2 Timooti 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Waakh ichoow Yeesso Kiriistohi Kamureenenye maanti us soonokhti dakhiis chuukho toro ꞌdooꞌdi tuume ichoow ki jiro ba hukkumo, orcho ka wihi an kiadeeh kallaayo.

² Tab giꞌde tannabo Yeedi Waakh kolal dakkhan ꞌdooꞌd icheek. ꞌDooꞌd saggi us uskeel iyeele icheeke, leejaakh, toro uur miigooy. Geeddi at waha yeesso la weyti samacchaare, mujjum la enenyet walah abi.

³ A mehe ibeen a yamiit ki enenyet wori Waakhe laabcho nabah isudiwwaayo. Wihi icho imoonaan on yeelaan. Jeentetuu la, ꞌdooꞌdi buurenye wihi beenaat enenyet abcho wihi dogticho ꞌdoonto idowo, iche urursataan.

⁴ Icho la yeedi rummaat adah a kakhabtaane, hawweesseti beenaat nabah isudaan.

⁵ Iꞌdaasenyi at tabe walah tuumman ka isjeyiche, sinabaaw kisoobahte ka la garrahso. Hili eti Wori Haaggan taaꞌhicho haaggiche, hili Waakh kikorche tuumman buuhi.

⁶ Iꞌdi tahe ani ka jiroteey a labahcha, iꞌdi sadakhati Waakh liikokkoddichuu. Ibeenki Waakh ikhaato la a yitah.

⁷ Dihoti an kijire mujjume kijire, oriisihi an kijire la a massiche, wori Kiriisto miinsan la mujjume kakhuufe.

⁸ Toolla ꞌduubi eti enenyet sooricho ꞌhelo a isuga jeenteti an Waakh kalday on ikajiruu. Kamuri fissane enenyet mujjum hukkumo, ꞌduuba ibeenki us soonokhti a isiicha. Ani kalday ꞌduuba ma ꞌhelo, iꞌdaasenyi ꞌdooꞌdi tuummane emeettiis imoono laka a ꞌhela.

Baawulo Timooti saggi keley liikatabe icheeka

⁹ Geeddi at tabuuꞌd hol dowe, dowwa isooeleel.

¹⁰ Iꞌdi tahe Deema jeenteti us wahanyeyyohi harrata ikalooꞌduu adah a ikakhabte, ilkerengeetti ꞌDessaloonika irte. Kireeske la boroofenhi Galaatiya irte, Tiito la boroofenhi Dalmaatiya irte.

¹¹ Luuka kaldaye toolla ileejira. Maanti at tamiit Marko sookhaate issooraaha, a mehe us hili Waakh ka gargaari buurenye ikhaba.

¹² Tuuchiko la ilkerengeetti Efeesso a ierge.

¹³ Maanti at tamiit kabuuꞌdeeyki ilkerengeetti Tuurowa ka an min Kaarbu kasootabe sookhaat. Khadaabbeteeyti layuubo ikeen, kach ka la wihi uktohi hoolaat lakahaaggiche ikeen.

¹⁴ Eti tumaaleete Alekisaanda layadeeh suujoonki buurenye iyeele. Kamur jeenteti wihi us iyeeluu usu a hukkuma.

¹⁵ Atin laka etaas yuubsada. A mehe us Yeedi Waakhe inno cheekno weyti tirrime.

¹⁶ Maanti oraate kootiin ka liihukkume et igargaare mele. Enenyet adah a ikakhabte. Kamur ba waha icho iyeeleen ikakuta.

¹⁷ Iꞌdaasenyi Kamur a ileejire, miig isiiche, ꞌdee anna farniin tuum cheeka, ꞌdee yaafohi Waakh igaran tuumman daagaan. Ulla kootiinki Rooma ka omoot a ikaribe.

¹⁸ Kamur suujoon tuumman a ikariba ichoowka nebey goobiiski saraate us dakhti igeecha. Us ba jirtuu tuummamba lasaaꞌda. Aamiin.

Bariitoti ꞌdaꞌddaboot

¹⁹ Bariitoteey Birisiila ichoow Akiila ichoow min Oneesiferas ba eleeli.

²⁰ Eraasta ilkerengeetti Koriinto kaꞌhade, Turofiimo la jeenteti us ikhannanyahuu ilkerengeetti Mileeto kasootabe.

²¹ Geeddi at tabuuꞌd hol dowe, geeddi il iroffowin inta sooeleel. Yuubolo ichoow Buunten ichoow Liino ichoow Kilaawudiya ichoow ꞌdooꞌdi addane tuummane Kiriisto rummeeste a atin soobariitiche.

²² Kamur ba rubeyohiin leejira. Waakh ba atin imaala.