YOHANES 5 - JANJAI BLAU Lem Bahaso Jang Bebilai

Kena'en pado bilai sabat neak kulam Betesda

¹ Sesudo'o ade bilai rayo tun Yahudi, ngen Yesus berakat moi Yerusalem.

² Neak Yerusalem pa'ok Pintu Gerbang Bebirai ade do kulam, de lem bahaso Ibrani senbut ngen Betesda; ade lemo pematangne.

³ Neak pematang-pematang'o tegulek tun dau de bolon: tun-tun sutai, tun-tun ciket ngen tun-tun pakuak. [Tobo'o mbot unyak bioa kulom'o.

⁴ Sebab sewaktau-waktau tu'un malaikat Tuhan moi kulam o ngen mengunyak bioa o; api bae de dute masuk moi lemne sesudo unyak bioa'o, jijai kaen, jano bae olonne.]

⁵ Neak di ade suang tun de sudo telau puluak delapen taun ke'anne bolon.

⁶ Ketiko Yesus kemliak tun'o gulek neak di ngen kerno Si namen, bahwo bi'an lem keadaan o, madeak ba Si ngen si, “Ko lok ka'en?”

⁷ Jawab tun bolon o ngen Si, “Tuan, coa ade tun de mbin uku moi lem kulam o ketiko bioane muloi unyak, ngen sementaro uku lalau moi kulam o, tun luyen sudo tu'un lebiak dute.”

⁸ Nadeak Yesus, “Kelongon ba, naket tikeanu ngen paneu ba.”

⁹ Pado waktau o kulo ka'en ba tun o lajau si naket tikeane ngen paneu. Tapi bilai o bilai Sabat.

¹⁰ Kerno o tobo penguaso Yahudi madeak ngen tun de tembei ka'en o, “Bilai yo bilai Sabat ngen ko coa buliak maket tikeanu.”

¹¹ Tapi Si jemawab, “Tun de sudo kema'en uku, Si de madeak ngen uku: Naketba tikeanu ngen paneuba.”

¹² Tobo'o batanye ngen si, “Api tun o de madeak ngen udi: Naketba tikeanu ngen paneuba?”

¹³ Tapi tun de tembei ka'en o coa namen api tun o, sebab Yesus sudo nyep neak tengeak-tengeak tun dau neak penan o.

¹⁴ Sesudo o Yesus temau ngen si lem Bait Allah lajau madeak ngen si, “Tinget udi bi ka'en. Jibeak menea duso igai, supayo jibeak terjijai de lebiak kidek igai ngen udi.”

¹⁵ Tun o keluea, lajau cemrito ngen tobo penguaso Yahudi, bahwo Yesusba de sudo kema'en si.

¹⁶ Kerno o, tobo penguaso Yahudi berusaho semaro Yesus, kerno Si menea hal-hal o pado bilai Sabat.

¹⁷ Tapi Si madeak ngen tobo'o, “Bapa-Ku kerjo sapei uyo, mako Uku kerjo kulo.”

¹⁸ Sebab o tobo penguaso Yahudi tambeak berusaho utuk munuak Si, iso bae kerno Si melanggea peraturan Sabat, tapi pulo kerno Si madeak bahwo Allah adeba Bapa-Ne suang. Ngen awei yo si semrai dirai-Ne ngen Allah.

Saksai Yesus tetang dirai-Ne

¹⁹ Mako Yesus jemawab tobo'o, nadeak-Ne, “Sesungguakne Uku madeak ngen udi, Anok coa dapet kemerjo sesuatau kunei dirai-Ne suang, amen Si coa dapet kemliak Bapa kemerjone. Sebab, jano de kenerjo Bapa, kenerjo Anok.

²⁰ Sebab Bapa kemasiak Anok ngen Si temunjuk ngen Si kute sesuatau de kenerjo-Ne suang, bahkan Si bakea tenunjuk ngen Si kerjo de lebiak lai igai kunei kerjo o, sehinggo udi jijai sele.

²¹ Sebab serai awei Bapa midup igai tun-tun matei, awei yo kulo Anok midup igai api bae de kelok Ne.

²² Bapa coa mukum api bae, seluyen bi semereak ukuman o kutene ngen Anok,

²³ supayo kute tun mego Anok awei tobo'o mego Bapa. Api bae coa mego Anok, si kulo coa mego Bapa, de mutus Si.

²⁴ Sesungguakne Uku madeak ngen ko, ‘Api bae bi temi'uk kecek-Ku ngen pecayo ngen Si de mutus Uku, si temuan idup de kekal ngen coa milem nukum, sebab si sudo baliak kunei lem maut moi lem idup.’

²⁵ Uku madeak ngen udi, ‘Sesungguakne waktaune bakea sapei ngen sudo sapei, bahwo tun-tun matei bakea temi'uk sa'ei Anok Allah, ngen tobo'o de temi'ukne, bakea idup.’

²⁶ Sebab serai awei Bapa temuan idup lem dirai-Ne suang, awei yo kulo nelei-Ne Anok temuan idup lem dirai-Ne suang.

²⁷ Si bi melei kuaso ngen Si utuk mukum, kerno Si adeba Anok Manusio.

²⁸ Jibeakba udi sele ngen hal o, sebab waktaune bakea sapei, bahwo kute tun de neak lem kubua bakea temi'uk sa'ei-Ne.

²⁹ Ngen tobo'o de menea baik bakea keluea ngen idup igai utuk idup de kekal. Tapi tobo'o de menea kidek bakea idup igai utuk nukum.”

Bukti-bukti tetang Yesus

³⁰ “Uku coa dapet menea jano bae kunei dirai-Ku suang. Uku mukum sesuoi ngen jano de Uku temi'uk. Ngen ukuman-Ku adea, sebab Uku coa temotoa kelok-Ku suang, seluyen kelok-Ne de mutus Uku.

³¹ Amen Uku besaksai tetang dirai-Ku suang, mako saksai-Ku coa benea.

³² Ade de luyen besaksai tetang Uku ngen Uku namen, bahwo saksai de nelei-Ne tetang Uku adeba benea.

³³ Ko bi mbo utusan ngen Yohanes ngen si bi saksai tetang sebeneane.

³⁴ Tapi Uku coa perlu saksai kunei manusio, tapi Uku madeak hal yo, supayo udi selamat.

³⁵ Yohanes adeba awei lapu de idup ngen becahayo ngen ko cuma lok midep seketiko bae cahayone o.

³⁶ Tapi Uku temuan suatu saksai de lebiak peting kunei saksai Yohanes, adeba kute kerjo de senereak Bapa ngen Uku, supayo Uku kemerjone. Kerjo o kulo de kenerjo-Ku uyo, ngen do o ba de melei saksai tetang Uku, bahwo Bapa de mutus Uku.

³⁷ Bapa de mutus Uku, Siba de sudo melei saksai tetang Uku. Ko coa perneak temi'uk sa'ei-Ne, rupe-Ne coa perneak udi kemliak.

³⁸ Firman-Ne coa tetep neak lem dirainu, sebab ko coa pecayo ngen-Si de nutus-Ne.

³⁹ Udi semlidik Kiteb Sucai, sebab udi sako bahwo neak lem-Ne udi temau idup de kekal. Tapi kunyau Kiteb Sucai o melei saksai tetang Uku.

⁴⁰ Ko coa lok teko ngen Uku utuk dapet idup o.

⁴¹ Uku coa perlu nujai kunei manusio.

⁴² Tapi tetang udi, memang Uku namen neak lem ateinu udi coa temuan kasiak te'adep Allah.

⁴³ Uku teko lem gen Bapa-Ku ngen udi coa temimo Uku. Amen tun luyen teko das genne suang, udi bakea temimo si.

⁴⁴ Awei ipe koi dapet pecayo, amen udi de temimo hormat suang tun kunei de luyen, ngen coa mesoa hormat de teko kunei Allah de Esa?

⁴⁵ Jibeak udi sako bahwo Uku bakea mukum udi neak adep Bapa. De mukum udi adeba Musa, ngen si ko mpek harapan.

⁴⁶ Amen udi pecayo ngen Musa, tau udi bakea pecayo kulo ngen Uku, sebab si bi sudo temulis tetang Uku.

⁴⁷ Tapi amen udi coa pecayo ngen jano de tenulisne, awei ipe udi bakea pecayo ngen jano de Uku madeak?”