1 Koriinto 10 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Uskeeli ꞌdooꞌdi Issiraayele yeele buja

¹ ꞌDooꞌd Kiriistokaaw, wihi aacchinyetiinti Muusa woye kayitahye atin kasooꞌhelin ꞌdoona. Icho tuumman mirisi Waakh sooerge woye toro la icho tuumman nebey beyti buure maaheen.

² Icho tuumman mirisa ka ichoow beyta buure ka a iꞌdoo labaattissiye ꞌdooꞌdi Muusa raaho lakayeele.

³ Icho tuumman gololaas Waakh girmo ka siiche isleeyumheene,

⁴ toro la bicchehaas Waakh girmo ka siiche isleeyubhaabeen. Iꞌdi tahe daddaabti buurenye girmeenye icho raahte bicche kayubhaabeen. Daddaabtaas la a Kiriisto rubeytiissa.

⁵ Chiꞌiche iꞌdaas tahe laka, Waakh aacchinyeteen buurche a kahollowe tuunte, sarticho hidaad tuumman kataaꞌhte.

⁶ Wahaas tuumman la a iyookkoyyohi inno waanicho, uus ꞌdee inno laka iꞌdichuu wahanyeyyohi sussuuje maanjeeranne.

⁷ ꞌDooꞌdaas gaasoo iyookkoyyohi waakkhakh lakayeessi wahte. Iꞌdicho iitaahana. Iꞌdi liichiiruu, “ꞌDooꞌda a orronte sukuuku gele yomboka girꞌdaanki biꞌdire ikahe.”

⁸ ꞌDooꞌdaas gaasoo sohoꞌddarri kaassohte. Ibeenkoo kalday goyaka ꞌdooꞌdi elif tomon lamma ichoow elif seyyahe ꞌdebbeeste. Uus inno laka iꞌdichuu sohoꞌddarri kaassohan.

⁹ ꞌDooꞌdaas gaasoo Kamur a kaje toofaf icho bakkicheen. Uus inno iꞌdichuu Kiriisto kajin.

¹⁰ ꞌDooꞌdaas gaasoo a nyunnyuwe, herti Waakhe walah uskulaasso icho bakkisse. Uus inno iꞌdichuu nyunnyuwin giꞌde.

¹¹ Waha tuumman yaafohi Issiraayel a kayitaaheene, ꞌdee iyookko inno iyateehiin. A lachiire ꞌdee innohi ibeenki harra ꞌdubiche soodowwaate jirro inno tootoochaan.

¹² Maantaka eti tuummane kol us mujjum toollo iskoog, a isyuubsati giꞌde uus kufinee.

¹³ Kajmeti uskeel atin kaluguꞌddo a ti weeli enenyet tuumman lakakajo on. Waakh la a lakakhuufa gone, us kajmeti atin lakajo geeddi atin ituddubin ꞌdirihiche a atin kajeycha. Iꞌdaasenyi chirra atin lakajo, us toro jiti atin kajmetaas kabahsattaan a atin iyeela, ꞌdee kajmetaas ka garrahsan tuddubtaan.

¹⁴ Maantaka aalasseeyki an weyti ꞌdoono, iyookkoyyohi waakkhakh lakayeessi kafirda.

¹⁵ Atin a ꞌdooꞌdi iiꞌdowe. Wihi an kaayyeedo isigoocha.

¹⁶ Chirri inno gololi Kamur ka Waakh koob ka kalaꞌd ilaabno toro danno, inno tuumman gargaari diig Kiriisto isleegisanna menya? Makaateti lajebcho islaleeyaham ka la, gargaari sar Kiriisto isleegisanna menya?

¹⁷ Jeenteti makaate too kalday itahe, innohi ittaawe laka a sartoo kalday. Iꞌdi tahe inno tuumman makaatetoo kaldaye isleegisanna.

¹⁸ Bal ꞌdooꞌdi Issiraayel yeya. Soorriyoyyohi Waakh chalag ka liibahche icho isleeyamhiin ka, wahnaanki Waakh chalag ka lawahti a isleegismaan.

¹⁹ Iꞌda ka mehe elda ya, soorriyoti iyookkoyyohi waakkhakh lakayeessi liibahche ommos iyookkoyyoha waakkhakh lakayeessi walah icho yahiin mele.

²⁰ Wihi an eldi a mehe ya, wihi ꞌdooꞌdi Waakh igaran soorriyoocho, icho ginnayyo isoorriyoochaan menye, Waakh mee isoorriyoochaan. Ani la atinhi atin ichoow ginnayyo ba wohoo kalday tateehiin ma ꞌdoono.

²¹ Koobi Kamur ichoow koobi ginnayyoot ma isleedantaan. Ommos gololi komborti Kamur ichoow gololi komborti ginnayyoot ma isleetamhiin.

²² Kamure inaaf gelin ꞌdoonna? Kol inno Kamur kamiignahe koogtahiin?

²³ Mehe leessa ya, “Wihi an yeelin ꞌdoono walah ikajeycho mele.” Iꞌdaasenyi walah tuumman mee atin iroon. Toro la “Wihi an yeelin ꞌdoono walah ikajeycho mele,” iche leessa. Iꞌdaasenyi walah tuumman mee gargaar khabo.

²⁴ Awtiinna on ayowanna, iꞌdaasenyi ꞌdooꞌdi addan aw ikhaba.

²⁵ Chirri at jidi bicchir ka loororicho taham, jeenteti rubeytaahti haag ichoow suujoon seley saahtuu, walah awowworsan.

²⁶ Iꞌdi tahe, “Harra a ti Kamure, toro la wihi kajiro tuumman a wihiissa.”

²⁷ Chirri etoo Kiriisto irummeysan minkiis ka golol kiwahe at la iran ꞌdoonto, iro on. Walahbaaw lakisiicho ka aham. Jeenteti rubeytaahti haag ichoow suujoon seley saahtuu, walah awowworsan.

²⁸ Iꞌdaasenyi chirri, “Golola a ki naffi iyookkoyyohi waakkhakh lakayeessi liisoorriyooche,” lakiidah, jeenteti eti iꞌdaas kiidah ichoow iroonoti rubeyti haag ichoow suujoon seley saahtuu, gololaas uumhan.

²⁹ Waha la jeenteti rubeytaahti haag ichoow suujoon seley saahto menye, a jeenteti rubeyti etaas. A mehe a iꞌdoh furnaanki an furanahe ka wihi an yeelin ꞌdoono rubeyti etoo addane waha a suuj ielatti u ijeycha?

³⁰ Chirri an golossadi an Waakh kalaꞌd ilaabo, a iꞌdoh etoo addan toro golola an Waakh kalaꞌd ilaabo ka iabaara?

³¹ ꞌDeerka golossatteey ommos wohoo danteey ka ba, ommos walahbaaw at yeesso ka, waha tuumman saggoo Waakh liikoolicho iyeel.

³² Fiddihi atin fiddiitaan uus etoo kalday laka tarraantarrin, ꞌdooꞌdi Yaꞌhuud ommos ki Yaꞌhuud ieheynan ommos ururi Waakh eheetteey ka ba.

³³ Saggaasu la, ani walahbaaw an yeelo ka, wihi an yowdi iroonoteey menye, ꞌdooꞌdi addane kahamaadicha, ꞌdee ribnaan ꞌhelaan.