2 Koriinto 6 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Nah a ꞌdooꞌdi Waakh hil leehaaggicho gone, a atin hawwaassanne, taba haaggi Waakhe buure wihi ilmarhaatteet iikhaatina.

² Iꞌdi tahe wihi us essi kallaayo, “Ibeenki mujjume nabah a atin isude, toro ibeenki an atin ribo a atin gargaare.” Dagansada giꞌde ibeenki mujjume a toolla, ibeenki Waakh atin ribo a maanta.

Sinayyo Baawulo

³ Uus ꞌdee hili Waakhe nah haagginno wohoo suuje lakaargine, wohoo rucchule enenyet tarraantarricho nah yeello laka ma jiraan.

⁴ Wihi nah yeello tuumman ka saggi nah rumanka ilbooyyeti Waakh inahe tusna. Saggane wahaas itusna, ꞌhool ka ichoow sinayyohi nah loomhicho ka ichoow chirri mal nah gele a garrahsanna on.

⁵ A nah lajahe, jeela nah lagesse, ururi il baabiicho nah jahe, hili weyti buure haagginne, urꞌdumme waayne, ankaane.

⁶ Jiroti eloo rucchul laka ikhabine nah jirre ka, runti Waakhe nah abanne ka, samacchaari nah eheet ka, uuri ꞌdabakhenye nah khabne ka, Rubeyti Munyeenye goyteenyo kajirto ka, ꞌdooninti rummaate nah khabne ka, saggi nah ilbooyyeti Waakh inahe a laarge.

⁷ Nah rumanka runti Waakh a cheekne, miigti Waakh la a nah leejirte. Jiroteenyoti fissan la iꞌdi birti walah lakayagiis ichoow ti walah islakajeycho eheet.

⁸ Toro la enenyet nah kooliyyeey ommos nah ꞌdarraawyeey ka ba, nah lahamayyeey ommos nah lasaayyeey ka ba, nah Waakhe ihilla. ꞌDooꞌdi ekkeysi lehe nah liiekkaacha, iꞌdaasenyi rum kalday on cheekna.

⁹ Rumanka a nah lagarta iꞌdaasenyi saggi ꞌdooꞌdi liigaranne nah liiwoywoya. Omoot laka a nah lamarma, iꞌdaasenyi uliba a jirra on. Weyti nah lajahe iꞌdaasenyi ma namuut.

¹⁰ Rubeyoheenyo a bolkhaane iꞌdaasenyi kol dakkhan a hamaana, a miskiino iꞌdaasenyi ꞌdooꞌdi buurenye kamurroonna. Walah weheenyee mele toro la walah tuumman a khabna.

¹¹ ꞌDooꞌdi Koriintooy! Nah wohoo rucchul laka ma atin kadagsanne, saggi nah weyti atin iꞌdoonno laka a atin tusne.

¹² Nah uureenyo ka ꞌdoonin ma atin karimmanni, iꞌdaasenyi atine ankiin ka nah karimmattaan.

¹³ Toolla saggi an nyaakhuteey ileeyyeedo iche atin ileeyyeeda. Taba geeddaas nah weyti atin ꞌdoonno, atin laka nah ꞌdoona.

Atin ichoow ꞌdooꞌdi Kiriisto irummeysan dahoo kalday akararanna

¹⁴ Taba atin ichoow ꞌdooꞌdi Kiriisto irummeysan dahoo kalday akararanna. Iꞌdi tahe ꞌdooꞌdi fiffissan ichoow ki hugunꞌdarri kaassohti saggoh isiwalhichaan? Toro la ꞌdooꞌdi banay kijiro ichoow ki mugꞌdi kijiro ba kulankoo kalday a isleekhabaan?

¹⁵ Ayyintoh Kiriisto ichoow Seytaan ba isikhabaan? Ommos eti Kiriisto rummeeste ichoow ki Kiriisto irummeysan mehe iskakhabaan?

¹⁶ Minki Waakhe buure ichoow iyookkoyyo saggoh isidaagaan? A mehe inno a minki Waakhe buurenye Waakkhi jiro. Iꞌdi Waakh yidah u, “An goychooda furda, goycho kaassohda. An Waakkhichooda ateehe, icho la ꞌdooꞌdaaya yateehiin.”

¹⁷ “Maantaka kaaleya goycho kasoobaha, kasoogowa, iche Kamur essa. Wihi biꞌdire aꞌdaarina, anna a atin khaaddaa.”

¹⁸ “An ooyohiinna ateehe, atin la nyaakhutaaya tateehiin,” iche Kamuri Miig Tuumman Leh essa.