1 'Dessaloonika 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Jiroti Waakh kahamaadisso jira

¹ ꞌDooꞌd Kiriistokaaw ayti ꞌdaꞌddaboot, saggi atin jiroti Waakh kahamaadisso ijirtaan a atin abinne. Rumanka la iꞌdaas on yeessaan. Toolla la nahi nah ichoow atin ba Yeessohi Kamureene wohoo kalday nahe a atin hawwaassana, taba waha kakhakkhaya yeela.

² Iꞌdi tahe anto Yeessohi Kamureene ka, wihi nah atin abinne a garattaan.

³ Wihi Waakh atin kaꞌdoono kallaayo, a atinhi jiroti munyee jirtaane, ꞌdooꞌdi isidisan isileeurꞌdine,

⁴ toro la ebba jiti munyeenye inkaanyit ka saggi us sartiis ijeysati garti.

⁵ Iꞌdi ꞌdooꞌdi Waakh igaranne eti tuummane icho argaan ichohi leeurꞌdo imoono iitaahana.

⁶ Toro la etoo Kiriisto rummeeste jita ka iikhufine, ommos makhaabassiis aleeurꞌdin. Iꞌdi goorat nah atin inidahye nah atin itootoonnuu, Kamur eti tuummane uskeela yeele, moge kagutta.

⁷ Iꞌdi tahe Waakh jiroti biꞌdirenye lajiro ma inno iwahin. Iꞌdaasenyi a inno wahe ꞌdee jiroti munyee jirra.

⁸ Maantaka eti waha laabcho ꞌdiiꞌdo weeli enenyet menye, Waakkhi Rubeytiisti Munyee atin siicho iche ꞌdiiꞌddanyahe.

⁹ Toolla walah ꞌdooninti atin isꞌdoontaan miinsane atin laatahiine nah atin isoochiirro mele, a mehe Waakh rubeytiis saggi atin isiꞌdoontaan a atin abche.

¹⁰ Rumanka la ꞌdooꞌdi Kiriisto rummeeste boroofenhi Makedooniya kijiro tuumman a ꞌdoontaan. Iꞌdaasenyi ꞌdooꞌd Kiriistokaaw, a atin hawwaassanne, taba kakhaya weyti ꞌdoona.

¹¹ Iꞌdi amuri nah atin ibihinnuu, tirriinsada jiroti kowdo laa jira, ebba la wihi usu miinsan on hol a kadowo, toro la ebba dahanohiis ka hil a haaggicho a isgoollicho.

¹² Iꞌdaakka ꞌdooꞌdi Kiriisto irummeysan a atin inkaanyita, toro la et atin kanoossahiin mele.

Emeet Kiriisto

¹³ Toollaka ꞌdooꞌd Kiriistokaaw, atinhi wihi ꞌdooꞌd Kiriistoki tuume kayateeh wihicho abattaane ꞌdoonna, ꞌdee jeentetichuu iꞌdi ꞌdooꞌdi addane khajjeel ikhabin u ooyina.

¹⁴ A mehe chiꞌinno saggi Yeesso iyumuyye toro us omoot ikasookahe rummeysanni, saggaas on u saggi Waakh ꞌdooꞌdi Kiriisto rummeeste tuume, Yeesso ileesoolaabo a rummeysanna.

¹⁵ Waha toolla nah atin abinno a Yeedi Kamure, innohi jirraayi Kamur soonokhti, ꞌdooꞌdi Kiriisto kakhuufe tuume ortiis Kamur or ma kadowno.

¹⁶ A mehe Kamur rubeytiis a riira, amur bahcha, goobi Waakh kasookhubta, hooyi herti Waakhe ween ladaaga, arabi Waakh la ladaaga, ꞌdooꞌdi Kiriisto kakhuufe tuume la kolooraat omoot kasookaha.

¹⁷ Wahaas ꞌdubicho ka innohi uliba jirro sooꞌhaane serey inno lageecha, mirso goyaka inno tuumman ichoow Kamur ba serey ka kulanna. ꞌDeerka jirtuu tuummamba Kamur leejirra.

¹⁸ Taba giꞌde, yeedassa ka uur ismiigoocha.