1 Koriinto 16 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Urur Kiriistoki Koriinto chilimme baayicha

¹ Toolla woriiyye an atin kaleeyyeedo a chilimmeti labaayicho, ꞌdooꞌdi Waakhe ili Yaꞌhuudiya kajiro lasiicho miinsan. Atin laka wihi an ururre Kiriistoti boroofenhi Galaatiya kajirto yeela iidah on, atin laka yeela.

² Teeba tuumman ibeenki oraat etiimba chilimme geeddi Waakh siiche, gaasoo meel a gesso, ꞌdee maanti an amiit chilimme addane labaayicho ba mele.

³ ꞌDeerka maanti an imiy ꞌdooꞌdi atin soobihisseen khadaabbeti eti icho yayyahiin tusso a siicha, siinti chilimmeti atin baayisseen khabaani ilkerengeetti weene Yeerusaleem ierga.

⁴ Chirri iche mujjum tahe, a geeddi an laka irdi icho la iraahaan.

Mali Baawulo khabo

⁵ Boroofenhi Makedooniya amiite, ꞌdee atin sooꞌdaara. Iꞌdi tahe boroofenhi Makedooniya goya leeamiit.

⁶ Anna kolossoo a atin leefiddiya. A geeddi an yeerti il roffo yahe tuumman an atin leefiddiyo, ꞌdee atin la meelbaaw an irdi ka sulhaasseey ka igargaartaan.

⁷ Anihi iꞌdaaru on atin leeamiite, atin kakuto ma ꞌdoono. Afi Kamur ka, anihi geeddoo deer atin leefiddiyo khajjeela.

⁸ Iꞌdaasenyi ilkerengeetti Efeesso fiddiya, ichoowka daawti Beentekos tateeh.

⁹ Iꞌdi tahe aritti ballaaddane ꞌdee an hili khumman kahaaggicho a liifure chirri ꞌdooꞌdi buure itirrimo laka.

¹⁰ Chirri Timooti goytiin yimiy, taba uus roorrotoo rucchul laka goytiin ka khabin. Iꞌdi tahe ullaka iꞌdeey u hili Kamure haaggicha.

¹¹ Uus etoo kalday laka goytiin ka usu ꞌdarraawin. Chuꞌus irti, nebey on a kiirti, ꞌdee ani a isoonokhti. Iꞌdi tahe an usuhi mejeloo addane Kiriisto rummeeste khabaayi soonokhti, iche suga.

¹² Wori eteenki Aboollo layadeeh miinsan la, an weyti usu a hawwaasde ꞌdooꞌdoo addane koo Kiriistee khabaayi atin iirda iidah. Usuhi toolla irti ma ꞌdoono, iꞌdaasenyi ibeenki us ꞌhelo on irta.

¹³ Taba istoorriba, kakhuufnaanki atin Waakh kakhuuftaan ka mujjum tolola. Aburꞌdowina, miig la khaba.

¹⁴ Wihi atin haaggissaan tuumman ka, ꞌdoonin kahaaggicha.

¹⁵ Woriiyye goob Isteefana miinsan a garattaan. Icho a ꞌdooꞌdi kolooraate boroofenhi Akhaaya ka Kiriisto rummeeste, hili ꞌdooꞌdi Waakh liihilo ka issoobahche. ꞌDooꞌd Kiriistokaaw, a atin hawwaasde,

¹⁶ ꞌdooꞌdi iꞌdaase ichoow ki addane hil leehaaggicho aficho akutina.

¹⁷ Emeetti Isteefana ichoow Fortunaata ichoow Akaayikas ba inta yimaateen, weyti kahamaade. Iꞌdi tahe wihi ankiin ka ankhaneete buuhicheen.

¹⁸ Iꞌdi tahe saggi icho uur atin imiigoocheen, iche ani laka uur imiigoocheen. ꞌDooꞌdi iꞌdee wihi us essi weyti nabah isuda.

Bariitoti ꞌdaꞌddaboot

¹⁹ ꞌDooꞌdi ururre Kiriisto boroofenhi Aassiya kajiro tuumman, a atin soobariitiche. Akiila ichoow Birisiila ichoow ꞌdooꞌdi Waakhe minkicho ka kulmo, magahi Kamur ka weyti atin soobariiticheen.

²⁰ ꞌDooꞌdi Kiriisto rummeeste inta kajiro tuumman laka a atin soobariitiche. Taba ꞌdoonin Kiriisto iskabariiticha.

²¹ Waha la ani rubeytaaya dahanteey kachiira. Ani Baawulo weyti atin soobariitiche.

²² Eti tuummane Kamur iꞌdoonin, a falanyahe! Kamuroow dowwa soonokho!

²³ Yeessohi Kamure ba atin imaala.

²⁴ ꞌDooninteey ba a atin leejirto, a mehe Yeesso Kiriisto ka inno tuumman a wohoo kalday.