Fiilemon 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeed ortiissa

¹ Khadaaba eti kisoochiiro a ani, Baawulo. Anna jeenteti an wori Yeesso Kiriisto miinsan icheeko iche jeela ikajira. Timootihi ullaka koo Kiriistee a kisoobariitiche. Fiilemonhi weyti aalenyeenye, hil Kiriisto nah kaleejiro,

² ichoow Aafiyati too Kiriistee ichoow eteenyoki Arkiiba layadeehe nah sina isleenaham ichoow urur Kiriistoki kol tuumman minkaah ka Waakh wahti laka a isoochiira.

³ Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.

Baawulo Fiilemon Waakh iwaha toro jeentetiis u Waakh kalaꞌd ilaaba

⁴ An kol tuumman Waakkheey kalaꞌd a ilaaba geeddi an weysiheey ka kaasooꞌhelo.

⁵ Iꞌdi tahe saggi at Yeessohi Kamureene ikakhuufto toro la at ꞌdooꞌdi Waakh tuumman iꞌdoonto, a daaga.

⁶ Wihi an Waakh daaho, a kulanki Kiriistohi inno kakhuufno ka isikhabno gurnaan delo ꞌdee haaggi tuummane Kiriisto kayamiite inno khabno tuum abatta.

⁷ Et Kiriistokaaw, ꞌdooninti at ꞌdooꞌd Kiriisto ꞌdoonto weyti a ikahamaadisse, toro weyti uur imiigoosse, iꞌdi tahe at ꞌdooꞌdi Waakh uur a miigoosse.

Baawulo, Oneesmo Fiilemon ihawwaasta

⁸ Antohi Kiriisto isiiche ka, a geeddi an roorro laan amur kibahcho wihi incheenka at yeesso kicheeko.

⁹ Iꞌdaasenyi ꞌdoonin Kiriisto ka, samacchaar on kihawwaasda. Ani a Baawulo kola a araarrowe, toro la jeente Yeesso Kiriisto jeela ikajira,

¹⁰ a kihawwaasde, bal Oneesmo gargaar. Us kola a iꞌdi weelaaya. Iꞌdi tahe an jeela kajiraayi, usu jit Kiriisto abche kola a iꞌdoo an aabbahiis itah.

¹¹ ꞌHor indigir us kikhabo mele, iꞌdaasenyi toolla ati ichoow ani ba weyti indigir inno ikhaba.

¹² Usuhi an uureey ka weyti ꞌdoono a kisoolaaba.

¹³ Kootte incheenka geedda an jeela kajiro jeenteti an Wori Haaggan icheekuu, usuhi inta ka ileefiddiyo meessaah gelo igargaaro ꞌdoona.

¹⁴ Iꞌdaasenyi sammata at iayyin, anihi wohoo rucchul laka yeelo ma ꞌdoono. Iꞌda ka haaggi at yeesso ma lakihosso a wihi at ꞌdoonto on.

¹⁵ Kolossoo jeentetane geeddoo rucchul Oneesmo seley ibahteene, ꞌdee maanti us kisoonokhti jirtuu tuumman usu khabta.

¹⁶ ꞌDeerka us kola bowꞌda menye, bowꞌda a kadeefa, a iꞌdi walaalaahki at weyti ꞌdoonto. An usu weyti ꞌdoona, iꞌdaasenyi ꞌdooninti at usu ꞌdoonto iche weyti kutta. A mehe saggi weeli enenyet u ichoow Kamur ka us a walaalaahha, usu a ꞌdoonta.

¹⁷ ꞌDeerka chirri rumanka at ani hil Kiriisto ka iꞌdi wahalhaah ikhaatto, Oneesmo saggi kootte at ani imartiisatti imartiiso.

¹⁸ Chirri us khufoo kiyeele ommos us mogtoo kaakhabo, ani ikaguto.

¹⁹ Ani Baawulo, yeeda dahantaaya kachiira. Mogtiis ani kisooguta. Iꞌdaasenyi jiroti ati ichoow Kiriisto wohoo kalday tahiin ka saggi at ani mog ikakhabto laka an ma kaayyeedo.

²⁰ Toollaka et Kiriistokaaw, inno ichoow Kiriisto a wohoo kalday gone, iroonoteey u wahaas an kaaꞌdoono yeel. Iꞌdaakka weyti uur imiigoossa.

²¹ Saggi at wihi an kidaahe iyeesso a tissiba, ꞌdeerka khadaaba a kisoochiira. Saggi at wihi an kidaahe laka ꞌdirihicho iyeesso a garda.

²² Wihi addane an kidaaho kallaayo, minki marti ka inti an baryo ihaaggi. A mehe khajjeeli an khabo a ki Waakh weysihiin daago, us toro ani goytiin isoolaabo.

Bariitoti ꞌdaꞌddaboot ichoow weysi

²³ Ebaabarahi jeenteti us wor Yeesso Kiriisto ꞌdooꞌd ikacheekuu jeela ikaleejiro a kisoobariitiche.

²⁴ Toro la Marko ichoow Aristaarko ichoow Deema ichoow Luuka laka a kisoobariiticheen. Icho a ꞌdooꞌdi hil Kiriisto ikaleejiro.

²⁵ Yeesso Kiriistohi Kamure ba rubeyohiin imaala.