YOHANES 9 - JANJAI BLAU Lem Bahaso Jang Bebilai

Yesus menea tun sutai ngeliak igai

¹ Waktau Yesus gidong liwet, Si kemliak suang tun sutai.

² Penotoa-penotoa-Ne betanye ngen Si, “Rabi, api de menea duso, tun yo suang jano tun tuaine, sehinggo si laher sutai?”

³ Jawab Yesus, “Iso si ngen iso kulo tun tuaine, tapi supayo tun nam kemliak kuaso Allah bekerjo neak lem diraine.

⁴ Ite arus kemerjo kerjo Si de mutus Uku, selamo masiak kebilai; bakea teko kelemen neak ipe coa ade suang tun de dapet bekerjo.

⁵ Seke'an Uku neak lem dunio, Uku ba te'ang dunio.”

⁶ Sesudo Si madeak kutene o, Si temkek moi taneak, ngen menea luluk ngen tekek o, lajau melomokne pado matei tun sutai nano.

⁷ Ngen madeak ngen si: “Lalauba, mpuk ba awoknu lem Kulam Siloam.” (Siloam taine, ‘De nutus’.) Mako lalauba tun o, si mpuk awokne. Lajau belek ngen mateine sudo dapet ngeliak igai.

⁸ Tapi tetanggo-tetanggone ngen tobo'o, de bel o kemnalne awei pengemis, madeak, “Iso si yo, de bogoa temot ngen ngemis?”

⁹ Ade de madeak, “Benea, siba dio.” Ade kulo de madeak, “Iso, tapi si serai ngen tun o.” Tun de sutai'o madeak, “Benea, uku ba si.”

¹⁰ Lajau padeak tobo'o ngen si, “Awei ipe matainu pacok ngeliak?”

¹¹ Jawabne, “Tun de sembut Yesus o menea luluk, melomokne neak mataiku ngen madeak ngen uku: Lalauba moi Siloam ngen mpukba awoknu. Lajau uku lalau ngen sesudo uku mpuk awokku, uku dapet ngeliak.”

¹² Lajau tobo'o madeak ngen si, “Neak ipe Si?” Jawabne, “Uku coa namen.”

Tun Farisi semlidik ca'o kema'en'o

¹³ Lajau tobo'o mbin tun de nanone sutai o ngen tun-tun Farisi.

¹⁴ Waktau Yesus menea luluk ngen menea tun sutai o pacok kemliak, adeba bilai Sabat.

¹⁵ Kerno o tun-tun Farisi betanye igai ngen si, awei ipe mataine pacok kemliak. Jawabne, “Si melomok luluk neak mataiku, lajau uku mpuk diraiku, ngen uyo pacok kemliak.”

¹⁶ Lajau padeak pa'o tun-tun Farisi o, “Tun yo coa teko kunei Allah, sebab si coa dulai bilai Sabat.” Tapi de luyen madeak, “Awei ipe suang tun beduso dapet menea tando mujizat de awei yo?” Lajau timboa ba selisiak neak antaro tobo'o.

¹⁷ Padeak tobo'o igai ngen tun sutai o, “Jano padeaknu tetang Si, kerno Si de menea ko pacok ngeliak?” Jawabne, “Si suang nebai.”

¹⁸ Tapi tobo penguaso Yahudi o coa pecayo, bahwo nanone si sutai ngen tembei dapet kemliak igai, sapei tobo'o menok tun tuai ne.

¹⁹ Ngen betanye ngen tobo'o, “Dio anoknu, de udi madeak bahwo si laher sutai? Amen awei'o awei ipe si uyo dapet ngeliak?”

²⁰ Jawab tun tuaine, “De keme namen adeba bahwo si yo anok keme ngen kunei laher sutai.

²¹ Awei ipe si uyo pacok kemliak, keme coa namen, api de menea mataine pacok kemliak, keme coa namen kulo. Tanye ngen si, si bi lai, si bakea miling utuk diraine suang.”

²² Tun tuaine madeak awei yo, kerno tobo'o saben ngen tun-tun Yahudi, sebab tobo penguaso Yahudi o bi sepakat bahwo tiep tun de makau si awei Rajo Penyelamat, coa buliak igai masuk umeak semyang.

²³ Do'oba sebabne tun tuaine madeak, “Si bi lai, tanye ba ngen si suang.”

²⁴ Lajau tobo'o menok utuk keduai kilaine tun de nanone suati'o. Tobo'o madeak ngen Si, “Nadeakba de benea neak adep Allah; keme namen bahwo tun o tun beduso.”

²⁵ Jawabne, “Jano tun o tun beduso, Uku coa namen. Tapi do hal uku namen, adeba bahwo Uku nanone sutai, ngen uyo pacok ngeliak.”

²⁶ Padeak tobo'o ngen Si, “Jano de nea-Ne ngen udi? Awei ipe Si menea matai nune pacok ngeliak?”

²⁷ Jawabne ngen tobo'o, “Sudo uku madeak ngen udi ngen udi coa temi'uk, getai udi lok temi'ukne igai? Mukin udi lok jijai penotoa-Ne kulo?”

²⁸ Samo mino tobo'o madeak ngen si, “Ko penotoa tun o, tapi keme penotoa-penotoa Musa.

²⁹ Keme namen bahwo Allah bi melei firman ngen Musa, tapi tetang si o keme coa namen kunei ipe Si teko.”

³⁰ Jawab tun o ngen tobo'o, “Selle kulo bahwo udi coa namen kunei ipe Si teko, gidong Si bi menea mataiku dapet ngeliak igai.

³¹ Ite namen bahwo Allah coa temi'uk tun-tun beduso, tapi tun-tun malim ngen menea kelok-Ne.

³² Kunei bel'o sapei uyo coa perneak temi'uk bahwo ade tun de menea tun sutai kunei laher dapet ngeliak.

³³ Amen tun yo coa teko kunei Allah, Si coa dapet menea jejano.”

³⁴ Jawab tobo'o ngen Si, “Ko yo laher samo sekilai lem duso ngen Ko lok majea keme?” Lajau tobo'o musir si moi luea.

Sutai seca'o rohani

³⁵ Yesus temi'uk bahwo si bi musir moi luea ngen tobo'o. Sesudo'o Si temau ngenne ngen madeak, “Pecayoba ko ngen Anok Manusio?”

³⁶ Jawabne, “Api si, Tuan? Supayo uku pecayo ngen-Si.”

³⁷ Padeak Yesus ngen si, “Ko iso bae kemliak Si; tapi Si de gidong miling ngen ko, Siba do'o!”

³⁸ Padeakne, “Uku pecayo, Tuhan!” Lajau si sujud nyembeak-Ne.

³⁹ Lajau padeak Yesus, “Uku teko moi lem dunio utuk mukum, supayo tun sutai dapet ngeliak, ngen tun de ngeliak jijai sutai.”

⁴⁰ Kecek-kecek o teni'uk ngen kekedau tun Farisi de ade neak di. Tobo'o madeak ngen Si, “Jano keme kulo sutai?”

⁴¹ Jawab Yesus ngen tobo'o, “Sekirone udi sutai, udi coa beduso. Tapi kerno udi madeak: ‘Keme kemliak,’ mako tep ba dusonu.”