1 Timooti 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Saggi muunkhoyyo ichoow weynaan ichoow bowꞌdayyo liiwoywoyo

¹ Makhaabali kaaween aleejaakhine, iꞌdaasenyi iꞌdi aabbahaah u uur miigooy. Mejeli nunnugul iꞌdi walaalinyetaah iwoywoy.

² Deyyehoti kaawewween iꞌdi abartaah iwoywoye, deyyehoti nunnugul la iꞌdi albehi kileeddesse iwoywoy. Waha la mali haaggane eloo rucchul laka ikhabin kayeel.

³ Muunkhoyyohi walah ikhabin mujjum inkaanyite wihi icho laayahin sii.

⁴ Iꞌdaasenyi chiꞌ muunkhotoo nyaakhut khabto ommos hamalo khabto, nyaakhutaas ommos hamalohichekaas koloo goobicho a woywoyeene saggi icho mujjum Waakh iraahaan a abteen. ꞌDeerka jeenteti icho isooweynaacheen u a guteen. A mehe waha weyti Waakh kahamaadichaan.

⁵ Muunkhoti rumanka walah ikhabine, eti yeyo laa, eti iche khajjeel kakhabto a Waakh kaldach on. Iche la ibeen ichoow maalim ba Waakhe wahatta gargaar daahta.

⁶ Iꞌdaasenyi muunkhoti wihi kahamaadicho on yeesso, chiꞌiche noossahe laka, a iꞌdoo iche tumuy on.

⁷ ꞌDooꞌd amurreta ibihi uus ꞌdee etoo kalday laka eloo rucchul lakacheekanne.

⁸ Eti tuummane goobicho iwoywoyine kach ka la minkicho iwoywoyin, wihi inno kakhuufno a ꞌdiiꞌde. Eta eti Kiriisto irummeysan laka tabar a dowe.

⁹ Muunkhoti magahiche ꞌdooꞌdi lagargaaro goya lakachiiro a ti guꞌh tomon lih ꞌdirihiche khabto, goorat makhaabaloo kalday on khabte,

¹⁰ toro la a ti jeenteti iche haag iyeessuu enenyet tuumman inkaanyito. Haaggiche a ꞌdow on. A ti nyaakhuutiche jiti haaggan kasooweynaasse, a ti goobiche ka ꞌdooꞌd martiisatte, a ti ꞌdooꞌdi Waakh iꞌdi ilbooy u luhlo dikhte, a ti ꞌdooꞌdi sina khabe gargaarte. A ti hili haaggan tuumman isisoobihisse.

¹¹ Iꞌdaasenyi muunkhoyyohi nunnugul achiirin. A mehe ꞌdee yomboka kolossoo ildeerroti sarticho a geeddi iche anatti icho hil Kiriistoki goorat icho isisoobahcheen ꞌdiichaane, mindischo gelin ꞌdoonaan.

¹² Iꞌda ka la jeenteti icho ayyinti icho ꞌhor Waakh iayyicheen ijebcheen u sina isigoochaan.

¹³ Toro la a ollommowaane, kolba minkoo gelaan. Ollom kalday la menye, enenyet hantaane, yeedassi wihicho ieheynan kaaddihaane, wohoo kootte ikamalin essaan.

¹⁴ Maantaka wihi an ꞌdoono muunkhoyyohi nunnugul toro a ladiso nyaakhut a deleene, goobassicho a woywoyeen. Iꞌda ka chiiytankeen jit us inno kahanti mele.

¹⁵ A mehe gaasichokoo orey on jit bujeene, Seytaan raaheen.

¹⁶ Iꞌdaasenyi chirri makhaabassoo Yeesso rummeysatte jirto iche la minkiche ka muunkhoyyohoo khabto, iche muunkhoyyohaas woywoyta uus ꞌdee urur Kiriisto huleesa lakorinne. Iꞌda ka urur Kiriisto muunkhoyyohi eti gargaaro laa kalday on woywoya.

Saggi ewweenki urur Kiriisto woyo liiwoywoyo

¹⁷ Ewweenki urur Kiriisto woyo urur mujjum dakhti a imasse chiꞌ liinkaanyito kalaꞌd laguto, kach ka la ewweenki Yeedi Waakh cheeko enenyet walah abcho wahaas a liiyeelo.

¹⁸ A mehe Chiirnaanneti Waakh mehe tadeeh ya, “Heer geeddi us gurnaan yabti ꞌdargaayye ichoow chaafo ba seley saaho af a hidine, usuhi ꞌdargaayye yaham atiran.” A mehe Chiirnaanneti Waakh mehe tadeeh ya “Eti hil haaggicho wihiis a laguto.”

¹⁹ Wihi etoo ewweenki urur Kiriisto woyo lakacheekti nabah iisudin sammata et lamma ommos et seyyahe gartaas ilaabin.

²⁰ Weynaanti uskeel yeesso urur Kiriisto ortiis ka a laleejaakho, ꞌdee ꞌdooꞌdi addan uskeeli us yeelo a karooro.

²¹ Waakh ichoow Yeesso Kiriisto ichoow herti Waakhe lasoobahsate orche ka amurane kibahcha, tabe waansiha khucchiche, enenyet ekka kawaaniche, wihi at yeesso ka la enenyet asassaahin.

²² Etoo dowwa on dahan akorinne weynaanti urur Kiriisto woyto akayeelin. Iꞌdaas ka uskeelicho ma leegisanto. Ati rubeytaah la miꞌdab iskayeel.

²³ Iꞌdaasenyi jeenteti uur kibolkho toro at geeddi buure ichocchoorsattuu, bicche kalday uubhaabane, farsotoor sabiib abhuub.

²⁴ Uskeeli ꞌdooꞌd gaasoo yeelo iꞌdaanu laarga, enenyet tuumman la saggi icho liihukkumo a garta. Uskeeli ꞌdooꞌd gaasoo la ꞌdubichooda on sooraaha.

²⁵ Saggaas u la haaggi enenyet yeelo iꞌdaanu laarga. Iꞌdaasenyi chirri haaggi icho yeelaan liiargin laka, ma dagti.