Bakkaahit 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Heleem khadaabi yuuban furin a muꞌdanyahe

¹ Wihi kasookhuccho an arge a eti komborti antoot kafiddiyo dahantiisti miigeeet ka khadaaboo yuubane amam lammacho chiirane meel teeba hanja lakadagche khabo.

² Toro hertoo Waakhe miigenye hooyi buure ka riirte arge. Wihi iche tidah, “Ayyo muꞌdane hanja bukkhicha, ꞌdee khadaaba yuuban fura?”

³ Iꞌdaasenyi et muꞌdane serey kijiro ommos harra sarche kijiro ommos harra iliche kajiro khadaaba furin yabuuꞌde ommos goya laka yeyin yabuuꞌd mele.

⁴ Jeenteti etoo kaldaye muꞌdane khadaaba furo ommos goya yeyo liiꞌhelin u, an weyti ooye.

⁵ ꞌDeerka ewweenkaas kichekoo wihi us ani iyidah, “Ooyin! Yey, ki Bahassihi yaaf Yuuda layadeehe, Hiiy karnati Dawuud layadeehe, walah dakkhan a sooriche. Usu muꞌdane hanjayyohaas teebee bukkhicha, khadaabaas furin yabuuꞌd.”

⁶ ꞌDeerka komborti Waakhe antoot orche ka Heleenki wahanyeyyohi affarenye lasoouume rubey khabo ichoow ewweenki tomon lamma ichoow affare ba khaaricheen arge. Heleenka ki lasoorriyooche iyoogyahe. Ulla gaas teeba ichoow il teeba khaba. Indoha teebee la, a rubeyohi Waakhe teebeenye harra tuumman liierge.

⁷ Ulla yimiyye, khadaabi dahanti miigeete eti komborti antoot kafiddiyo kakhaate.

⁸ Chuꞌus khaate ka, wahanyeyyohi affarenye lasoouume rubey khabo ichoow ewweenki tomon lamma ichoow affare ba Heleem ortiis ka il guꞌddeen. Kooba la reenkoo ꞌhaab layadeehe chirri geeyo ladowo laguꞌddo ichoow baakhuuli ꞌdahabe uyuuggi lagubo kajiro iche khaba. Uyuugga la weysihi ꞌdooꞌdi Waakhe itoolla.

⁹ Icho la geeyoo husub doween, “Ati muꞌdane khadaabaas khaatta, hanjayyohaas bukkhissa. Iꞌdi tahe goorat a lakisoorriyooche, diiggaah ka la weeli enenyete yaafo tuummane ichoow afaf tuummane ichoow filal tuummane ichoow ilal tuummamba Waakh a igatte.

¹⁰ At la icho karnato ichoow kuhaaniyyohi usu harra leedakhti toro la Waakkhi Aabbaheene ihilo kayeesse, icho la berri harra a dakhtaan.”

¹¹ An la yeye, hooyi herti Waakhe ittaaw ka ekkees liiubaaꞌdan daage. Herta Waakhe ittaawe la komborti antoot ichoow wihi lasoouume rubey khabo affare ichoow ewweenki tomon lamma ichoow affare khaarisse.

¹² Herta Waakhe ittaawe la hooyi buure ka wihi iche dowatti, “Heleenki goorat lasoorriyooche, miig ichoow kamurroon ichoow khara ichoow anto ichoow inkaanyit ichoow saaꞌdo ꞌhelin a muꞌdayyahe.”

¹³ ꞌDeerka wihi lasoouume serey kajiro ichoow wihi harra sarche kijiro ichoow wihi harra iliche kajiro ichoow wihi beyohi burbuure goya kijiro tuumman la ichohi waha dowti daage, “Waakkheenki komborti antoot kafiddiyo ichoow Heleem ba, a lasaaꞌdo, a liinkaanyito, a laweynaacho, miig ticho a titaahe jirtuu tuummamba.”

¹⁴ Wahanyeyyohi affarenye lasoouume rubey khabo la, “Aamiin,” yidaaheene, ewweenki tomon lamma ichoow affare la il guꞌdde Waakh ichoow Heleem ba wahte.