Bakkaahit 8 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Hanjati teebannaatteete khadaabi yuuban kadagsane labukkhicho uyuugge ichoow weysi miinsantahe

¹ Chirri Heleem hanjati teebannaatteet bukkhiche ka, goobi Waakh ka sahaꞌd nyuusiche riirit ladaage mele.

² Ani la herti Waakhe teebeenye Waakh ortiis tolosso arge, icho la arab teeba lasiiche.

³ Hertoo Waakhe addane khulaankoo ꞌdahabe uyuugge lakagubo khabto timiyye, koondihi gaꞌdaare ꞌdahab hagga tolossatte. Uyuuggeti buurenye lasiiche, iche la uyuuggeta weysiha ꞌdooꞌdi Waakhe koondihi gaꞌdaare ꞌdahabe komborti Waakhe antoot ortiis kajirto kakhayta Waakh ibihissa.

⁴ Uunki uyuugge ichoow weysihi ꞌdooꞌdi Waakh dahanti hertaas Waakh ka Waakh ortiis ka serey isleeirteen.

⁵ ꞌDeerka hertaas Waakh jilho koondihi gaꞌdaar kakhaatte, khulaam buuhisse, harra isaate. Karkaraho ichoow borooꞌd ichoow ankhad la soobaheene, toro harra laka sesseehte.

⁶ ꞌDeerka herti Waakhe teebeenye arabti teebee khabto tannabatte arabtichooda afuuftaa.

Herti Waakhe oraate arabiche afuufto geeyo ichoow hoosi lagubo itolossa

⁷ Herti Waakhe oraat arabiche afuufte, dagahti baraafo ichoow ꞌdabi diig kawarsanyahe harra kasookhubteen. Harra goonan seyyah ka goonankoo ꞌdab massiche. Geeyo goonan seyyah goyaka goonankoo ꞌdab massiche, hoosi ulhaw tuumman laka ꞌdab massiche.

Herti Waakhe lammaatteete arabiche afuufto beyti laguꞌddo itolossa

⁸ Herti Waakhe lammaatteet arabiche afuufte. Wohoo buurenye ꞌdab yahame iꞌdi haloo buure la beyti buure goya kadiheen. Beye goonan seyyah goyaka, goonankoo diig yitahye,

⁹ binahi bey goya kijiro rubey khabo goonan seyyah goyaka goonankoo ꞌdebbeeste, koobano goonan seyyah goyaka goonankoo bar latire.

Herti Waakhe seyyahnaatteete arabiche afuufto hawo ichoow indohi biccheete laguꞌddo itolossa

¹⁰ Herti Waakhe seyyahnaatteet arabiche afuufte, bakkaaloo buurenye ꞌdab kabolkho la serey kasoodihe hawohi ꞌdulo ichoow indohi biccheet goya kadihe, goonan seyyah goyaka goonankoo goya kadihe.

¹¹ Bakkaala la magahiis Birrakh iche layadeeh. Bicche goonan seyyah goyaka goonankoo birrakhnoweene, ꞌdooꞌdi ittaawe la bakkate jeenteti bicchehuu.

Herti Waakhe affarnaatteete arabiche afuufto sereyta daayane laguꞌddo itolossa

¹² Herti Waakhe affarnaatteet arabiche afuufte. Orrah ichoow yeyyah ichoow yiyyihimo goonan seyyah goyaka goonankoo guꞌddeene, jeentetaas u goonan seyyah goyaka goonankichokoo mugꞌdi yitah. Maalim goonan seyyah goyaka goonankoo banay ma khabo, ibeen goonan seyyah goyaka laka goonankoo banay ma khabo.

¹³ An ꞌdeyꞌdoochaayi, gabaddi serey katariꞌde hooyi buure ka riirto daage. Iche la wihi iche elatti, “Uuwwiy! Uuwwiy! Sinati weeli enenyete harra kijiro isoosohatti eenna a buure, jeenteti hooyi arabi herti Waakhe addane seyyahe dowwanoha ka isooafuuftuu!”