1 Beetero 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Jiroti Waakh liijiro

¹ Maantaka sar Yeesso Kiriisto jeenteteen u sina a loomhiche gone, taba atin laka saggi us imasse imalda. Iꞌdi tahe eti sartiis sina loomhiche uskeel a kasoonokhte.

² Jeentetaas u jirotiisti addane harrata ka us soojiro, suujoonki enenyet imoono ma ijiro iꞌdaasenyi wihi Waakh ꞌdoono yeela.

³ Goorat ꞌhor jiroti atin jirteen ka wihi ꞌdooꞌdi Waakh igaran yeelo goosseene geeddi deer yeesseen. Wihi atin yeesseen a iꞌdi maanta sohoꞌddarri ichoow suujoonki liimoono ichoow meleefu. Wihi addan a daawohi biꞌdirenye enenyet sohoꞌddarri kalugꞌdo ichoow wahnaanki suujenye iyookkoyyohi waakkhakh lakayeessi lawahti.

⁴ Waha tuumman ka, aalassiinki oraat weyti atin kagirmeestaan chaꞌatin kola icho ikakhayine uskeeli buurenye icho iꞌdaanu yeelaan iyeelin. Icho la abaari noole atin korchaan.

⁵ Iꞌdaasenyi ꞌdooꞌda wihi jiroticho miinsane us Waakkhi ꞌdooꞌdi jiro ichoow ki tuume ba hukkumo idowdowo ma kabahsataan.

⁶ Jeentetuu la Wori Haaggan ꞌdooꞌdi tuume laka a liicheeke, ꞌdee sarticho iꞌdi enenyet u lahukkuma, iꞌdaasenyi rubey ka jiraan saggi Waakh ijiruu.

⁷ Harra ꞌdubiche kola a yitah. Maantaka mujjum malda toro la isjeycha uus ꞌdee wohoo weysihiin targeyine.

⁸ Walah tuumman ꞌdirihicho la, weyti isꞌdoona. Iꞌdi tahe ꞌdoonine uskeeli buurenye kakutta.

⁹ Goobassiin ka nyunnyuuto laan ismartiisda.

¹⁰ Ebba siimbaaw us ꞌhele ka ꞌdooꞌdi addan a ihilo. Iꞌda ka ebba haaggi Waakhe buurenye fil ittaawe mujjume dakhta.

¹¹ Eti siintiis ti Yeedi Waakh lacheeko tahe, yeedaas a cheeko giꞌde. Eti siintiis ti us ꞌdooꞌdi addan gargaaro tahe, miigti Waakh siiche tuumman ka ꞌdooꞌdi addan a gargaaro. Iꞌda ka walah tuumman ka Yeesso Kiriisto ka Waakh a laweynaacha. Us ba jirtuu tuummamba inkaanyit ichoow miig ꞌhela. Aamiin.

Sinati ꞌdooꞌd Kiriisto lakawaaricho

¹² Aalasseeyki an weyti ꞌdoono, sinayyohi ꞌdabenye atin yahame atin kajo akagirmeysanna iꞌdoo wohoo girmee atin kayitaaheen u.

¹³ Iꞌdaasenyi hamaada jeenteti atin Kiriisto sina ileegisantaane ꞌdee weyti ihamaaddaan maanti weynaantiis enenyet liisoobabbakkaahicho.

¹⁴ Chirri jeenteti at koo Kiriisto itahe lakaabaaro, ati Waakh a kimaale. Iꞌdi tahe Rubeyti weynaan lehe toro Rubeyti Waakhe a kileejirta.

¹⁵ Iꞌdaasenyi uus etiinkoo kalday laka jeenteti us enenyet iyigis ommos us hatto ileeyahe ommos jeenteti us uskeeloo iyeele ommos us wohoo wihiis ieheynan ikaaddiho sina liiomhin.

¹⁶ Iꞌdaasenyi chiꞌ jeenteti at koo Kiriisto itahuu sina kitaham uuryaawine, jeenteti magah Kiriisto liikaawahuu Waakh kooli.

¹⁷ Iꞌdi tahe ibeen a yitah ki Waakh enenyet hukkumo. Chiꞌ innohi nyaakhuti Waakhe inno lakasookhabti la, ꞌdooꞌdi Wori Haaggane Waakh rummeysawwaaye sinati isoobahto a too geeddohe?

¹⁸ Iꞌdi Chiirnaanneti Waakh tadeeh u, “Chirri ꞌdooꞌdi fiffissan ba ribnaanki laribo ꞌhool yahe, ꞌdooꞌdi Waakh igaran ichoow ki uskeel leh intaakka mee?”

¹⁹ Maantaka eti tuummane sinati taham ichoow wihi Waakh ꞌdoono ba israahaan, Waakkhi lakakhuufo walah tuumman soouume dahantiis a isgesso. Toro la haaggi us yeelo orey a ileesohti.