1 Yoohana 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Nyaakhuteeyki an weyti ꞌdoono, waansihane atin isoochiira, uus ꞌdee atin uskeel yeeline. Iꞌdaasenyi chiꞌ etoo goytiin ka uskeeloo yeelo, eti meesseen ka Aabbaheen hawwaasti a khabna. Eta la a Yeesso Kiriistohi Fissan.

² Usu goorat lasoorriyooche, ꞌdee holi Waakhe uskeeleen keeno bahcha. Jeenteti soorriyotiis u la, Waakh uskeeleen kalday ma bahcho, iꞌdaasenyi uskeeli weeli enenyet tuummane bahcha.

Eti rumanka Waakh garti, wihi Waakh ꞌdoono yeela

³ Chirri inno amurretiis raahno, saggi inno rumanka eti Waakh yahe iabanne a garanna.

⁴ Eti tuummane, “An eti Waakh rumanka yahe a garda,” essi, iꞌdaasenyi amurreti Waakh iraahin beene gooche, toro la runti Waakh goytiis ma kijirto.

⁵ Iꞌdaasenyi eti tuummane Yeedi Waakh raaho, ꞌdooninti Waakh rumanka tuume goytiis kijirta. Saggane saggi inno ichoow Waakh ba wohoo kalday inahe igaranna.

⁶ Eti tuummane Waakh goytiissa kijira essi, jiroti Yeesso jire iche jira.

⁷ Aalasseeyki an weyti ꞌdoono, amura an atin isoochiiro, koo husub menye, a ki raagane atin uus uumaccho ka atin khabteen on. Amura raagane, “Taba, isꞌdoona,” essi, a farniinki atin daagteen on.

⁸ Eheet a, amuroo husube atin isoochiira. Runtiis goytiis ichoow goytiinna lakaarga. A mehe banayhi rummaat a bildiikhaane, mugꞌdi la baaba.

⁹ Eti tuummane banay goya kaassohta essi, iꞌdaasenyi etiiskoo Kiriisto rummeeste nihib, uliba mugꞌdi goya kajira.

¹⁰ Eti tuummane etiiskoo Kiriisto rummeeste ꞌdoono la, banay goya kijira, wohoo rucchule goytiis ka tarraantarricho ma jiraan.

¹¹ Iꞌdaasenyi, eti tuummane etiiskoo Kiriisto rummeeste nihib, iꞌdi eti indo laa u mugꞌdi goya kasohta. Inti us isohti ma garti, a mehe uskeel iꞌdi mugꞌduu indo a ꞌduuꞌde.

¹² Nyaakhuteeyki an weyti ꞌdoono, waansihane atin isoochiira, a mehe jeenteti magah Yeessuu, Waakh uskeeliin a atin ikakute.

¹³ Atinhi ooyenyee, waansihane atin isoochiira, a mehe atin ki geeddi harra liisoouumin laka jire a garatteen. Atinhi nunnugul, waansihane atin isoochiira, a mehe atin Seytaanki uskeel leh a soorisseen. Nyaakhuteeyki an weyti ꞌdoono, waansihaase atin isoochiira, a mehe atin Waakkhi Aabbaheene a garatteen.

¹⁴ Atinhi ooyenyee, waansihaase atin isoochiira, a mehe atin ki geeddi harra liisoouumin laka jire a garatteen. Atinhi nunnugul, waansihaase atin isoochiira, a mehe atin a tihe, Yeedi Waakh la goytiinna kijira, toro la Seytaanki uskeel leh a soorisseen.

Eti rumanka Waakh garti, wihi harrata ma ꞌdoono

¹⁵ Taba harrata suuje ichoow wahanyeyyohi harratane sussuuje aꞌdoonina. Eti tuummane wahanyeyyohi harratane sussuuje ꞌdoono, ꞌdooninti Aabbaheen goytiis ma kijirto.

¹⁶ A mehe wahanyeyyohi harrata a iꞌdi maanta wihi ꞌdooꞌd uurassicho goya kijiro uskeel imoono ichoow ꞌdooꞌdi wihi us argo tuumman iildeerroti ichoow ꞌdooꞌdi wihi us khabo ichoow wihi us yeelo keeylajo. Suujoonka tuumman Waakkhi Aabbaheene ma kayamiite, wihi keeno a wahanyeyyohi harratane laꞌdoono.

¹⁷ Harrata suuje ichoow suujoonkicheki liimoono a kutaane, iꞌdaasenyi eti wihi Waakh ꞌdoono yeelo, jirtuu tuumman a jira.

Runti Waakh khuccha

¹⁸ Nyaakhuteeyki an weyti ꞌdoono, waha a ibeenneti ꞌdaꞌddaboot. Saggi goorat atin idaagteen u la, eti Kiriisto igafo a yamiit. Toolla laka ꞌdooꞌdi ittaawenye Kiriisto igafo a yimiy. Iꞌda ka la saggi waha ibeenneti ꞌdaꞌddaboot iyahiin a garanna.

¹⁹ ꞌDooꞌda goyteenna kabahe iꞌdaasenyi rumanka keen ma eheynan. A mehe chiꞌ rumanka goorat icho keen yahiin, a inno leefiddiyaan. Iꞌdaasenyi katabinti icho inno katabeen, saggi koo kalday laka keen ieheynane tusa.

²⁰ Iꞌdaasenyi Kiriistohi Munyee Rubeyti Munyee ka a atin subhe, atin tuumman la runti Waakh a garattaan.

²¹ Jeenteti atin runtaas igaran mee khadaaba atin ikasoochiiro, a jeenteti atin igarattaan ichoow jeenteti beentoo rucchul laka rum ikiimaatan.

²² Kamalda bal, eti been leh a ayyee? Eti been leh a eti saggi Yeesso Ki Lasubhe iyahe ꞌdiiꞌdo. Eti iꞌdee a eti Kiriisto igafo. Us Waakkhi Aabbaheene ichoow Weeli Waakh ba a ꞌdiiꞌddanyahe.

²³ Eti tuummane Weeli Waakh ꞌdiiꞌdo, Aabbaheen ma khabo. Eti saggi Yeesso Weeli Waakh iyahe cheeko tuumman la, Aabbaheen laka a khaba.

²⁴ Maantaka, taba giꞌde wori atin uus uumaccho ka atin daagteen goytiin a fiddiyo. Chirri woraas goytiin fiddiyo, atin laka Weeli Waakh ichoow Waakkhi Aabbaheene goychooda fiddiitaan.

²⁵ Waha la a wihi Kiriisto inno iayyiche, a jiroti jirtuu imassanne inno ꞌhello.

²⁶ Wahanyeyyoha an atin isoochiiro, ꞌdooꞌdi jit atin bujin ꞌdoono miinsanyahiin.

²⁷ Atin ka la, Kiriisto Rubeyti Munyee ka a atin subhe. Subahnaanka us atin subhe la goytiinna fiddiya. Maantaka etoo addane wihi rummaat atin abcho ma ꞌdoontaan. Iꞌdaasenyi Rubeyti Munyee walah tuumman a atin abissa, wihi iche atin abisso la been menye, a rum. Maantaka iꞌdi Rubeyti Munyee atin iabissuu, taba giꞌde Kiriisto goytiis fiddiya.

²⁸ Maantaka nyaakhuteeyki an weyti ꞌdoono, taba Kiriisto goytiis fiddiya, ꞌdee maanti us soobaho ka, uus inno roorro khabine toro la uryaawin emeettiis ka.

²⁹ Chaꞌatin saggi Kiriisto ifissanyahe garattaan, saggi ꞌdooꞌdi tuummane wihi fissan yeelo nyaakhuti Waakh iyahe a garattaan.