1 Yoohana 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Kakhuufnaanki Weeli Waakh lakakhuufo

¹ Eti tuummane saggi Yeesso Ki Lasubhe iyahe rummeesti a nyaakhuti Waakh. Eti tuummane Waakkhi Aabbaheene ꞌdoono la, nyaakhuti Waakh laka a ꞌdoona gon.

² Saggane saggi inno nyaakhuti Waakh iꞌdoonno igaranna, Waakhe ꞌdoonna toro la amurretiis raahna.

³ ꞌDooninti inno Waakh ꞌdoonno a iꞌda, amurretiissa raahna. Amurretiis la hulees mele.

⁴ A mehe ꞌdooꞌdi tuummane nyaakhuti Waakhe harrata suuje a soorichaan. Saggane harrata isoorinna, Yeesso kakhuufna.

⁵ Kamalda bal, eti harrata suuje sooricho a ayyo? A eti saggi Yeesso Weeli Waakh iyahe rummeesti kalday on.

⁶ Yeesso Kiriisto rubeytiis bicche ichoow diige kayimiy. Bicche kalday on la menye, bicche ichoow diige goya leeyimiy. Rubeyti Munyee la waha a cheekta, a mehe Rubeyti Munyee rum on cheekta.

⁷ A mehe walah seyyahtane runti saggi Yeesso iyimiyye weeli enenyet iyitah cheeka.

⁸ Waha la a Rubeyti Munyee ichoow bicche ichoow diig. Walah seyyahtaas la wohoo kalday on cheekaan.

⁹ Wihi weeli enenyet inno idowo a rummeysanna. Iꞌdaasenyi wihi Waakh inno idowo weyti kutaan. A mehe wahaas Waakh cheeke Weeliissa miinsanyahiin.

¹⁰ Eti tuummane saggi Yeesso Weeli Waakh iyahe rummeesti, wihi Waakh essi a rummeesta. Eti tuummane wihi Waakh essi irummeysan la, Waákh eti been lehe kayeele, a mehe wihi Waakh cheeke Weeliis miinsan ma rummeysan gon.

¹¹ Wihi us cheeko la kallaayo. Waakh jiroti jirtuu imassan a inno siiche, jirota la eti lakeelo a Weeliissa.

¹² Eti tuummane Weeli Waakh khabo, jirota jirtuu imassan a khaba. Eti tuummane Weeli Waakh ikhabin la jirota jirtuu imassan ma khabo.

Yeedi ꞌdaꞌddaboot

¹³ Wahanyeyyoha atinhi saggi Yeesso Weeli Waakh iyahe rummeysatteene atin isoochiira, ꞌdee saggi atin jiroti jirtuu imassan ikhabtaan garattaan.

¹⁴ Kolbaaw inno Waakh walah daahne wihi inno ubno, chirri wihi inno daahno ichoow wihi us ꞌdoono israahaan, us a inno daaga.

¹⁵ Chirri inno saggi us inno idaago garanni la, walahbaaw inno usu daahne saggi inno ikhabno a garanna.

¹⁶ Chirri etoo etiiski Kiriisto rummeeste uskeeloo omoot ikawoyin yeelo argo, etaas Waakh a iwaho, Waakh jiro a siicho. ꞌDooꞌdi uskeelicho omoot ikawoyine kaayyeeda. Uskeeli enenyet omoot iwoyo a jira. ꞌDooꞌdi uskeeli iꞌdee yeelo mee Waakh iwaha atin idowo.

¹⁷ Suujoonki enenyet yeelo tuumman a uskeel. Iꞌdaasenyi uskeel tuumman mee enenyet omoot iwoyo.

Wori khadaaba gaabi ka kaayyeedo

¹⁸ Wihi inno garanni, ꞌdooꞌdi tuummane nyaakhuti Waakhe uskeel goya ma kaassohti. Weeli Waakhe icho toorribá, Seytaanki uskeel leh icho iꞌdoor rucchul laka ma yeelo.

¹⁹ Saggi inno nyaakhuti Waakh inahe a garanna. Toro la saggi Seytaanki uskeel leh wihi tuummane Waákh tirrimo idakhti a garanna.

²⁰ Wihi inno garanni Weeli Waakh a yimiyye, miigti inno wahanyeyyohi Waakh kaabanni inno siiche, ꞌdee saggi Waakh rum iyahe abanna. Toolla la inno ichoow Waakkhi rummaat a wohoo kaldaye, inno ichoow Yeesso Kiriistohi Weeliise laka a wohoo kalday. Us a Waakkhi rummaate, toro a jiroti jirtuu imassan.

²¹ Nyaakhuteeyki an weyti ꞌdoono, taba iyookkoyyohi waakkhakh lakayeessi iskahossa.