YOHANES 2 - JANJAI BLAU Lem Bahaso Jang Bebilai

Perkawinan neak kana

¹ Duai bilai sesudo'o ade de nikeak neak Kana de neak Galilea, ngen indok Yesus ade neak di.

² Yesus ngen penotoa-penotoa-Ne nundang kulo neak penan nikeak'o.

³ Ketiko neak pesta'o ku'ang anggur, indok Yesus madeak ngen Yesus, “Tobo'o ku'ang anggur.”

⁴ Madeak Yesus ngen indok ne, “Lok jano indok ngen Uku? Waktau-Ku ati sapei.”

⁵ Tapi indok Yesus madeak ngen pelayan-pelayan, “Jano de nadeak-Ne ngen udi, kenrejo ba do'o!”

⁶ Neak di ade num tong de sendio utuk mpuk penotoa adat tun Yahudi. Tiep tong'o si'ingne sotos liter.

⁷ Yesus madeak ngen pelayan-pelayan'o, “Si'ing ba tong-tong'o penuak ngen bioa.” Tobo'o semi'ingne sapei penuak.

⁸ Lajau nadeak Yesus ngen tobo'o, “Uyo cidokba ngen mbin ba ngen pemipin pesta.” Lajau tobo'o mbinne.

⁹ Pemipin pesta'o kemcep bioa de sudo bubeak jijai anggur'o. (Si coa namen kunei ipe tekone anggur'o tapi tobo pelayan-pelayan namen.) Pemipin pesta'o menok sematen,

¹⁰ ngen madeak ngen si, “Tiep tun midang anggur de baik dute ngen sesudo tun pues menem, baru de ku'ang baik. Tapi ko ma'ik anggur de baik sapei uyo!”

¹¹ Hal'o nea Yesus neak Kana de neak Galilea, sebagoi de pertamo kunei. Mujizat-mujizat-Ne ngen'o bi melei bukti kemulioan-Ne. Penotoa-penotoa-Ne pecayo ngen-Si.

¹² Sesudo'o Yesus lalau moi Kapernaum, besamo-samo ngen indok-Ne ngen pasuak-pasuak-Ne ngen panotoa-penotoa-Ne. Ngen tobo'o tinggea neak di kedau bilai bae.

Yesus masuk moi Umeak Tuhan

¹³ Ketiko Bilai Rayo Paskah tun Yahudi bi pa'ok, Yesus berakat moi Yerusalem.

¹⁴ Neak latet Bait Allah kemliak-Ne pedagang-pedagang sapai, bebirai, burung daro, ngen tukang tukar caci temot neak di.

¹⁵ Yesus menea cambuk kunei tilai lajau musir kute benatang kunei Bait Allah baik sapai, bebirai. Mija-mija penan tukar caci genulekne.

¹⁶ Yesus madeak ngen pedagang-pedagang burung daro'o, “Mok kutene yo kunei piyo. Jibeak udi menea Umeak Bapa-Ku ijai penan jagea!”

¹⁷ Lajau tinget ba penotoa-penotoa-Ne, bahwo ade tetulis, “Cito Uku utuk umeak-Nu bakea mbem atei-Ku.”

¹⁸ Tobo penguaso Yahudi temtang Yesus, nadeakne, “Tando jano de dapet udi temunjuk ngen keme, bahwo Ko berhok menea awei yo?”

¹⁹ Yesus jemawab, “Nubuak ba Bait Sucai yo, ngen lem telau bilai Uku bakea temgokne igai!”

²⁰ Lajau madeak tun Yahudi ngen Si, “Pat puluak enum taun tun temgok Bait Sucai yo. Ngen Ko dapet temgokne cuma lem telau bilai?”

²¹ Tapi de maksud-Ne ngen Bait Sucai adeba awok-Ne suang.

²² Kerno'o sesudo Si idup igai kunei antaro tun matei, penotoa-penotoa-Ne tinget bahwo hal'o de nadeak-Ne, ngen tobo'o kulo pecayo ngen Kiteb Sucai ngen kecek de sudo nadeak Yesus.

Yesus kemnal kute tun

²³ Sementaro Si neak Yerusalem selamo Bilai Rayo Paskah, dau tun pecayo lem gen-Ne, kerno tobo'o bi kemliak tando-tando mujizat de nadeak-Ne.

²⁴ Tapi Yesus suang coa pecayo tobo'o, kerno Si kemnal kute tobo'o.

²⁵ Coa perlu suang tun bersaksai ngen-Si tetang manusio, sebab Si namen jano de ade neak lem atei manusio.