1 Yoohana 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

ꞌDooꞌdi rubeyohoo woyaan fiiricha

¹ Aalasseeyki an weyti ꞌdoono, eti tuummane rubeytoo woyto mee rummeysattaan. Iꞌdaasenyi taba ꞌdooꞌdaas rubeyohoo woyaan fiiricha, ꞌdee wihi icho atin abchaan icho Rubeyti Waakh kayimiy fiiricha. Iꞌdi tahe ꞌdooꞌdi ittaawenye ꞌdooꞌdi Waákh íyeyyeedo iskaayyeelo harrata a itabe.

² Saggane eti Rubeyti Waakh khabo iabattaan. Eti tuummane rubeytiis woyto Yeesso Kiriisto uummanki weeli enenyete kayimiy cheeko, Waakhe kayimiy.

³ Iꞌdaasenyi eti tuummane rubeytiis woyto waha Yeesso miinsan cheekin ꞌdiiꞌdo, Waakh ma kiimaatan. Etaas ginnati eti Kiriisto igafo katamiite khaba. Atin saggi eti Kiriisto igafo iyamiit a daagteene, ulla toolla laka harrata a kijira.

⁴ Atinhi nyaakhuteeyenye an weyti ꞌdoono, atin a ki Waakhe toro ꞌdooꞌdaas a soorisseen gon. A mehe Rubeyti Munyeenye goytiin kijirto, Seytaanki harrata kijiro a kussantahe.

⁵ ꞌDooꞌdaas beenaate Waákh íyeyyeedo a ki harrata suujenye, maantaka wori harrata kayimiy on cheekaane, ꞌdooꞌdi harrata la icho nabah a isuda.

⁶ Inno a ki Waakhe eti tuummane Waákh garti la wihi inno ꞌdooꞌd abinno a raaha. Iꞌdaasenyi eti Waakh ikiimaatan ma inno daago. Saggane eti Rubeyti Waakh khabo ichoow ki rubeyti beenaate Seytaan khabo seley ibihinna.

ꞌDooninti Waakh enenyet ꞌdoono

⁷ Aalasseeyki an weyti ꞌdoono, ꞌdoonine Waakhe katamiit gone, taba giꞌde a isꞌdoonno. ꞌDooꞌdi tuummane ꞌdooꞌdi addan ꞌdoono la a nyaakhuti Waakhe toro la Waakh a gartaan.

⁸ Eti tuummane enenyet iꞌdoonin, Waakh ma garti, a mehe Waakh wihi us yeelo tuumman ꞌdoonintiissa kayeela.

⁹ Waakh saggane ꞌdoonintiis inno ituse, Weeliiski kaldaye harrata isooerge, ꞌdee Weeliiska ka jirra.

¹⁰ ꞌDoonine talla, inno mee Waakh ꞌdoonne, iꞌdaasenyi usu inno ꞌdoone toro Weeliis sooerge, soorriyotiis ka, holi Waakhe uskeeleen keeno bahcha.

¹¹ Aalasseeyki an weyti ꞌdoono, Waakh weyti a inno ꞌdoone gone, taba giꞌde inno laka a isꞌdoonno.

¹² Et injire Waákh arge mele. Iꞌdaasenyi chirri inno isꞌdoonno, Waakh goyteen a fiddiya, ꞌdoonintiis la goyteen ka tuume tateeh.

¹³ Saggi inno goytiis ikijirro ulla goyteen ikijiro a garanna, a mehe us Rubeytiisti Munyee a inno siiche.

¹⁴ Inno saggi Waakkhi Aabbaheene Weeliis isooerge, ꞌdee us ꞌDoorribehi ꞌdooꞌdi harrata iyateeh a agarre, toro la a cheekna.

¹⁵ Eti tuummane saggi Yeesso Weeli Waakh iyahe cheeko, Waakh goytiissa fiddiya ulla Waakh goytiis fiddiya.

¹⁶ ꞌDooninti Waakh inno ꞌdoono a garanna, toro la ꞌdoonintaas a kakhuufna. Waakh wihi us yeelo tuumman ꞌdoonintiissa kayeela. Eti tuummane Waakh ichoow ꞌdooꞌdi addan ꞌdoono, Waakh goytiissa fiddiya, ulla Waakh goytiissa fiddiya.

¹⁷ Iꞌda ka ꞌdooninti inno isꞌdoonno tuume tateehe, ꞌdee ibeenki enenyet lahukkumo ka, roorro inno khabno mele. Iꞌdi tahe harrata ka inno a iꞌdiissa.

¹⁸ ꞌDooninti Waakh roorro mele. Iꞌdaasenyi ꞌdoonintiisti tuume roorro goyteen a kabihissa. Iꞌdi tahe roorro wihi keeno, saggi Waakh weeli enenyet sirbi igesso iche luuloota. Eti roorro khabo ꞌdoonin ka tuum ma lakayeelin.

¹⁹ Inno Waakh ichoow ꞌdooꞌdi addan a ꞌdoonna, a mehe Waakhe kolooraat inno ꞌdoonee.

²⁰ Chiꞌ etoo, “An Waakh a ꞌdoona,” essi, iꞌdaasenyi etoo addane koo Kiriistee nihib, etaas beene leeyahe. Iꞌdi tahe eti tuummane etoo koo Kiriisteenye us arge iꞌdoonin, Waakkhi us iargin ꞌdoonin ma yabuuꞌd.

²¹ Amuri Waakh rubeytiis inno siiche mehe yadeeh ya, eti tuummane Waakh ꞌdoono, eti tuummane koo Kiriistee laka a ꞌdoono.