Bakkaahit 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Af furnaan

¹ Waha a wori Yeesso Kiriisto miinsane ani liisoobabbakkaahiche. Waakh Yeesso Kiriisto waha a siiche, ꞌdee falfayyohiis wihi dowwanoha ka sooyateeh tusa. Kiriisto la hertiistoo Waakhe ilbooyiiski Yoohana layadeeh isooerge, wora icheeke.

² Yoohana la wihi us arge tuummane cheeke. Yeedi Waakh ichoow runti Yeesso Kiriisto usu tuse iche chiire.

³ Waakh eti buugga eti Waákh íyeyyeedo chiire soomo a imaala. Toro la Waakh ꞌdooꞌdi wahaas daago toro wihi buugga goya kachiiran raaho a imaala. Iꞌdi tahe ibeenki waha yateehiin, a soodowwaate.

Wor Kiriistoki ururre Kiriistoti teebee miinsan

⁴ Buugga eti atin isoochiiro a Yoohana. Ururre Kiriistoti an ichiiro la a ti teebeenye ili Aassiya kijirto. Waakkhi toolla jiro, goorat laka jire, toro jirtuu tuumman soojiro, ichoow rubeyohi teebeenye kombortiisti antoot ortiis kijiro ba atin imaalaane nebey atin kakaalaan.

⁵ Toro la Yeesso Kiriistohi runti Waakh ka garti lakakhuufo laabo, eti kolooraate omoot kasookaheenye, toro weynaanti harrata dakkhan anti ba atin imaala, nebey atin kakaala. Yeesso Kiriisto a inno ꞌdoona toro la diiggiis ka uskeel a inno kasoofure.

⁶ Toro la karnat ichoow kuhaaniyyohi usu harra leedakhti toro la Waakkhi Aabbahiise ihilo inno kayeele. Us ba lakoolicha, miigtiis la laarga jirtuu tuummamba. Aamiin.

⁷ Yeya, Yeesso mirise leeyamiite, weeli enenyet tuumman usu a arga, ꞌdooꞌdi goorat usú ꞌhune laka usu a arga. Jeentetiis u yaafohi harra tuumman a ooyaan. Iꞌdaas la a titaahe giꞌde! Aamiin.

⁸ “Ani Uumaccheenye toro ani on ꞌDaꞌddabee. An goorat tuumman a jire, toolla la a jira, toro la a soojira, a Waakkhi Miig Tuumman leh,” iche Kamuri Waakhe essa.

Yeesso Yoohana fooltabcho ka isoobaha

⁹ Ani a Yoohanahi iꞌdiin u ani ichoow Kiriisto wohoo kalday nahe. Sina inno loomhicha. Inno a garrahsanna. Inno tuumman la dakhi Waakh a iskaleejirra. Wahaas dakkhan a isleegisanna. ꞌDeerka jeenteti an Yeedi Waakh ichoow runti Yeesso miinsan icheeko, iche kurti bey goya kijirto Baatimos layadeeh liigeeche.

¹⁰ Ibeenki Kamur ka Rubeyti Waakh iwoyte, ꞌdubeey ka hooyoo buurenye iꞌdi arabi laafuufee daage.

¹¹ Hooyaas la wihi us yidah, “Wihi at sooagarto khadaaboo layuubo kachiire, ururre Kiriistoti ilkerengeetohi teebee kijirto iereg. Ururreta teebee la a ururi Efeesso ichoow ki Simiriina ichoow ki Bergamum ichoow ki ꞌDiyaaꞌdira ichoow ki Sardi ichoow ki Filadeelfiya ichoow ki Lawodeechiya.”

¹² An la urgiye, eti ileeyyeedo yowde. Chaꞌan urgiye ka, reemassi taa lakorcho ꞌdahab lakahaaggiche teeba arge.

¹³ Reemassa dahcho ka, etoo “Ínam Aadam iyooge,” toolla. Eta la kabuuꞌdoo deere ꞌdaꞌddabbe eleelo khaba, kacchiis ka la saabi ꞌdahabe khaba.

¹⁴ Matakkiis ichoow tintiis a waha dakhane iꞌdi yooleetenye, indohiis la a iꞌdi ꞌdabi weyti bolkho.

¹⁵ Luhlohiis la weyti bildiikhaane, iꞌdi birtoo boorane lasiguu a ankhadaane, hooyiis la a iꞌdi ꞌduleyi weyti buure.

¹⁶ Dahantiisti miigeet ka bakkaal teeba khuccha, afiis la birlabi af lehe leeyimiy. Fooliis la a iꞌdi banayhi orrahti maalimeete weyti bildiikhto.

¹⁷ Chirri an usu arge ka, an iꞌdi eti yumuy u, ortiis kasoodihe. Ulla dahantiisti miigeet ikorche, wihi us iyidah, “Roorro akhabin. Ani Oreyenye toro ani Salaahime.

¹⁸ An a Ki Jiro Leh. Ani a umuyye, yeya jirtuu tuumman la a jira. Ani omoot anto a kakhaba, toro fureyyohi meessi ꞌdooꞌdi tuume kijiro a khaba.

¹⁹ “Maantaka, wihi at agarte, wihi toolla jiro ichoow wihi sooyateeh chiir.

²⁰ Wihi dagsane at agarte, bakkaalleti teebeenye an dahanti miigeet kakhuccho ichoow reemassi ꞌdahabe teebeenye taa lakorcho miinsan kallaayo. Bakkaalleti teebee, herti Waakhe ururre Kiriistoti ilkerengeetohi teebee iche itoollaan. Reemassi teebeenye taa lakorcho la, ururreti teebeenye kooba ururoo itoolla.”