1 Timooti 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Saggi kootte incheenka urur Kiriisto Waakh iwahti

¹ Maantaka a atin hawwaasdee kolooraat enenyet tuumman Waakh ihawwaasda, Waakh iwaha, meessicho ka Waakh leeyeyyeeda, Waakh kalaꞌd ilaaba.

² Karnato ichoow weynaanti addan tuumman iꞌdane yeelaane ꞌdee inno tuumman nebey ichoow roorro laan fiddiina. Toro la ꞌdee Waakh a karoorro jiroti munyee a jirro.

³ Waha a haagganyahiine toro la Waakkhi ꞌDoorribeheene a kahamaadichaan.

⁴ A mehe Waakh weeli enenyet tuumman usuhi laribo toro la rum abti ꞌdoona.

⁵ Iꞌdi tahe Waakkhoo kalday on jira, dahgelehi Waakh ichoow weeli enenyet isineybicho la a koo kalday one, ulla a Yeesso Kiriistohi weeli enenyet eheet.

⁶ Yeessoha la iꞌdaanu rubeytiis diibe, ribnaanki weeli enenyet tuumman gute. Omoot Yeesso Kiriisto ka, ibeenki mujjume ka Waakh saggi us weeli enenyet iribo a tuse.

⁷ Jeentetane Waakh ani eti Yeedi Waakh cheeko ichoow ergaano ikayeele. Toolla la wihi an cheeko been menye, a yeedi rummaat on. Toro la ani eti wori rummaate Kiriisto miinsan yaafohi Yaꞌhuud ieheynan abcho ikayeele.

⁸ Wihi an ꞌdoono, inti atin kakulantaane Waakh kawahattaan tuumman ka, mejel jiroti munyeenye us jiro ka Waakh dahano a ioogo a weesti. Chiꞌicho weestaan la, iicho uuricho ka hol khabine ommos iriir khabin.

⁹ Deyyehoti Waakh ichehi gaaddi mujjumenye inkaanyit tusso gessatti ꞌdoona. Uus iche saggi iche tintiche ihaaggisse ka ommos ꞌdahab ka ommos irtiyyohi gato miige ka ommos gaaddi gato miige ka ꞌdooꞌd istuttusin.

¹⁰ Iꞌdaasenyi deyyehoti ꞌdooꞌdi Waakh istadeeh, wihi lakasooraaho a haaggi iche yeesso.

¹¹ Deyyeho chirri walah laabcho a gammadisso toro iiche weynaan afiche kutin.

¹² Urur Kiriisto goyaka an deyyeho anto ma siicho, mejel walah ma abisso ommos mejel ma anatti. Deyyeho a gammadisso.

¹³ Iꞌdi tahe Waakh kolooraat Aadame soouume, saahka Haawwo soouume.

¹⁴ Toro la Aadam menye, arame leekkeeste uskeel yeesse.

¹⁵ Iꞌdaasenyi Waakh deyyeho delnaan ka a riba, chiꞌiche orey isohatti Waakh kakhuufto iche enenyet ꞌdoonto, jiti munyee kafiddiito toro la isjeyisso.