1 Yoohana 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Taba saggi nyaakhuti Waakh ijiro ijira

¹ ꞌDooninti Waakkhi Aabbaheene inno ꞌdoono eenna a buure. Waakh rubeytiis laka nyaakhutiissa inno yadeeh! Rumanka la inno a nyaakhuti Waakh! Maantaka ꞌdooꞌdi harrata ma inno garti, a mehe icho Waakkhi Aabbaheene ma gartaane.

² Aalasseeyki an weyti ꞌdoono, inno toolla a nyaakhuti Waakh. Wihi berri inno nateeh la ma inno latusin. Iꞌdaasenyi wihi inno garanni, maanti Kiriisto soobaho inno laka iꞌdiissa nateeh, a mehe maantaas iꞌdi rumanka us yahe a agarra.

³ Eti tuummane khajjeela khabo miꞌdabe iskayeela, saggi Kiriisto rubeytiis miꞌdab iyahuu.

⁴ Eti tuummane uskeel yeelo, amuri Waakhe jebcha. Rumanka uskeel a hugunꞌdarri.

⁵ Iꞌdaasenyi saggi Yeesso iyimiyye ꞌdee uskeeleen inno ikabahcho a garattaan. Ulla uskeeloo rucchul laka ma yeelin.

⁶ Et Kiriisto goytiis kijiro uskeel goya kaassohti mele. Et uskeel goya kaassohti, Kiriisto arge ommos garti mele.

⁷ Nyaakhuteeyki an weyti ꞌdoono, uus etoo kalday laka jit atin bujin. Eti wihi fissan yeelo a fissanyahe, saggi Kiriisto ifissanyahuu.

⁸ Eti tuummane uskeel yeelo a ki Seytaan, a mehe Seytaan uus uumaccho ka us uskeel on yeela. Weeli Waakh a yimiyye ꞌdee hili Seytaan baabiicha.

⁹ Etoo kaldaye nyaakhuti Waakhenye uskeel goya kaassohti mele. Us jiroti Waakhe husube jira, uskeel goya kaassohan ma yabuuꞌd, a mehe us a nyaakhuti Waakh kichokoo.

¹⁰ Saggane nyaakhuti Waakh ichoow nyaakhuti Seytaan seley ibihinna. Eti tuummane wihi fissan iyeelin, ki Waakh mee. Eti tuummane etiiski Kiriisto rummeeste iꞌdoonin laka ki Waakh mee.

Nyaakhuti Waakh a isꞌdoona

¹¹ Waha a farniinki atin uus uumaccho ka atin daagteene, taba a isꞌdoonno.

¹² Iꞌdi Kaayinhi koo Seytaanki uskeel lehe walaaliis dubunuunu yigis iitaahana. Kamalda bal, us a iꞌdoh walaaliis dubunuunu iyigis? A jeenteti jiro Kaayin suuj itahe, too walaaliis la ifissantahe.

¹³ ꞌDooꞌdeeyki Kiriisto rummeeste, chirri ꞌdooꞌdi harrata atin nibhaate agirmeysanna.

¹⁴ Saggi inno omoot iꞌdallaabsanne inno jiroti jirtuu imassan ikhabno a garanna, a mehe inno ꞌdooꞌdi Kiriisto rummeeste a ꞌdoonna. Eti etoo koo Kiriistee iꞌdoonin la, omoot goya fiddiya.

¹⁵ Eti tuummane etiiski Kiriisto rummeeste nihib, a iꞌdoo us dubunuunu diig gele. Wihi atin garattaan la, et dubunuunu diig gele jiroti jirtuu imassan ꞌhelo mele.

¹⁶ Saggane wihi ꞌdoonine tahe igaranna. Yeesso Kiriisto jirotiis a inno isoobahche. Inno laka innohi ꞌdooꞌdeenki Kiriisto rummeeste jiroteen ibihinno laꞌdoona.

¹⁷ Chirri etoo hoolahi harrata khabo etoo addane koo Kiriisteenye walah laa argo iꞌdaasenyi etaas uur ikasoonugleysan, ꞌdooninti Waakh saggoh goytiis ikijirta?

¹⁸ Nyaakhuteeyki an weyti ꞌdoono, uus inno yeed ommos af on ka ꞌdooꞌdi addan ꞌdoonine, wihi inno yeello ichoow wihi rummaat ka ꞌdoonno.

¹⁹ Saggane ꞌdeerka rumanka saggi inno ꞌdooꞌdi Waakh inahe iabanna, toro la Waakh ortiis ka uurasseen nebey iꞌhelaan.

²⁰ A mehe chirri uurasseen uskeel inno igoochaan laka, Waakh uurasseen a kaweenyahe, ulla walah us igaran mala.

²¹ Aalasseeyki an weyti ꞌdoono, chirri uurasseen uskeel inno ikagoon, Waakh ortiis ka roorro inno khabno mele gon.

²² Waakh la walahbaaw inno daahne ka a inno siicha. A mehe inno amurretiis a raahna, toro la jiroti usu kahamaadisso jirra.

²³ Amuri Waakh inno siiche kalla, Yeesso Kiriistohi Weeliise rummeesda, toro la saggi us amur inno isiichuu, isꞌdoona.

²⁴ ꞌDooꞌdi tuummane amurretiis raaho, Waakhe leefiddiya Waakh la icho leefiddiya. Rubeyti Munyeenye Waakh inno siiche ka la, saggi us inno ileefiddiyo a garanna.