1 Koriinto 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo bariito erga

¹ Khadaaba eti atin isoochiiro, a ani Baawulo ichoow eteenki koo Kiriisteenye Soosteena layadeeh. Anna Waakhe jeenteti us iꞌdoono on u, iwahe ergaano Yeesso Kiriisto ikayeele.

² ꞌDooꞌdi nah khadaaba isoochiirro la, a ururi Waakhe ilkerengeetti weene Koriinto kijiro. Atin a ꞌdooꞌdi Waakh rubeytiis wahe munyaache, atin ichoow Yeesso Kiriisto ba wohoo kalday atin kayeele. Toro la eti tuummane harrata ka Yeesso Kiriistohi Kamureenenye toro la icho laka Kamurichee wahti iche ichiirra.

³ Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.

Baawulo Waakh kalaꞌd ilaaba

⁴ An kol dakkhan Waakkheey kalaꞌd a ilaaba. Us haaggiiski buurenye inno imunneynan a atin tuste jeenteti atin ichoow Yeesso Kiriisto wohoo kalday itahiin u.

⁵ Iꞌdi tahe jeenteti atin ichoow Kiriisto wohoo kalday ititaaheen u, Waakh walah tuumman ka a atin kamurrooche. Waha la a iꞌdi maanta, wihi atin cheektaan ichoow wihi atin abatteen.

⁶ Waha la saggi Wori Kiriisto miinsane nah atin icheekne uurassiin goyaka irummaateene tusaan.

⁷ Maantaka siinti Rubeyti Munyee katamiit too kaldaye atin kaankhan ma jirto, geeddi atin Yeesso Kiriistohi Kamureenenye inno liisoobabbakkaahicho weyti sugtaan.

⁸ Yeesso Kiriistohi Kamureene la a atin miigoocha, usu mujjum kakhuuftaane, ꞌdee maanti us soonokhti ka, wohoo rucchul laka ma atin kacheekti.

⁹ Waakkhi atin wahe, atin ichoow Weeliiski Yeesso Kiriistohi Kamureene ba kulankoo kalday atin kayeele, a lakakhuufa.

Urur Kiriisto seley goggowa

¹⁰ Maantaka ꞌdooꞌd Kiriistokaaw, anto Yeesso Kiriistohi Kamureene ka a atin hawwaasde, taba atin tuumman isdaaga ꞌdee seley agoggowina. Toro la wihi atin goossaan ka maloo kalday khaba.

¹¹ Iꞌdi tahe ꞌdooꞌd Kiriistokaaw, ꞌdooꞌdoo goob Kiilow kayimiy saggi atin isileejaakhtaan a isoocheeke.

¹² Wihi an eldi a mehe ya, gaasiinkoo mehe essa ya, “Ani Baawulo raaha,” gaasoo la, “An Aboollo raaha,” essaane, gaasoo la “An Keefase raaha,” gaasoo la “Ani Kiriisto raaha,” essaan.

¹³ Kiriisto seleye laaggooche? Anihi Baawuleenye goorat jeentetiin u massalaaba liikakaahe? Ommos maanti atin labaattissiye, magahaaya atin lakabaattissiye? Mele!

¹⁴ An Waakh kalaꞌd a ilaaba, iꞌdi tahe goytiin ka Kiriisba ichoow Gaayo on menye, et addane an baattissiye mele.

¹⁵ Et ꞌdeerka goytiin ka magahaaya lakabaattissiye yadeeh mele.

¹⁶ Aa, waha laka a kasooꞌhele, min Isteefana laka ani baattissiye. ꞌDooꞌda on menye, et addane an baattissiye an kasooꞌhelo mele.

¹⁷ A mehe Kiriisto ꞌdooꞌdi an baattissiyo mee isooerge, iꞌdaasenyi wihi us isooerge, a Wori Haaggane an cheeko. Wora la kharati yeedi weeli enenyet mee kacheeko. Uus ꞌdee omootti Kiriisto massalaaba ka yumuy miigtiche waayine.

Kiriisto a miigti Waakh ichoow kharati Waakh

¹⁸ Iꞌdi tahe ꞌdooꞌdi baabaa kijiro ka, wora massalaaba Kiriisto miinsan, a wori ꞌdalam on. Iꞌdaasenyi innohi Waakh inno ribo ka, wora a miigti Waakh.

¹⁹ Iꞌdi tahe wihi chiiran, “An kharati ꞌdooꞌdi kharayyee a baabiicha, mali ꞌdooꞌdi wihi buure garti la ꞌdole ilaaba.”

²⁰ ꞌDeerka ꞌdooꞌdi kharayyee meeke? Tagaammeti amurre meete? ꞌDooꞌdi weyti yeyyeed garti meeke? Ma jiraan! Waakh kharati ꞌdooꞌdi harrata ꞌdalam ma kayeelin a?

²¹ Iꞌdi tahe Waakh kharatiis ka wihi us gooche, ꞌdooꞌdi harrata kharaticho on ka Waakh ma abti. Wihi Waakh kahamaadicho a chirri jiti ꞌdalammoon liikhaato Wori Haaggane lacheeko ka, us ꞌdooꞌdi woraas rummeeste ribo.

²² ꞌDooꞌdi Yaꞌhuud wahanyeyyohi miigti Waakh tuso marma, ꞌdooꞌdi Giriig la kol dakkhan yeedi khara daagin ꞌdoona.

²³ Iꞌdaasenyi nah wori Kiriistohi massalaaba lakakaahe miinsan iche enenyet icheekna. Wora la ꞌdooꞌdi Yaꞌhuud daakki tarraantarricho iyateehe, yaafohi Yaꞌhuud ieheynan ka la, wora a yeedi ꞌdalam.

²⁴ Iꞌdaasenyi ꞌdooꞌdi Yaꞌhuud ichoow ki Yaꞌhuud ieheynane Waakh wahe ka, wora a koo Kiriistohi miigti Waakhenye toro la kharati Waakhe.

²⁵ Iꞌdi tahe wihi ꞌdalanki Waakh lakoog, kharati weeli enenyet a kussantahe, toro la wihi ꞌdarriti Waakh lakoog, miigti weeli enenyet a kussantahe.

²⁶ ꞌDooꞌd Kiriistokaaw, maanti Waakh atin wahe ꞌdooꞌdiiyye atin eheet kamalda bal. Mali weeli enenyet ka, buurtiin kharayyo ma eheynane, buurtiin la ꞌdooꞌdi weynaan khabo ma eheynane, buurtiin la goobi magah khabo laka ma kiimaatan.

²⁷ Iꞌdaasenyi Waakh wihi ꞌdooꞌdi harrata ꞌdalam ikhaato iche soobahche, ꞌdee ꞌdooꞌdi kharayyee lakhaanyo kadowa. Us wihi ꞌdooꞌdi harrata ꞌdarri ikhaato iche soobahche, ꞌdee ꞌdooꞌdi mimmiige lakhaanyo kadowa.

²⁸ Waakh wihi harrata ka magah ikhabin ichoow wihi ꞌdooꞌdi harrata ꞌdarraawo, ichoow wihi ꞌdooꞌdi harrata wohoo ikoogeynane soobahche, wihi ꞌdooꞌdi harrata wohoo khumman koog kabaabiiche.

²⁹ Waakh iꞌdane yeele, uus ꞌdee etoo kalday laka ortiis ka eylajine.

³⁰ Iꞌdaasenyi jeenteti wihi Waakh yeeluu, atin ichoow Yeesso Kiriisto ba a wohoo kalday. Kiriisto la kharati Waakh katimiyye inno liikayeele. Kharataas ka la Kiriisto ꞌdooꞌdi fiffissane inno kayeele toro la inno munyaache toro la inno gatte, uskeel inno kasoofure.

³¹ Maantaka iꞌdi liichiiruu, “Eti tuummane eylajin ꞌdoono wihi Kamur yeele kalday on a keeylajo.”