1 Koriinto 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo wori Yeessohi massalaaba lakakaahe cheeka

¹ ꞌDooꞌd Kiriistokaaw, maanti an atin iimiyye an runti dagsane Waakh miinsan atin icheeke, an yeedassi burbuure ommos jiti khara ka ma atin leeyyeedin.

² Iꞌdi tahe wihi an gooche, geeddi an atin leejiro, wor Yeesso Kiriisto ichoow saggi massalaaba liikakaahe on menye, wohoo addan garan ma ꞌdoonin.

³ Maanti an atin iimiy an a ꞌdarneete toro la weyti hamar kaseehe jeenteti an roorro ikhabuu.

⁴ Farniinkeeyki Kiriisto miinsan ichoow Yeedi Waakhe an atin icheeke ka, an mali khara mee atin ikacheeke. Iꞌdaasenyi miigti Rubeyti Munyee ka, wihi an eldi saggi icho rum iyahiin a atin latuse,

⁵ ꞌdee kakhuufnaanki atin Waakh kakhuuftaan kharati weeli enenyet menye, miigti Waakh kayamiit.

Kharati Waakh katamiit

⁶ Chiꞌ nah ꞌdooꞌdi Kiriisto goyaka iiꞌdowe leeyyeeno, wori khara kaleeyyeena. Iꞌdaasenyi waha kharati ꞌdooꞌdi harrata menye ommos ti weynaanti harratane dowwa on baabaato mee.

⁷ Kharati nah kaayyeeno la a ti Waakhe dagsan. Waakh la kharataas a dagche. Kharata la a ti Waakh geeddi us walah isoouumin gooche, ꞌdee wihi haaggan tuumman ꞌhella.

⁸ Weynaanti harrata kichekoo kalday laka kharata inno kaayyeeno ma aban. Iꞌdi tahe chiꞌ goorat icho abteen, Kamureenki weynaan tuumman leh massalaaba ma kakaahaan gon.

⁹ Iꞌdaasenyi iꞌdi liichiiruu, “Wihiiyye ile injire iargin wihiiyye nabahe injire idaagin toro la wihiiyye mali weeli enenyet injire ikamurin iche Waakh ꞌdooꞌdi usu ꞌdoono itannabiche.”

¹⁰ Iꞌdaasenyi waha a wihi Waakh Rubeyti Munyee ka nah isoobabbakkaahiche. Iꞌdi tahe Rubeyti Munyee walah tuumman a fiirissa. Mali Waakhe dagsan laka a fiirissa.

¹¹ A mehe rubeyti weeli enenyet goytiis kijirto on menye, et mali etaas massi garti mele. Saggaasu la Rubeyti Waakh on menye, et mali Waakh massi garti mele.

¹² Inno rubeyti ꞌdooꞌdi wahanyeyyohi harratane sussuuje raaho ma ꞌheline, Rubeyti Waakh katamiite ꞌhelle, ꞌdee wihi Waakh iꞌdaanu inno siiche abanna.

¹³ Nah la wahaase cheekna, yeedassi kharati weeli enenyet kayimiy ka menye, yeedassi Rubeyti Munyee nah abisso iche kacheekna. Nah laka yeedassa ka, runti Rubeyti Munyee katamiite Rubeyti Munyee soobabbakkaahisso iche enenyet abinna.

¹⁴ Eti tuummane Rubeyti Waakh ikhabin, wihi Rubeyti Waakh kayimiy ma khaatti, a mehe usu ka waha a ꞌdalammoon on. Toro wahanyeyyoha aban ma yabuuꞌd a mehe Rubeyti Munyeenye gargaarto ma khabo gon.

¹⁵ Eti Rubeyti Munyee woyto walah tuumman icho haaggan ommos icho suuje a goocha. Iꞌdaasenyi eta etoo addan wahaas ma igoocho.

¹⁶ “A mehe ayyo mali Kamur garta? Ayyo Kamur wihi us yeelo icheeka?” Iꞌdaasenyi inno mali Kiriisto khabo iche khabna.