1 Koriinto 11 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Saggi an dabat Kiriisto iraahuu, atin laka dabateey sooraaha.

Wihi chirri urur Kiriisto Waakh wahti imale

² An weyti atin koolicha iꞌdi tahe walah tuumman ka a ikasooꞌhessaane toro la hugunki goorat an ꞌhele toro an atin isookucche, mujjume khucchissaan.

³ Iꞌdaasenyi wohoo an atin abin ꞌdoono a jiraan. Kiriisto usu matakki makhaaballe tuummane. Makhaabal la usu matakki makhaabassiisenye, Waakh la usu matah Kiriistee.

⁴ Eti mejelenye urur Kiriisto goyaka weesti ommos wori Waakh kaayyeedo matakkiis la ogooganyahe, matakkiissa lakhaanyo kadowa.

⁵ Toro la, deyyeho chiꞌiche urur Kiriisto goyaka weysatti ommos wori Waakh kaayyeeddo matah la iogoogan, matakkicheeda lakhaanyo kadowta. Iche ichoow aranti matah lahaaꞌde lakhaanyo iskadowte iꞌda ka yeerar mee.

⁶ Deyyeho chiꞌiche matah iogoogan a geeddi iche matah haaꞌdatti on gon. Iꞌdaasenyi deyyeho chiꞌ matakki lahaatti lakhaanyo leeyahe la, matakkiche wohoo a korsatti giꞌde.

⁷ Aram walah us matah korsati mele. Iꞌdi tahe usu iyookkoti Waakhe lakasoouume, toro la weynaanti Waakhe tusa. Iꞌdaasenyi arame weynaanti arankicheeda tussa.

⁸ Iꞌdi tahe áram mee arám kayimiy, iꞌdaasenyi arámé áram katimiy.

⁹ Toro la Waakh áram jeenteti arameet mee isoouume, us arámé jeenteti aram isoouume.

¹⁰ Jeentetaas ichoow jeenteti herti Waakh u, a haaggantahe chirri arame wohoo antohi makhaabaliche tuso matakkiche kakhabto.

¹¹ Iꞌdaasenyi innohi ꞌdooꞌdi Kamure ka la, deyyeho mejel laan walah iche yeesso mele, mejel la deyyeho laan walah us yeelo mele.

¹² Iꞌdi tahe saggi deyyeho mejel ikasooummantuu, saggaase mejel laka deyyeho idessa. Iꞌdaasenyi walah tuumman Waakh on kayamiitiin.

¹³ Bal waha isigoocha, a haaggantahe chirri deyyeho urur Kiriisto goyaka Waakh soowahto, wohoo la matah ikorsan?

¹⁴ Weeli enenyet tuumman goyaka, chirri eti mejele tinti derdeer khabo lakhaanyo ma iskadowo?

¹⁵ Iꞌdaasenyi chiꞌ deyyeho tinti deddeer khabto, a inkaanyiticheeda. Iꞌdi tahe tinticheti deddeer a lasiiche, ꞌdee matakkiche koogoogta.

¹⁶ Chirri etoo ayta iriir gelin ꞌdoono la, wihi an iadeeh a mehe ya, inno eheetteey ommos ururi Waakh eheetteey ka ba, et hugunkoo addane yeere weysiit khabo mele.

Waansihi gololi Kamur miinsan

¹⁷ Waansiha toolla an atin isoocheeko ka, walah an atin kakoolicho mele. Iꞌdi tahe chirri atin kulantaan, haag menye, wihi suuje on soobaha.

¹⁸ Wihi kolooraat, chirri atin iꞌdi urur Kiriistuu kulantaan, wihi an daage a mehe ya, atin seleye goggootaane an la yeedaas geeddoo ka a rummeesda.

¹⁹ A mehe koobbinohaas goytiinna kijiraane, ꞌdee goytiin ka ꞌdooꞌdi rumanka koo Kiriistee laarga.

²⁰ Chirri atin kulantaan, gololi Kamur mee tamhiin.

²¹ Iꞌdi tahe chirri atin golossattaan, etiimba gololiissa on yahame ma issugtaan. Gaasoo ankaa khabaayi nokhta, gaasoo la meleefu yateeh.

²² Goobassi atin kagolossattaane toro atin biccheyyo katabhuubiine laatahiin? Ommos ururi Waakhe ꞌdarraawtaane toro ꞌdooꞌdi miskiinenye lakhaanyo kadowin ꞌdoontaan? Kamalda bal, mehe atin iidaahe? Wahaase atin kakoolicha? Koloo kalday ma atin kakoolicho!

²³ A mehe wihi an Kamur ka ꞌhele, toro la an atin isookuccho, a mehe ya gelebti Yeessohi Kamureene ladiibe, makaatetoo khaate,

²⁴ chirra us Waakh kalaꞌd ilaabe ka, jejjebche, toro wihi us yidah, “Waha a sarteeyti atin liisoobahche, amha ꞌdee ikasooꞌhela.”

²⁵ Saggaas on u, inkoo icho gololi gelebeet yumheen ka, kokkoob khaate, wihi us yidah, “Kooba a ayyinti husube Waakh enenyet diiggeey ka igoocho. Iꞌda yeela, maambaaw atin dantaan ka ikasooꞌhela.”

²⁶ Iꞌdi tahe maambaaw atin makaateta tamhiine, atin kooba tabhuubiin tuumman, atin toro enenyet saggi Kamureen iyumuyye icheektaane, ichoowka maanti us soonokhti.

²⁷ Maantaka eti tuummane jiti Waakh ortiis ikamalin ka makaateta yahame ommos kooba damo, etaas sar Kamureen ichoow diiggiissa uskeel igela.

²⁸ Ebba koloo geeddi us makaateta iumhane ommos kooba idamin, a isfiiricho.

²⁹ Iꞌdi tahe eti tuummane sarti Kamur ikasine makaateta yahame ommos kooba damo, etaas hukkunki Waakhe isikeena.

³⁰ Jeentetaase buurtiin iꞌdaꞌddarantahe, buurtiin la ikhakkhannantahe, gaasoo laka ituume.

³¹ Iꞌdaasenyi chirri koloo inno isfiirinne, Waakh ma inno hukkumo gon.

³² Chirra Kamur inno hukkumo a inno sookhuncha, uus ꞌdee iꞌdi ꞌdooꞌdi wahanyeyyohi harratane sussuuje raahuu uskeel inno liigoonne.

³³ Maantaka ꞌdooꞌd Kiriistokaaw, maanti atin kulantaane atin gololi Kamur tamhiin, issuga.

³⁴ Chirri etoo raarah khabo, goobiis ka a soogolossati. Iꞌda yeela uus ꞌdee maanti atin isleegolossattaan atin lahukkumine. Wahanyeyyohi addan la maanti an amiite atin kawaanicha.