2 Koriinto 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo hili ergaano dowdowa

¹ Maantaka jeenteti Waakh uurnugleeliis on u hila usu liihilo nah ikorchuu, rubeye ma nah jebto.

² Wihi dagsane lakhaanyo keeno a ꞌdiiꞌdne. Nah la enenyet ma ekkeysanni, Yeedi Waakh ma baabullo. Nah runti Yeedi Waakh on babbakkaahinna. Waakh ortiis ka, eti tuummane rubeytiis haag ichoow suujoon seley saahto, haaggi fiddiheenyo a tusna.

³ Chirri Wori Haaggane nah cheekno dagsanyahe laka, ꞌdooꞌdi bar latiro on kadagsanyahe.

⁴ Seytaanki waakkhi harratee malassi ꞌdooꞌdi Kiriisto irummeysan a hide, ꞌdee banayhi Wori Haaggan ma argaan. Banayha la a Wori Haaggane Kiriistohi weynaan leh.

⁵ Iꞌdi tahe nah kooloheenyo enenyet ma icheekno, Yeesso Kiriistohi Kamurenye cheekna. Toro la jeente Yeessuu, saggi nah ilbooyyetiin inahe cheekna.

⁶ Iꞌdi tahe Waakkhi, “Mugꞌdi goyaka banay a soobaheen,” yidah rubeytiissa banayhiis uurasseen goya kiifche, ꞌdee garanti inno ababnaanki Waakh garanni inno siicha. Ababnaankaas fool Kiriisto kasooababa.

⁷ Iꞌdaasenyi inno a iꞌdoo inno kamurroonka ꞌdiryo goya kijiro sarteen ka khabno, ꞌdee miigti miig tuumman kussan inno ma inno katamiite, Waakh katamiit.

⁸ Amam tuumman ka a nah lamarche, iꞌdaasenyi ma nah laajjebcho. Uurlammaale khabna iꞌdaasenyi ajjibaat ma khaanno.

⁹ Sina nah loomhicha, iꞌdaasenyi Waakh ma nah ꞌdiicho. Kolossoo il nah lakaguꞌdda, iꞌdaasenyi rubey ma nah lakabahcho.

¹⁰ Kol dakkhan sarteenyo ka omoot Yeesso sinna, ꞌdee jiro Yeesso laka sarteenyo ka lasoobabbakkaahicha.

¹¹ Iꞌdi tahe nahi jiro khabno kol tuumman jeente Yeessuu, ogoose nah lamarma, ꞌdee jiro Yeesso sarteenyota tamuut lakaarga.

¹² ꞌDeerka omoote a nah maranta iꞌdaasenyi atin jiro a khabtaan.

¹³ Wihi chiiran, “An Waakh a rummeesde, ꞌdeerka yeede.” Nah laka iꞌdaasu Rubeyti Waakh ka Waakh a kakhuufne ꞌdeerka Wori Haaggan a cheekna.

¹⁴ A mehe wihi nah garanni, Waakkhi Yeessohi Kamureene omoot kasookahche, inno laka Kiriisto a inno leesookahcha ꞌdee inno tuumman Waakh ortiis inno keena.

¹⁵ Sinayyoheeyka tuumman a iroonotiinna, ꞌdee haaggi Waakhe buurenye inno imunneynan ballaasta ꞌdooꞌdi buure eleela. Iꞌda ka Waakh a lakoolicha jeenteti ꞌdooꞌdi Waakh kalaꞌd ilaabo ibuuraatuu.

¹⁶ Maantaka chirri sarteenyo tamuut laka, nah yombuu yombo ma inokhanni rubeyoheenyo kol dakkhan a lamiigoocha.

¹⁷ Iꞌdi tahe sinayyohaar ꞌdabakhe a wihi geeddoor one, wihi icho keenaan la a ababnaanki weyti khummane jirtuu tuumman imassanne sinayyohaas kussan.

¹⁸ ꞌDeerka nah wihi laargo menye, wihi liiargine mujjum fiirinna. Iꞌdi tahe wihi laargo a wihi geeddoor on jiro, iꞌdaasenyi wihi liiargin a wihi jirtuu tuumman imassan.