2 Koriinto 8 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Atin tuumman uuri haaggan ka walah diiba

¹ ꞌDooꞌd Kiriistokaaw toolla siinti haaggi Waakhe buurenye us ururre Kiriistoti boroofenhi Makedooniya kijirto siiche iche atin isoocheekin ꞌdoonna.

² Sinayyohi buurenye lakakaje, iꞌdaasenyi hamaadicho weyti buuraate, miskiinkichoki buuraate ka la icho weyti walah diibin ꞌdooneen.

³ Iꞌdi tahe wihi an arge an atin isoocheeko, icho geeddi icho yabuuꞌdiine diibeene, toro la ꞌdirihicho diibeen. Icho awtichuu a goocheene,

⁴ weyti nah hawwaasteene, ꞌdee ꞌdooꞌdi Waakhe ilkerengeetti Yaꞌhuudiya kijiro haaggi hila khumman leegismaan.

⁵ Wihi nah imurre weyti kuteen. Icho kolooraat Kamure isisoobahcheene, toro la saggi Waakh iꞌdoonuu wihi nah yeela inidah laka raaheen.

⁶ ꞌDeerka Tiitohi hilaas chilimme labaayicho sookhabte hawwaassanne, hili wihi atin diibtaan massi inidah.

⁷ Iꞌdaasenyi atin walah tuumman ka weyti orey jirtaan, iꞌdi maanta kakhuufnaanki atin Waakh kakhuuftaan ichoow Wori Haaggane atin cheektaan, ichoow runti Yeedi Waakhe atin garattaan ichoow wihi tuummane atin aw ikhabtaan. Taba hila ꞌdoonineete atin walah diibtaan ka laka orey jira giꞌde.

⁸ Amur an atin siicho mele. Iꞌdaasenyi ꞌdooninti atin ꞌdooꞌdi addan ꞌdoontaan iche rum tahe ichoow usuhuuse kaja, ꞌdee ꞌdooninti ꞌdooꞌdi addan khabo keekkaacha.

⁹ Iꞌdi tahe haaggi buurenye koo Yeesso Kiriistohi Kamureene a garattaan. Chiꞌ kamurroon tuumman kiis yahe laka, jeentetiin u miskiine yitahye, ꞌdee miskiinkiis ka kamurrowtaan.

¹⁰ Waansiheeyki ayta miinsan la weyti atin iroonyahiin. Atin ꞌdooꞌdi oraate guꞌhoo kute chilimme baayiche eheete toro la ꞌdooꞌdi oraate iꞌdaas yeelin ꞌdoone eheet.

¹¹ Toolla hila walah ladiibo massicha, ꞌdee ebba iꞌdi goorat atin hili weyti haaggan iꞌdoonteen u a buuhicho. Ebba geeddi us khabo ichoow geeddi us bahcho a israaheen.

¹² Iꞌdi tahe chiꞌ etoo wohoo bihin ꞌdoono, khaatannaanki Waakh siintaas khaatti, wihi liikhabin menye, geeddi lakhabo iche raaha.

¹³ Iꞌdi tahe ꞌdooꞌdoo mee hulees kayeginno, atin la sina atin korinno, iꞌdaasenyi innohi ekkaawno ꞌdoonna.

¹⁴ Maantá buuhiinná wihi icho laayahiin buuhichá, ꞌdee maantoo addan toro buuhichoodá wihi atin laatahiin buuhichá. Iꞌdaakka la a inno islakeekkaacha.

¹⁵ Iꞌdi liichiiruu, “Eti wihi buure soosuune walah kasooꞌhade mele, ki wohoo rucchul soosuune laka, walah kaankhate mele.”

Tiito ilkerengeetti Koriinto irta

¹⁶ Waakkhi awti an atin ikhabo uur Tiito laka goya gesse kalaꞌd ilaabno.

¹⁷ Iꞌdi tahe Tiito wihi nah daahne kalday ma khaatanne, iꞌdaasenyi usu awtiis u a gooche usuhi atin iyamiit weyti ꞌdoona.

¹⁸ Etoo addane koo Kiriistee Tiito a kasooꞌdarra. Eta a etoo ururre Kiriisto tuumman ka saggi us Wori Haaggan icheeko lasaaꞌdo.

¹⁹ Wahaas kaldach on menye, eta toro urur Kiriisto soobahche ꞌdee nah walhicha baaysiha nah leekhaata. Nah siintane mujjum woywoyna ꞌdee Kamur lakoolicha toro la saggi inno ꞌdooꞌdaas weyti gargaar iꞌdoonno laka laarga.

²⁰ Nah la iꞌdane yeelle, uus ꞌdee saggi nah baaysiha buure iwoywoyno ka uskeeloo rucchul laka nah lakacheekanne.

²¹ A mehe nah Kamur ortiis ka kalday menye, weeli enenyet ortiis ka laka samacchaare wihi haaggan yeella.

²² Toro etoo addane koo Kiriisteenye icho kaꞌdarra. Usu jitassi ittaawe ka saggi us rumanka wahanyeyyo Kiriisto uur ikakhabo a tuse. Ulla toolla jeenteti us weyti atin ikakhuufuu weyti gargaar atin ꞌdoona.

²³ Wihi Tiito miinsan la, us a wahalheeyki nah goytiin ka hil isleehaagginno. Wihi ꞌdooꞌda lammeenye koo Kiriisteenye usu sooraaho miinsan la, icho a ergattiti ururre Kiriisto, toro la Kiriisto inkaanyit ikeenaan.

²⁴ Maantaka urur Kiriisto tuumman ortiis ka reeraas ꞌdoonin rumanka tusda, ꞌdee ꞌdoonintiin ichoow wihi nah atin keeylajno rumanka a laabti.