1 Yoohana 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeedi jiro lakeelo

¹ Eti nah woriis atin isoochiirro, a ki goorat geeddi wohoo rucchul laka liisoouumin jire. Nah usu a daagne, indoheenyo ka la a agarre, ꞌdeyꞌdoonne, toro la dahanoheenyo ka laka usu a ꞌdaarre. Eta Yeedi jiree iche woriis cheekna.

² Eta la a nah isoobahe, nah usu a agarre, runti usu miinsane cheekna. Toro la eta jiroti jirtuu imassan khabo, goorat Aabbahiis leejire nah isoobahe iche atin isoocheekna.

³ Wihi nah agarre toro nah daagne, iche atin isoocheekna, ꞌdee atin ichoow nah ba kulankoo kalday khabna. Toro la Waakkhi Aabbaheene ichoow Yeesso Kiriistohi Weeliise kulankoo kaldaye leekhabna.

⁴ Wahane atin isoochiirra, ꞌdee hamaadeenyo tuum kayeella.

Jiroti Waakh kahamaado jira

⁵ Farniinki nah Weeli Waakh kadaagne nah atin isoocheekno kalla, Waakh a banaye, mugꞌdihoo rucchul laka goytiis ma kijiro.

⁶ Chirri inno ichoow Waakh ba kulankoo kaldaye khabna elanni eheet a, mugꞌdi goya kaassohanni, inno beene goonna runti Waakh la ma jirro.

⁷ Iꞌdaasenyi chirri inno banay goya kaassohanni saggi us banay goya ikajiruu, inno tuumman kulankoo kaldaye khabna, diig Yeessohi Weeli Waakhe la uskeeleen tuumman a inno kadikha.

⁸ Chirri inno uskeel ma khabno elanni, inno a isekkeysanna, runti Waakh la goyteen ma kijirto.

⁹ Chirri inno uskeeleen Waakh icheekanne, usu a lakakhuufa toro wihi rummaat on yeela, uskeeleen a inno ikakuta toro la khollookh tuumman inno kadikha.

¹⁰ Chirri inno uskeel ma yeelin elanni, inno Waakh eti been lehe kayeella, toro la yeediis iꞌdaaru laka ma raahno.