh ibihissaane, kakhuufnaanki atin Waakh kakhuuftaan kayamiit.

¹⁸ Maantaka taba atin laka hamaada, toro la weyti ileehamaada.

Baawulo wor Timooti ichoow wor Ebaabara chiira

¹⁹ Chirri Yeessohi Kamure ꞌdoono, wihi an khajjeelo a Timootihi maanassa dow an atin isooergo, ꞌdee chirri an woriin abde ka uur imiigoocha.

²⁰ Inta ka etoo addane iꞌdiisenye rumanka aw atin ikhabo ma khabo.

²¹ A mehe ꞌdooꞌdi addan tuumman, wahanyeyyo Yeesso Kiriisto menye ebba wihiissa on yowta.

²² Iꞌdaasenyi Timooti saggi us rumanka indigir ikhabe us enenyet tuumman ituse a garattaan. Ani ichoow Timooti iꞌdi ooyo ichoow inankiissa Wori Haaggan isileecheekne.

²³ Maantaka, uus an wihi liiyeelo abdi, anihi usu atin isooergo khajjeela.

²⁴ An Kamur a kakhuufaa, dowwanoha ka a atin sooꞌdaara.

²⁵ Iꞌdaasenyi toolla wihi addane an gooche, a anihi Ebaabara atin isoolaabo. Ullaka a et Kiriisto toro la a ileehila a iꞌdoo us diho ikaleejire. Ulla a ergattitiinti wihi an maan dakkhan ꞌdoono ka igargaaro.

²⁶ Ulla atin tuumman a atin imoona toro la jeenteti atin khannaatiis idaagteen u, weyti mali uskul gele.

²⁷ Us rumanka weyti khannaneete, ichoowka umaatan leheet. Iꞌdaasenyi Waakh usu uur a isoonugleeste. Usu kalday on menye, Waakh ani laka uur a isoonugleeste, oytinti an khabo kakhayin jeyche.

²⁸ Maantaka an weyti usu atin isooergin ꞌdoona, ꞌdee maanti atin usu toro agartaan hamaaddaane, oytinteey laka nuglaatta.

²⁹ Iꞌdi eti Kamur rummeestuu, taba hamaadi buure ka usú martiisda, ꞌdooꞌdi iꞌdiise laka inkaanyita.

³⁰ Iꞌdi tahe jeenteti us Kiriisto hil ikahaaggicho on u, a umaatan leheet. Ulla jirotiis adahe gate, ꞌdee gargaari atin ani igargaarin iubaaꞌdan igargaare.