1 Koriinto 12 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Siimohi Rubeyti Munyee

¹ ꞌDooꞌd Kiriistokaaw toolla toro wori siimohi Rubeyti Munyee kayamiit miinsane atin isoocheeka, ꞌdee wihiche tuumman garattaan.

² Geeddi atin Waakh igaran, saggi ambaaw atin liiwoye ka atin liibaabiiche, atin iyookkoyyohi af laa iwahatteen, a garattaan.

³ Maantaka wihi an atin isoocheeko, eti Rubeyti Waakh woyto, koloo kalday laka, “Yeesso a falayyahe,” ma yadeeh. Eti Rubeyti Munyee woyto on menye koo addane, “Yeesso a Kamur,” yadeeh mele.

⁴ Siimohi yeerarenye jira, iꞌdaasenyi Rubeyta Munyee kalday on siimohaas enenyet siissa.

⁵ Hilassi yeerarenye baꞌh liihilo a jiraane, iꞌdaasenyi Kamura kaldach on liihila.

⁶ Jitassi hili Waakh lakahaaggicho a yeyyeerare, iꞌdaasenyi Waakh kalday on miigti hil ba lakahaaggicho enenyet siicha.

⁷ Iꞌdaasenyi Waakh ebba jitoo yeerenye Rubeyti Munyee goyteen kafiddiito lakaargo a siiche, waha la a indigirti ꞌdooꞌd Kiriisto tuumman on.

⁸ Rubeyti Waakh on ka etoo wori khara lasiicha, Rubeyta Waakh on ka etoo addan wori walah lakagarti lasiicha.

⁹ Toro Rubeyta Waakh on ka etoo addan kakhuufnaanki Waakh weyti lakakhuufo lasiicha, Rubeytaas on ka etoo addan siinti enenyet lakasamaacho lasiicha.

¹⁰ Toro Rubeyta Waakhe etoo addan miigti wihi weeli enenyet iubaaꞌdan lakayeelo siissa, etoo addan la siinti Waakh liiyeyyeedo siissa, etoo addan laka siinti Rubeyti Waakh ichoow rubeyohoo addan seley lakaabti siissa. Etoo addan la siinti us afassi Rubeyti Munyee kayamiit kaayyeedo siissa, etoo addan la siinti us wihi afassaas ka leessi kalaabo siissa.

¹¹ Waha tuumman la a hili Rubeytoo one, a Rubeyti Waakh. Iche la saggi iche iꞌdoonto u, ebba siintoo siissa.

Sartoo kaldache miilassi ittaawe khabto

¹² Sarti enenyet a too kaldach on, chirri iche miilassi ittaawe khabto laka. Toro la chirri miilal ittaaw yahiin laka, sartoo kaldache yeelaan. Sar Kiriisto laka a iꞌdaas on.

¹³ Iꞌdi tahe Rubeyta kaldaye Waakh on inno tuumman sartoo kalday goya inno kabaattissite, yaafohi Yaꞌhuud ommos yaafohi Yaꞌhuud ieheynan eheetteey ka ba, bowꞌda ommos ꞌdooꞌdi lafure eheetteey ka ba. Inno tuumman la Rubeyta kalday on inno lasiiche, inno lakasookhube.

¹⁴ Iꞌdi tahe sar tuumman miiloo kalday on menye, a miilassi ittaawe.

¹⁵ Eemba luhe, “An dahan mee gone, an miili sartaas mee,” tidah? Jeentetaas u miili sartaas ma kabahto.

¹⁶ Ommos eemba nabahtoo, “An il mee gone, an miili sartaas mee,” tidah? Jeentetaas u nabahtaas miili sartaas ma kabahto.

¹⁷ Chirri kootte sarteen tuumman il kalday on tahe, sag inno walah idaagno mele gon. Chirri kootte sarteen tuumman nabah kalday on tahe la, sag inno walah iurinno mele gon.

¹⁸ Iꞌdaasenyi Waakh saggi us iꞌdoono, iche miil ba sarteen igesse.

¹⁹ Sare chiꞌiche miiloo kalday on tahe, sar mee gon.

²⁰ Miilal a ittaawe, iꞌdaasenyi a sartoo kaldach.

²¹ Ile koloo kalday laka dahan, “An ma kiꞌdoonno,” iidaahan ma tabuuꞌd. Toro la matah, koloo kalday laka luhlo, “An ma kiꞌdoono,” iidaahan ma yabuuꞌd.

²² Ugoka miilassi sareete inno wohoo ꞌdaꞌddaran koognahe, iche weyti fiddi laan inno iubaaꞌdan.

²³ Miilassi sareete inno iinkaanyitin, iche mujjum ogoogna. Miilassi sareete enenyet liitusin iche mujjum ogoogna.

²⁴ Miilassi sareete enenyet latuso la mujjum ma ogoogno. Iꞌdaasenyi Waakh miilassa sarteen tuumman a isgesse, jitoo miilassi inno iinkaanyitin weyti lakiinkaanyito yeele.

²⁵ Sare ꞌdeerka ma isassaahto, iꞌdaasenyi miil ba miili addan ekka aw ikhaba.

²⁶ Sar goyaka, chirri miiloo bolkho, miilassi addan tuumman a leebolkhaan. Chirri miiloo liinkaanyito, icho tuumman a isleehamaadaan.

²⁷ Atin tuumman a sar Kiriisto, etiin ba la sarta ka a miiloo.

²⁸ Urur Kiriisto goyaka Waakh ꞌdooꞌdoo hilassane korche. Kolooraat ergaano, ki lammaatteet ꞌdooꞌdi Waákh íyeyyeedo, ki seyyahnaatteet ꞌdooꞌdi enenyet ayti Waakh abcho, ki kasookhuccho la a ꞌdooꞌdi wihi weeli enenyet yeelin iubaaꞌdan yeelo, ommos ki siimohi ꞌdooꞌdi khakkhannan lakasamaacho khabo, ommos ki ꞌdooꞌdi addan gargaaro ommos siimohi urur Kiriisto ladakhti ommos ki afi us idaagin kaayyeedo.

²⁹ Enenyet tuummane ergaanee? Enenyet tuummane ꞌdooꞌdi Waákh íyeyyeedee? Enenyet tuummane ꞌdooꞌdi enenyet jiti Waakh abchee? Enenyet tuummane wihi weeli enenyet yeelin iubaaꞌdan yeela?

³⁰ Enenyet tuummane siimohi ꞌdooꞌdi khakkhannan lasamaacho khaba? Enenyet tuummane afassi Rubeyti Munyee kaayyeeda? Enenyet tuummane wihi afassa ka leessi cheeka?

³¹ Iꞌdaasenyi taba siimohi weyti khumman imoona. Toolla la wohoo wahaas tuumman kussane atin tusa.