2 Koriinto 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ ꞌDeerka ani rubeyteey a gooche ma atin iamiit. Anihi toro bolokh atin ikeeno ma ꞌdoono.

² Iꞌdi tahe chirri an atin bolkhicho, ayyo addane ꞌdee ikahamaadicha, atin tuumman la a atin bolkhichee?

³ Jeentetaase khadaabaas atin ikasoochiire, ꞌdee chaꞌan amiit atinhi kootte ikahamaadissaan toro ma ikooyissaan. An atin tuumman a atin kakhuufe, ꞌdee chaꞌan hamaado, atin tuumman laka a hamaaddaan.

⁴ Maanti an khadaabaas atin isoochiire, a bolkhe, weyti mal igele toro la ilmohi buure khube. Atin bolkhin mee ꞌdoono, ꞌdooninti buurenye an atin ikhabo, iche atinhi garattaan ꞌdoona.

Eti uskeel yeele uskeel ikakut

⁵ Chirri etoo bolokh keene, ani kalday mee ibolkhiche. Ma kokkorsadi la, us geeddoo ka atin tuummane atin bolkhiche.

⁶ Sirbiti buurtiin eta gelisse, a yaakhta.

⁷ Iꞌdaasenyi kola a atin imasse chaꞌatin etaas uskeelaas ikakuttaane, toro la uur khoboossaan uus ꞌdee oytinti buurenye us ooyo ka rubeye jebine.

⁸ Maantaka a atin hawwaasde, taba etaas saggi rumanka atin usu iꞌdoontaan toro tusa.

⁹ Khadaaba an atin isoochiire ka a atin kaja, ꞌdee usu atin wihi an yeela atin iidah tuumman yeessaan abda.

¹⁰ Chaꞌatin etoo uskeel ikakutteen, an laka a ikakute. A mehe wihi an ikakute, chiꞌ rumanka wohoo lakakuto jireen a iroonotiinna, an Kiriisto ortiis ka wahaas a ikakute.

¹¹ Anna iꞌdane yeela uus ꞌdee Seytaan inno kahataatinee. Iꞌdi tahe inno luhti Seytaan tuumman weyti garanna.

Soorinti Kiriisto ka laꞌhelo

¹² Maanti an ilkerengeetti Tuurowa imiyye an Wori Haaggane Kiriisto miinsan an cheeke, Kamur jitoo a ifure.

¹³ Iꞌdaasenyi jeenteti an eteenki koo Kiriisteenye Tiito layadeeh iꞌhelin u, weyti uur isuujowe. ꞌDeerka ꞌdooꞌd a Waakh atin bariisti iidahye, katabe, ilkerengeetti Makedooniya imiy.

¹⁴ Iꞌdaasenyi Waakkhi chirrar tuumman girꞌdaanki soorin Kiriisto ka inno woyo kalaꞌd ilaabno. Waakh nah ka wor Kiriistoki lagarti iꞌdi uyuuggi haaggan u, meel tuummane kataaꞌhicha.

¹⁵ Iꞌdi tahe jiroteen Waakh ka, a uyuug Kiriistoki haaggan. Uyuugga la ꞌdooꞌdi Waakh ribo ichoow ki baabaa kijiro ba goychooda kijira.

¹⁶ ꞌDooꞌdi baabaa kijiro ka, nah a iꞌdi suusakki enenyet bakkicho. ꞌDooꞌdi Waakh ribo ka la, nah a iꞌdi uyuuggi jiro lakeelo. Ayyo la hila keley yabuuꞌd?

¹⁷ A mehe nah iꞌdi ꞌdooꞌdi buurenye Yeedi Waakh cheeko ꞌdee chilimme kaꞌhelo mee. Iꞌdaasenyi nahi koo Kiriistee, a ergaanoti Waakh sooergate. Wori khollokkhan mee cheekno.