2 Koriinto 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Sarti husube ꞌdooꞌdi goobi Waakh lasiicho

¹ Iꞌdi tahe wihi inno garanni, chiꞌ sarteenta harratane inno khabno iꞌdi eemee labaabiicho, goobi Waakh ka, minki jirtuu imassanne inno Waakh kaꞌhello a khabna. Minkaas la ki dahanohi enenyet haaggicheen mee.

² Geeddi inno sarta on khabno a ooyna, toro la sarti husube goobi Waakhe iꞌdi dafarti inno gessannuu imoonna.

³ A mehe maanti iꞌdaasu sarti goobi Waakh inno lakagaade, rubeyoheen sar laan ma fiddiyaan.

⁴ Iꞌdi tahe geeddi inno sarteenta harratane iꞌdi eemee on khabno a ooyna iꞌdoo hulees inno lakorchuu. Waha jeenteti innohi sarteenti harrata lakaduumicho iꞌdoonno menye, innohi sarteenti husube goobi Waakhe inno lagesso ꞌdee jiroti jirtuu imassan sarteenta tamuut chakhsatti iche ꞌdoonna.

⁵ Toolla Waakh rubeytiis waha a inno itannabiche. Ulla toro Rubeyti Munyeenye inno siiche, ꞌdee iche ka, saggi inno wihi us inno iabbire tuumman tuum rumanka iꞌhello inno tuse.

⁶ Maantaka nah kol tuumman roorro ma khabno. Wihi inno garanni a mehe ya, geeddi inno sarta harrata on khabno Kamur foga ileejirra.

⁷ A mehe jirota nah jirro jeenteti nah usu indo ikaagarro menye jeenteti kakhuufnaanki nah usu ikakhuufno iche ijirra.

⁸ Nah roorro ma khabno, nahi sarta nah lakabahcho iranni Kamur leefiddiino ꞌdoonna.

⁹ Maantaka sarta ka jiro khabneey ommos ma khabineey ka ba wihi nah ꞌdoonno tuumman, a nahi usu on kahamaadinno.

¹⁰ Iꞌdi tahe inno tuumman komborti Kiriisto enenyet kahukkumo orcheeda kasoobahna, ꞌdee ebba haag ommos suujoonki us geeddi us sartiis khabo yeele ka laguta.

¹¹ Maantaka nah Kamuri lakarooro wihiis a garanna gone, hole downa weeli enenyet hawwaassanna. Waakh wihi nah nahe khuuf on garta, toro an a khajjeela atin laka rubeyohiinki haag ichoow suujoon seley saaho ka wihi nah nahe khuuf a garattaan.

¹² Nah toro haaggeenyo ma atin isoodowdowno, jiti haaggane atin keeylajjaan on atin siinna. Iꞌda ka la jeenteti wihi uur goya kijiro menye, jeenteti wihi indo lakaarguu, atin ꞌdooꞌdaas walah ilaabin a tabuuꞌdiin.

¹³ Chiꞌ nah sirgo nahe a iroonoti Waakhe, chiꞌ nah sirgo ieheynan la a iroonotiinna.

¹⁴ Saggi Yeesso Kiriisto meessi enenyet tuumman ikayumuy a tissibna. Jeentetuu ꞌdoonin Kiriisto inno dakhatta. Inno tuumman a iꞌdoo inno tuunne, jiroti oraat ma inno dakhatti.

¹⁵ Ulla enenyet tuumman a iyumuyye ꞌdee eti tuummane jiro uus saggi us awtiis u iꞌdoono ijirine, iꞌdaasenyi saggi Kiriisto iꞌdoono a ijiro. Iꞌdi tahe Kiriisto a yumuyye Waakh la iroonotichuu usu omoot kasookahche ꞌdee icho la jiraan.

¹⁶ ꞌDeerka uus toolla kakhabatti iꞌdi ꞌdooꞌdi harratuu, enenyet saggi inno iagarro ma ikhaanno. Chiꞌinno goorat Kiriisto iꞌdoo us weeli enenyet yahuu iꞌdaas yeelle laka, kola iꞌdaas ma yeello.

¹⁷ Maantaka eti tuummane usu ichoow Kiriisto wohoo kalday yahiin a uumacchotoo husub. Jiroti raagan a kasootabe, too husube jira.

¹⁸ Waha tuumman la Waakhe yeela. Ulla Kiriisto ka weeli enenyet ankiissa keene, toro la hila Waakhe enenyet anki Waakh lakeeno inno korche.

¹⁹ Wihi an eldi a waha, Waakh Kiriisto ka ꞌdooꞌdi harrata ankiissa keene. Ulla uskeelicho ma ekkaacho. Toro la hili us nah korche a ki nah saggi usu weeli enenyet ankiis ikeeno nah cheekno.

²⁰ Maantaka nah a ꞌdooꞌdi meel Kiriisto kijiro. Waha a iꞌdoo Waakh nah ka enenyet hawwaasti. Nah la a atin hawwaassanna iroono Kiriistuu taba keennaanki Waakh ankiis atin keeno raaha.

²¹ Waakh Kiriistohi uskeeloo rucchul laka iyeeline meesseen ka eti uskeel leh kayeele, ꞌdee Kiriisto ka fissanoonki Waakh inno liiekkaacha.