1 Timooti 6 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Wihi Timooti bowꞌdayyo abcho

¹ Eti tuummane huleesi bowꞌda siꞌdo Yeesso rummeeste, kamuriis rumanka a inkaanyito, uus ꞌdee Waakh ichoow woriiski enenyet laabcho liigafine.

² Bowꞌdayyohi kamurreticho Kiriisto rummeysatti, iiche kamurreticho ꞌdarraawin jeenteti icho dakkhan Kiriisto irummeesteen u. Orey a raaheene a ihileen, a mehe ꞌdooꞌdi hilicho ka indigir ꞌhelo, a ki Kiriisto rummeeste toro la icho ꞌdoonaan. Wahanyeyyoha enenyet abiche, enenyet faajjiye a raaho.

Worassi beenaat ichoow kamurroonki rummaat

³ Chirri ꞌdooꞌdoo wihi us enenyet abcho wihi beenaat yahiine, toro wor Yeesso Kiriistohi Kamureene buusanyahiine, toro la saggi kootte ꞌdooꞌd Kiriisto Waakh ikajiro tirrimo,

⁴ weyti serey isgeechaane, walah icho gartaan la mele. Malassi suujenye khabaane, wihi ilmarhaatteet on wowworsataane, walah rumenye icho laabaan la mele. Icho la yeedassi jaakh keeno on kahawwoochaan. Waha la kalꞌdarri ichoow hol ichoow meꞌdeꞌddeel ichoow imurchoti suuje

⁵ ichoow iriirti kol dakkhan islaleeiriiro keenaan. Malassicho a lakheerooche, rum tuumman a lasare. Icho jiroti Waakh liijiro jitoo lakakamurrowo koogyahiin.

⁶ Iꞌdaasenyi jiroti Waakh liijiro a indigirti buure chirri at wihi at khabto kadaragto.

⁷ A mehe walah inno harrata keenne mele, toro la walah inno harrata ka khaatin nabuuꞌd mele.

⁸ Iꞌdaasenyi chiꞌinno golol ichoow gaad khabno geeddaas a kadaragna.

⁹ ꞌDooꞌdi kamurrowin ꞌdoono, kajmeti uskeel kaluguꞌddo ichoow angey ichoow wahanyeyyohi ꞌdalame liimoono ichoow suujoone kadihaan. Waha la icho a jiitaane ichoowka suujaachaane bar tiraan.

¹⁰ A mehe ꞌdooninti chilim weyti laꞌdoono iche suujoon tuumman dessa. ꞌDooꞌd gaasoo chilim rirrihaayi ichoowka wori Kiriisto miinsane goorat icho kakhuufaan kabaabeene toro la oytinti buure laka isikeeneen.

Baawulo Timooti waanicha

¹¹ Iꞌdaasenyi at a eti hili Waakh haaggicho. Maantaka uskeelaas tuumman kafirid. Hol dowe jiroti fissan yowo, jiroti Waakh kahamaado jire, Waakh kakhuufe, ꞌdooꞌdi addan ꞌdoone, garrahso toro samacchaar ateeh.

¹² Jiroti inno Kiriisto kakhuufne ka dihoti haaggan gel. Jiroti jirtuu imassanne maanti lakiwahe at wihi haaggan ꞌdooꞌdi ittaawe ortiis ka cheekatte icho la gartiche laabaan jurkhi.

¹³ Waakkhi walah dakkhan jiro siicho ortiis ka ichoow Yeesso Kiriistohi goorat Boontiyo Bilaato ortiis ka runtiis cheeke, orcho ka amurane kibahcha.

¹⁴ Raahnaanki at wihi Wori Haaggan kaaꞌdoono at raahto ka, eloo rucchul laka akhabine, ichoowka Yeesso Kiriistohi Kamureene a soonokhti.

¹⁵ Waakh ibeenki goorat us gooche Kiriisto enenyet a tusa. Waha a Waakkhi weeli enenyet tuumman saaꞌdo, enenyet tuumman dakhti, a Karnati karnato kussan, a Kamuri kamurre kussan.

¹⁶ Usu kalday on iumaatane banayhi weyti ababo liikadowwaan goya fiddiya. Et injire arge mele et sooargo la mele. Jirtuu tuumman la inkaanyit ichoow miigti jirtuu imassan a wihiissa. Aamiin.

¹⁷ ꞌDooꞌdi weyꞌdane kamurree amurreta ibihi. Rannyaat akhabina ommos hoolahi harratane dowwa on kuto khajjeel akakhabina, iꞌdaasenyi Waakkhi wihi inno ꞌdoonno tuumman inno siicho ꞌdee inno jiroti hamaad khabto jirro kakhuufa.

¹⁸ Haag on a yeeleene, haaggaas icho yeelaan ka la kamurre a yitaaheen. ꞌDooꞌdi uurnugleel ka walah diibo a yitaaheene, wihi icho khabaan la ꞌdooꞌd a leegismeen.

¹⁹ Iꞌda ka jiroti soosohatti ka, iꞌdi tirrinki mujjum min tiiruu, hoolahi rummaat yahay a isigessaane, ꞌdee jiroti rummaate jirtuu imassan khabaan.

²⁰ Timooti, wihi Waakh dahantaah soogesse mujjum yaakhi. ꞌDooꞌdi yeedi ꞌdalame inkaanyitoo rucchul laka Waakh ikakhabin ichoow iriirti ilmarhaatteete icho been ka a garanti rummaat essaan nabah iisudin.

²¹ ꞌDooꞌd gaasoo garantaase cheeka, jeentetaas u wori Kiriisto miinsane icho kakhuufaan a kabaabeen. Waakh ba kimaala!