YOHANES 6 - JANJAI BLAU Lem Bahaso Jang Bebilai

Yesus melei kembuk lemo ribau tun

¹ Sesudo'o Yesus berakat moi dipoa Daneu Galilea, de senbut kulo Daneu Tiberias.

² Tun dau beroron temotoa Si, kerno tobo'o kemliak mujizat-mujizat de neane te'adep tun-tun bolon.

³ Lajau Yesus kenek moi das tebo ngen temot neak di ngen penotoa-penotoa-Ne.

⁴ Ngen Paskah, bilai rayo tun Yahudi, bi pa'ok.

⁵ Ketiko Yesus demnong sekeliling-Ne, ngen kemliak bahwo tun dau beroron teko ngen Si, madeak ba Si ngen Filipus, “Neak ipe ite dapet mukua kembuk, supayo tobo'o dapet mukmei?”

⁶ Hal'o de nadeak-Ne utuk cenubo Filipus, sebab Si suang namen jano de lok nea-Ne.

⁷ Jawab Filipus, “Ruti gone duai otos dinar coa bakea cukup utuk tobo'o, debat bae masing-masing dapet degit.”

⁸ Saleak suang kunei panotoa-penotoa-Ne adeba Andreas, pasuak Simon Petrus, madeak ngen-Si,

⁹ “Neak yo ade suang anok, de temuan lemo ruti jelai ngen duai kan. Tapi jano taine o utuk tun de kembiak dau yo?”

¹⁰ Nadeak Yesus, “Meluakba tun-tun o temot.” Ade kulo neak penan o dau dukut. Lajau temot ba tun-tun o, kiro-kiro lemo ribau semanei kedaune.

¹¹ Lajau Yesus mok ruti o, mucep syukur ngen magiakne ngen tobo'o de temot neak di, awei o kulo nea-Ne ngen kan-kan o, kekedau de tobo'o kelok.

¹² Sesudo tobo'o mbuk sapei kenyang, Si madeak ngen penotoa-penotoa-Ne, “Lungguk ba ti'eak-ti'eak de blebiak supayo coa ade de tekuang.”

¹³ Tobo'o melunggukne, ngen semi'ing duai belas bokoa penuak ti'eak-ti'eak ruit sesudo nembuk tun dau.

¹⁴ Ketiko tun tun o kemliak tando mukzijat de sudo nea-Ne, tobo'o madeak, “Si yo benea-benea nebai de bakea teko moi lem dunio.”

¹⁵ Kerno Yesus namen, bahwo tobo'o lok teko ngen lok mbin Si ngen pakso utuk jemijai Si Rajo, Si nyikir igai moi tebo, suang dirai.

Yesus paneu das bioa

¹⁶ Ketiko bilai muloi kelemen, penotoa-penotoa Yesus lalau moi daneu, lajau kenek moi biduk.

¹⁷ Ngen nyebe'ang moi Kapernaum. Bilai sudo kelem Yesus ati kulo teko temau tobo'o.

¹⁸ Sementaro'o laut begelumbang kerno tiupan ibut de'es.

¹⁹ Sesudo tobo'o kemayuak kiro-kiro lemo ngen enum kilo meter uak ne, tobo'o kemliak Yesus paneu neak bioa magea biduk o. Mako tobo'o saben.

²⁰ Tapi Yesus madeak ngen tobo'o, “Dioba Uku, jibeak saben!”

²¹ Tobo'o lok kemnek Si moi lem biduk, ngen seketiko o kulo biduk o sapei neak patei de tobo'o tenujau.

Tun dau mesoa Yesus

²² Pado menne tun dau, de masiak tinggea neak dipoa, kemliak bahwo neak di coa ade biduk seluyen de do nano ngen bahwo Yesus coa milau kemnek moi biduk o besamo-samo ngen panotoa-penotoa-Ne, ngen bahwo penotoa-penotoa-Ne bae de berakat.

²³ Sementaro o kekedau biduk luyen teko kunei Tiberias pa'ok moi penan tobo'o mbuk ruti, sesudo Tuhan mucep syukur dasne.

²⁴ Ketiko tun dau kemliak, bahwo Yesus coa ade neak di ngen penotoa-penotoa-Ne kulo coa, tobo'o kenek moi biduk-biduk o lajau berakat moi Kapernaum utuk mesoa Yesus.

Ruti kehidupan

²⁵ Ketiko tun dau temau Yesus neak dipoa laut o, tobo'o madeak ngen Yesus, “Rabi, tengen Ko sapei neak yo?”

²⁶ Yesus jemawab, “Sesungguakne Uku madeak ngen udi, udi mesoa Uku iso kerno udi bi kemliak mujizat-mujizat, tapi kerno ko bi mbuk ruti o sapei kenyang.

²⁷ Bekerjoba, iso utuk kembuk de dapet benaso, tapi utuk kembuk de beta'en sapei ngen idup de kekal, de bakea nelei Anok Manusio ngen udi; sebab Siba de sudo nsah ngen Allah Bapa.”

²⁸ Lajau nadeak tobo'o ngen-Si, “Jano de harus keme menea, supayo keme kemerjo kerjo-kerjo de kenlok Allah?”

²⁹ Jawab Yesus, “Dioba kerjo de kenlok Allah, adeba lok ba udi pecayo ngen-Si de sudo nutus Allah.”

³⁰ Tobo'o madeak ngen-Si, “Tando jano de Ko menea, supayo keme dapet kemliakne ngen pecayo ngen Ko? Jano de Ko kenerjo?

³¹ Ninik puyang keme bi sudo mbuk manna neak Benei Libea, awei ade tetulis: Tobo'o neleine mbuk ruti kunei surgo.”

³² Lajau nadeak Yesus ngen tobo'o, “Sesungguakne Uku madeak ngen udi, iso Musa, seluyen Bapa-Ku de melei udi ruti kunei surgo ngen ko.

³³ Kerno ruti de kunei Allah adeba ruti de tu'un kunei surgo ngen de melei idup ngen dunio.”

³⁴ Mako nadeak tobo'o ngen Si, “Tuan, keleiba keme ruti o terus.”

³⁵ Nadeak Yesus ngen tobo'o, “Ukuba ruti de melei idup; api bae de teko ngen Uku, si coa bakea perneak nyemen igai, ngen api bae de pecayo ngen Uku, si coa bakea perneak haus igai.

³⁶ Tapi Uku bi madeak ngen udi: sesungguakne udi bi kemliak Uku, tapi udi coa pecayo.

³⁷ Kute de bi melei Bapa ngen Uku bakea teko ngen Uku, ngen api bae de teko ngen Uku, si coa bakea Uku muang.

³⁸ Sebab Uku bi tu'un kunei surgo iso utuk menea kelok-Ku, seluyen kelok Si de sudo mutus Uku.

³⁹ Dioba kelok Si de sudo mutus Uku: adeba supayo kunai kute de sudo neleine ngen Uku jibeak ade de nyep, tapi supayo Uku midup igai pado Bilai Kiamat.

⁴⁰ Sebab dioba kelok Bapa-Ku: Adeba supayo tiep tun de kemliak Anok ngen de pecayo ngen-Si dapet idup de kekal, ngen supayo Uku midup igai pado Bilai Kiamat.”

⁴¹ Lajau ngerunyam ba tun Yahudi tetang Si, kerno Si bi madeak, “Ukuba ruti de sudo tu'un kunei surgo.”

⁴² Nadeak tobo'o, “Iso Si yo Yesus, Anok Yusuf. Indok bak-Ne ite namen? Awei ipe Si dapet madeak: Uku bi tu'un kunei surgo?”

⁴³ Jawab Yesus, “Jibeak udi gerunyam.

⁴⁴ Coa ade suang tun de dapet teko ngen Uku, amen si coa tenarik Bapa de mutus Uku, ngen si bakea Uku midup igai pado Bilai Kiamat.

⁴⁵ Ade tetulis lem Kiteb Nebai-nebai: Tobo'o kute bakea najea ngen Allah. Ngen tiep tun, de sudo temi'uk ngen belajea kunei Bapa, teko ngen Uku.

⁴⁶ Hal'o coa berartai, bahwo ade tun de sudo kemliak Bapa. Cuma Si de teko kunei Allah, Siba de sudo kemliak Bapa.

⁴⁷ Uku madeak ngen udi: Sesungguakne api bae de pecayo, si temuan idup de kekal.

⁴⁸ Ukuba ruti idup.

⁴⁹ Ninik puyangnu bi mbuk manna neak benea libea ngen tobo'o de bi matei.

⁵⁰ Dioba ruti de tu'un kunei surgo: Api bae de mbuk kuneine, si coa bakea matei.

⁵¹ Uku ba ruti de melei idup de sudo tu'un kunei surgo. Amen suang tun mbuk ruti yo, si bakea idup seka'en ne, ngen ruti de bakea Uku melei o adeba daging-Ku, de bakea uku melei utuk idup dunio.”

⁵² Tun-tun Yahudi kulo betekea antaro sesamo tobo'o ngen madeak, “Awei ipe Si yo dapet melei dagingne ngen ite utuk nembuk.”

⁵³ Mako nadeak Yesus ngen tobo'o, “Uku nadeak ngen udi, sesungguakne amen udi coa mbuk daging Anok Manusio ngen menem daleak-Ne, udi coa temuan idup neak lem dirainu.

⁵⁴ Api de mbuk daging-Ku ngen mbuk daleak Ku, si temuan idup de kekal ngen Uku bakea midupne pado Bilai Kiamat.

⁵⁵ Sebab daging-Ku adeba benea-benea kembuk ngen daleak-Ku adeba benea-benea meneman.

⁵⁶ Tun de mbuk daging-Ku ngen menem daleak-Ku, tep jijai do ngen Uku, ngen Uku ngen si.

⁵⁷ Bapa de idup o, mutus Uku ngen Uku kulo idup kunei Bapa. Awei o kulo tun de mbuk daging-Ku bakea idup kunei Uku.

⁵⁸ Dioba ruti de tu'un kunei surgo: iso ruti awei de nembuk ninik puyangnu. Kerno sesudo mbuk ruti o, tobo'o matei kulo. Tapi tun de mbuk ruti yo bakea idup selamo-lamone.”

⁵⁹ Kutene yo nadeak Yesus neak Kapernaum ketiko Si majea neak umeak semyang.

Kecek-kecek de melei idup kekal

⁶⁰ Sesudo'o temi'uk kutene o dau kunei penotoa-penotoa Yesus de madeak, “Ajaran yo kembiak saro, api de sanggup temi'ukne?”

⁶¹ Yesus de neak lem atei-Ne namen bahwo penotoa-penotoa-Ne ngerunyam tetang hal o, nadeak ngen tobo'o, “Jano ajaran-ajaran o seminggung ko?

⁶² Awei ipe amen udi kemliak Anok Manusio kenek moi penan neak ipe Si ayokne ade?”

⁶³ Roh Allah de melei idup, daging samo sekilai coa beguno. Kecek-kecek de Uku madeak ngen udi adeba roh ngen idup.

⁶⁴ Tapi neak antaro udi ade de coa pecayo.” (Sebab Yesus namen kunei semulo, api de coa pecayo ngen api de bakea semreak Si.)

⁶⁵ Lajau Si madeak, “Sebab o bi Uku madeak ngen udi: coa ade suang kulo de dapet teko ngen Uku, amen Bapa coa melei karunione ngen si.”

⁶⁶ Muloi saat o dau penotoa-Ne mondor dirai ngen coa igai temotoa Si

⁶⁷ Lajau nadeak Yesus ngen keduai belas penotoa-Ne, “Jano udi coa lok lalau kulo?”

⁶⁸ Jawab Simon Petrus ngen-Si, “Tuhan, ngen api keme bakea lalau? Kecek-Nu adeba kecek idup de kekal.

⁶⁹ Ngen keme bi pecayo ngen namen bahwo Ko ba de sucai kunei Allah.”

⁷⁰ Jawab Yesus ngen tobo'o, “Uku suang de sudo miliak udi de duai belas yo. Tapi suang neak antaro udi adeba Iblis.”

⁷¹ De Yesus maksud adeba Yudas anok Simon Iskariot. Sebab siba de bakea semreak Yesus, kunyau Yudas adeba suang neak antaro keduai belas penotoa o.