2 Timooti 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo Timooti Kiriisto tuum isisoobihi iyadeeh

¹ Maantaka weelaaw, haaggi Waakhe buurenye Yeesso Kiriisto lakaꞌhelo ka miig khab.

² Wahanyeyyohi at ikadaagte an ꞌdooꞌdi ittaawenye garteey laabo ortiis ka idah la, ꞌdooꞌdi lakakhuufo ꞌdee ꞌdooꞌdi addan abin yabuuꞌd kori.

³ At laka iꞌdi eti iskar Yeesso Kiriisteenye haaggan u sinayyohi lakoomhicho ka garrahso.

⁴ Eti iskarenye diho kajiro hilassoo addane ballaaddan ma gelo. Usuhi eti iskareete usu iween kahamaadicho ꞌdoonaa.

⁵ Iꞌdaasu la chiꞌ etoo oriisi ka ꞌdooꞌdi addan iskabahsataan, ꞌduubi eti oraat ꞌhelo ma ꞌhelo sammata us amurreti oriisi tuumman iraahin.

⁶ Toro la eti gos khabo hol dowo, eti oraate gurnaanki gos yaham a eheetti.

⁷ Wahanyeyyoha an kidowo kamalo. A mehe Kamur wahanyeyyohaas tuumman a kisoobabbakkaahicha abatta.

⁸ Saggi Yeesso Kiriistohi hiiy Dawuude omoot liikasookahche akadabin. Wori Haaggane an cheeko a kaas.

⁹ Jeenteti an icheekuu la sina a ikawaarta, iꞌdi eti wohoo uskul yeeluu a hidanahe. Iꞌdaasenyi Yeedi Waakh ma hidan.

¹⁰ Maantaka jeenteti ꞌdooꞌdi Waakh soobahsatuu an walah tuumman a igarrahsada, ꞌdee icho laka ribnaan ichoow weynaanti jirtuu imassanne Yeesso Kiriisto lakaꞌhelo ꞌhelaan.

¹¹ Yeeda iꞌda yadeeh a lakakhuufa, Chiꞌinno usu leenamuut, usu a leejirra.

¹² Chiꞌinno garrahsanni, usu walah a leedakhanna. Chiꞌinno usu ꞌdiiꞌdne, ullaka a inno ꞌdiiꞌda.

¹³ Chiꞌinno usu raahin ꞌdiiꞌdne, usu uliba a eti lakakhuufo on. A mehe us isꞌdiiꞌdin ma yabuuꞌd.

Eti hili Waakh ka lakakhuufo ateeh

¹⁴ Enenyet wahaas tuumman kasooꞌheꞌhheli. Waakh ortiis ka ꞌdooꞌda tootooche iicho yeedad ka isleeiriirin. Iriirti iꞌdee gargaar iche khabto mele, ꞌdooꞌdi dagansati la a baabiissa.

¹⁵ Geeddi at tabuuꞌd hol dowe eti Waakh kahamaadicho, hili us haaggicho ikuuryaawine, wori rummaat mujjum cheeko ateeh.

¹⁶ Hawweesseti ꞌdalame Waakh ikahamaadin buj. A mehe hawweesseti iꞌdee enenyet on Waakh kaseehichaan.

¹⁷ Wihi icho enenyet abchaan iꞌdi jiissi bebbeyattuu, a taaꞌhaan. Reeri waha ꞌdooꞌd abcho la a Hamenaaya ichoow Fileeta.

¹⁸ Icho rum a katabeene, ꞌdooꞌdi tuume orey on omoot kasookahe essaan. Icho la ꞌdooꞌd Kiriisto gaasoo kakhuufnaanki icho Kiriisto kakhuufaan a kheeroocheen.

¹⁹ Iꞌdaasenyi ururi rummaate koo Kiriistee iꞌdi tirrinki Waakh u uliba mujjume chuukhanyahe. Wihi kachiiran la kallaayo, “Kamur ꞌdooꞌdi kiise a garta.” Wihi addane kachiiran a mehe ya, “Eti tuummane an Kamure raaha essi, uskeel a ꞌdiicho.”

²⁰ Toro la minki eti kamure ka karmohi fil ittaawenye jira. Gaasoo a wihi ꞌdahab lakahaaggiche, gaasoo laka a wihi lahaag lakahaaggiche, gaasoo laka a wihi khoꞌdoomme lakahaaggiche, gaasoo laka a wihi doobbo lakahaaggiche. Karmo gaasoo a wihi khummane, icho ibeenki daaweet on hil lakahaaggicha, gaasoo la a wihi ikhummaneynane, icho la kol dakkhan on hil lakahaaggicha.

²¹ ꞌDooꞌdi uskeeli us yeelo iskadikhe a iꞌdi karmohi khummane, lamunyaache, latannabiche hili haaggan lakahaagsati.

²² Tabe suujoonki tuummane eti nugul imoono kafirid. Hol dowe, jiroti fissan yowo, Waakh kakhuufe, ꞌdooꞌdi addan ꞌdoone, eti nebey dowo ateehe, ururi ꞌdooꞌdi uuri haaggan ka magahi Kamur waho goya kijir.

²³ Iriirti ꞌdalame khara laa goya agelin. A mehe saggi at igarattuu, wahaas jaakh on delaan.

²⁴ Eti Kamur ifalo ma jaakho, uure ꞌdabakhyahe, enenyet walah abin a yabuuꞌde, toro la garrahsi leeyahe.

²⁵ ꞌDooꞌdi usu tirrimo laka samacchaar on walah abcha, kolossoo Waakh ꞌdooꞌdaas rubeyohi uskeel kasoonokhti a siicha, runtaas rummeestaane ulla icho woya.

²⁶ Toro la matah bakkaaha, angeyi Seytaanki icho hide wihi us ꞌdoono yeelaan kasoobahaan.