2 Timooti 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo Timooti bariito ierga

¹ Eti khadaaba kisoochiiro a ani Baawulohi mali Waakh ka ergaano Yeesso Kiriistee. Waakh la iꞌdane yeele ꞌdee jiroti jirtuu imassanne us ꞌdooꞌdi icho ichoow Yeesso Kiriisto ba wohoo kalday yahiin iayyiche enenyet icheeka.

² Eti an isoochiiro la a ati Timooti. At la a iꞌdi weeleeyki an weyti ꞌdoono. Waakkhi Aabbaheene ichoow Yeesso Kiriistohi Kamureene ba kimaalaane, uur kisoonugleestaane, toro la nebey kaakaalaan.

Baawulo Timooti kakhuufnaanki us Kiriisto kakhuufo ka faajjiya

³ An Waakkhi an iꞌdi aacchinyeteey u rubeyti suujoon ikacheekan ka an ifalo kalaꞌd a ilaaba. Maalim ichoow ibeen ba la weysiheey ka ma kaadabo.

⁴ Chaꞌan saggi maanti inno seley bahne at iooyte kasooꞌhelo, anihi kaargo ꞌdee hamaadi buure ibuuhicho ꞌdoona.

⁵ An saggi at kakhuufnaanki rummaate Kiriisto lakakhuufo ikhabto a kasooꞌhela, iꞌdi goorat inkookotaahti Looyis layadeeh ichoow abartaahti Yuunis layadeeh ijireen u. Anna a tissiba at laka a iꞌdichooda.

⁶ Jeentetaas u wihi an kaasooꞌhelcho kallaayo, tabe siinti Waakhe goytaah kijirto maanti an dahano kikorche at ꞌhesse weyti ababi.

⁷ A mehe Waakh rubeyti burꞌdee ma inno siin, iꞌdaasenyi rubeyti miig ichoow ꞌdoonin ichoow isjeyin lehe inno siiche.

⁸ Maantaka wihi atin garattaane Kamureen miinsan cheekin akuuryaawina. Ommos wihi anihi jeentetiis u jeela kajiro imiinsan cheekin akuuryaawina. Iꞌdaasenyi miigti Waakh ka sinati jeenteti inno Wori Haaggan icheeknuu inno taham ileegisma.

⁹ A mehe Waakh rubeytiissa inno ribe toro inno wahe, ꞌdooꞌdiiski munyee inno kayeele. Waha la jeenteti inno haaggoo iyeelle menye, a wihi goorat usu on gooche, toro la a jeenteti haaggiiski buurenye inno imunneynan on. Haagga Waakh la geeddi harra liisoouumin on innohi inno ichoow Yeesso Kiriisto ba wohoo kalday nahe inno lasiiche.

¹⁰ Iꞌdaasenyi Yeesso Kiriistohi ꞌDoorribeheene a yimiyye, haagga isoobabbakkaahiche. Ulla miigti omooteet a jejjebche, Wori Haaggane us cheeke ka la jiroti jirtuu imassan wihiche a inno abche.

¹¹ Waakh la Wora Haaggan ka hili Yeedi Waakh lacheeko ichoow ki ergaano ichoow ki enenyet Yeedi Waakh laabcho a ikorche.

¹² Jeentetase toolla ani sina ikawaarta. Iꞌdaasenyi ma kalakhaanyeysadi. A mehe eti an rummeesde a garda. Anna waha a tissiba, miigti us wihi an dahantiis gesse us kayaakhicho ichoowka ibeenki ꞌdaꞌddaboot yateeh a khaba.

¹³ Kakhuufnaanki at Kiriisto kakhuufto ichoow ꞌdooninti at ꞌdooꞌdi addan ꞌdoonto ka, wor Yeesso ki rummaate at ikadaagte mujjum jurkhi, a mehe ati ichoow Yeesso Kiriisto ba a wohoo kalday.

¹⁴ Miigti Rubeyti Munyeenye goyteen fiddiito kisiisso ka, wihi haaggane dahantaah lasoogesse mujjum yaakhi.

¹⁵ Saggi at igarattuu, ꞌdooꞌdi boroofenhi Aassiya kacchiis, Fiigela ichoow Hermagoon khabaani, adah a ikakhabte.

¹⁶ Kamur ba goob Oneesiferas uur isoonugleesta. A mehe us geeddi buure a ikahamaadiche. Maanti an jeela kijire laka, us uur a imiigooche toro ma ikalakhaanyeysan.

¹⁷ Rumanka maanti us ilkerengeetti Rooma soogele, meel tuummane iyeye ichoowka iꞌhele.

¹⁸ Kamur ba usu gargaara, ibeenki ꞌdaꞌddaboot Kamur usu uur isoonugleesta. Geeddi us ilkerengeetti Efeesso ka igargaare rumanka a garatta.