YOHANES 19 - JANJAI BLAU Lem Bahaso Jang Bebilai

¹ Lajau Pilatus mok Yesus ngen meluak tun melipai.

² Prajurit-prajurit menea do Mahkota tebok ngen mpekne neak das ulau Yesus. Tobo'o mpek jubah ungu ngen Si.

³ Samo maju moi adep tobo'o madeak, “Salam, hoi rajo tun Yahudi!” Lajau tobo'o tempok papea-Ne.

⁴ Pilatus keluea igai ngen madeak ngen tobo'o, “Kemliakba, uku mbin Si keluea ngen udi, supayo udi namen bahwo Uku coa dapet saleak jano bae ngen Si.”

⁵ Lajau Yesus keluea, makei mahkota tebok ngen makei jubah ungu. Pilatus madeak ngen tobo'o, “Kemliakba tun'o!”

⁶ Waktau imem-imem kepalo ngen penjago-penjago o kemliak Si, menggang ba tobo'o, “Senalibba Si, senalibba Si!” Nadeak Pilatus ngen tobo'o, “Mok Si ngenko bae de senalibne; sebab uku coa dapet saleak jano bae kunei Si.”

⁷ Jawab tun-tun Yahudi o ngen si, “Keme temuan ukum ngen temurut ukum Si harus matei, sebab Si manggep dirai-Ne awei Anok Allah.”

⁸ Waktau Pilatus temi'uk kecek o si betambeak saben,

⁹ lajau si masuk igai moi lem istana gubernur, madeak ngen Yesus, “Kunei ipe asal-Nu?” Tapi Yesus coa melei jawab ngen si.

¹⁰ Kerno o, nadeak Pilatus ngen Si, “Ko coa lok miling ngen uku? Coa ko namen bahwo Uku bekuaso utuk mbebas Ko, ngen bekuaso kulo utuk semalib Ko?”

¹¹ Yesus jemawab, “Ko coa temuan kuaso jano bae te'adep Uku, amen kuaso o coa nelei ngen ko kunei das. Sebab'o Si de semreak Uku ngen-Ko lebiak lai dusone.”

¹² Ketiko Pilatus berusaho utuk mbebas Si, tapi tun-tun Yahudi menggang, “Amen ko mbebas Si, ko isoba kuat Kaisar. Tiep tun de manggap diraine awei rajo, si melawen Kaisar.”

¹³ Waktau Pilatus temi'uk kecek o, si meluak mbin Yesus keluea, si temot das kersai pengadilan, neak penan genne Litostrotos, lem bahaso Ibrani Gabata (Tai ne: Kea butau).

¹⁴ Bilai o bilai persiapan Paskah, kekiro jam duai belas. Nadeak Pilatus ngen tun-tun Yahudi o, “Kemliakba rajonu!”

¹⁵ Lajau menggangba tobo'o, “Nunuak Si! Nunuak Si! Senalib Si!” Nadeak Pilatus ngen tobo'o, “Arus uku semalib rajonu?” Jawab imem-imem kepalo, “Keme coa temuan rajo seluyen Kaisar!”

¹⁶ Akherne Pilatus semreak Yesus ngen tobo'o utuk senalib, lajau tobo'o temimo Yesus.

Yesus senalib

¹⁷ Samo mikoa salib-Ne Si lalau moi luea neak penan de genne “Penan Tengkorak”. (Lem bahaso Ibrani: Golgota.)

¹⁸ Neak di tobo'o semalib Si. Sesamo ngen Si senalib kulo duai tun luyen, do depeak kideu, do depeak kanen, Yesus neak tengeak-tengeak.

¹⁹ Pilatus meluak mpek kulo tulisan neak das kieu salib o, sa'eine, “Yesus Tun Nazaret, Rajo Tun Yahudi.”

²⁰ Dau tun Yahudi de mbaco tulisan o, sebab penan Yesus senalib ade pa'ok kota. Ngen tulisan o tenulis lem bahaso Ibrani, bahaso Latin, ngen bahaso Yunani.

²¹ Lajau nadeak imem-imem kepalo tun Yahudi ngen Pilatus, “Jibeak Ko temulis, ‘Rajo tun Yahudi’, tapi, Si madeak, ‘Uku adeba Rajo tun Yahudi.’ ”

²² Jawab Pilatus, “Jano de Uku temulis, tep tetulis.”

²³ Sesudo prajurit-prajurit o semalib Yesus, tobo'o mok keracok-Ne lajau magiakne jijai pat bagiak–ngen jubah-Ne kulo tobo'o mok. Jubah o coa ade pendet, senulam kunei das moi beak.

²⁴ Kerno o tobo'o madeak suang ngen de luyen, “Jibeakba ite magiakne jijai kekedau lambea, tapi baikba ite muang undian utuk tentau api de dapetne.” Awei yo ba kelokne supayo tejijai de ade tenulis lem Kiteb Sucai: “Tobo'o magiak keracok-Ku neak antaro tobo'o ngen tobo'o muang undian das jubah-Ku.” Hal o bi nea prajurit-prajurit o.

²⁵ Pa'ok salib Yesus je indok-Ne ngen pasuak indok-Ne, Maria, ngenyan Klopas ngen Maria Magdalena.

²⁶ Waktau Yesus kemliak indok-Ne ngen penotoa-Ne de kemasiak-Ne neak depeakne, madeakba Si ngen indok-Ne, “Indok, dioba, anoknu!”

²⁷ Sesudo'o nadeak-Ne ngen penotoa-Ne, “Dioba indoknu!” Waktau o kulo penotoa o temimo si neak lem umeakne.

Yesus matei

²⁸ Sesudo'o, kerno Yesus namen bahwo kute sesuaktau bi selsei, madeakba Si – supayo tejijai de tenulis lem Kiteb Sucai –: “Uku aus!”

²⁹ Neak di ade do makuk penuak ngen anggur pi'iak. Tobo'o cemlup busa moi lem anggur pi'iak, lajau busa'o neket moi ujung buluak ngen nunjuak moi bibia Yesus.

³⁰ Sesudo Yesus menem anggur pi'iak'o madeakba Si, “Sudo selsei.” Lajau Si temunduk ulau-Ne ngen semreak nyabai-Ne.

Lambung Yesus tenikem

³¹ Kerno bilai o bilai persiapan supayo pado bilai Sabat mayit-mayit o coa tegatung neak kieu salib – sebab Sabat o bilai rayo – mako tekoba tobo pemuko Yahudi ngen Pilatus minoi ngen si supayo kekea tun-tun o natiak ngen mayit-mayitne tenu'un.

³² Lajau tekoba prajurit-prajurit matiak kekea tun-tun de dute ngen kekea tun de luyen de senalib sesamo Yesus.

³³ Tapi waktau tobo'o sapei ngen Yesus ngen kemliak bahwo Si bi matei, tobo'o coa matiak kekea-Ne.

³⁴ Tapi suang kunei antaro prajurit o temikem lambung-Ne ngen tumbok, segro ngeluea daleak ngen bioa.

³⁵ Tun de kemliak suang hal o de besaksai ngen saksaine benea, ngen si namen bahwo si madeak de benea, supayo udi kulo pecayo.

³⁶ Sebab hal o tejijai, supayo tejijai de tenulis lem Kiteb Sucai, “Coa ade telan-Ne de bakea patiak.”

³⁷ Ade kulo ayat de luyen madeak, “Tobo'o bakea kemliak de sudo tobo'o tikem.”

Yesus kenubua

³⁸ Sesudo'o Yusuf kunei Arimatea minoi ngen Pilatus, supayo si neluak temu'un mayit Yesus. (Yusuf adeba penotoa Yesus, tapi bebunyin kerno saben ngen tobo penguaso Yahudi.) Pilatus kemabul kinoine o. Lajau tekoba si ngen temu'un mayit o.

³⁹ Nikodemus kulo teko moi mindi. Siba de dute teko pado bilai kelmen ngen Yesus. Si mbin capuran minyok mur ngen minyok ka'es, kekiro telau puluak kilogram benekne.

⁴⁰ Tobo'o mok mayit Yesus, kempanne ngen kain kaci ngen mpek minyok um temurut adat tun Yahudi amen kemubua mayit.

⁴¹ Pa'ok penan Yesus senalib ade do taman ngen lem taman o ade suaktau kubua belau de neak lemne ati perneak kemubua suang tun.

⁴² Kerno bilai o bilai persiapan tun Yahudi, gidong kubua o coa uak pekne, mako tobo'o mpek mayit Yesus neak di.