YOHANES 18 - JANJAI BLAU Lem Bahaso Jang Bebilai

Yesus tenakep

¹ Sesudo Yesus madeak kutene o kelueaba Si kunei di sesamo-samo ngen penotoa-Ne ngen tobo'o lalau moi dipoa Bioa Kidron. Neak di ade do taman ngen Si masuk moi taman o besamo-samo ngen penotoa-penotoa-Ne.

² Yudas, de mianat Yesus, namen kulo penan o, kerno Yesus awit kopoa neak di ngen penotoa-penotoa-Ne.

³ Lajau tekoba Yudas kulo moi di ngen pasukan tentra Romawi ngen penjago-penjago Bait Allah de neluak ngen imem-imem kepalo ngen tun-tun Farisi. Tobo'o mbin senatai, lapu ngen obor.

⁴ Yesus namen kute de bakea tejijai ngen dirai-Ne. Si ma'ok tun-tun o ngen madeak ngen tobo'o, “Api de udi mesoa?”

⁵ Jawab tobo'o, “Yesus kunei Nazaret.” Nadeak-Ne ngen tobo'o, “Uku ba Si.” Yudas de mianat Si je kulo neak di besamo-samo tobo'o.

⁶ Waktau Si madeak ngen tobo'o, “Uku ba Si,” mondorba tobo'o ngen Us moi pitok.

⁷ Lajau Si betanye igai ngen tobo'o, “Api de udi mesoa?” Nadeak tobo'o, “Yesus kunei Nazaret.”

⁸ Jawab Yesus, “Bi Uku madeak ngen udi, Uku ba Si. Amen Uku de udi mesoa, kunyau ba tobo'o lalau.” (

⁹ Awei yo kenlokne supayo tejijai ba firman de sudo nadeak-Ne, “Kunei tobo'o de Ko semreak ngen-Ku coa suang kulo de Uku munyau benaso.”)

¹⁰ Lajau Simon Petrus, de mbin pedang, mekot pedang o, nabeakne ngen hambo Imem Lai ngen mutus ti'uk kanenne. Gen hambo o Malkhus.

¹¹ Nadeak Yesus ngen Petrus, “Seno'ong pedangnu o; iso Uku arus menem derito de nelei Bapa ngen-Ku?”

Yesus neak adep Hanas

¹² Lajau pasukan prajurit serto perwirane ngen penjago-penjago de neluak tun Yahudi o temakep Yesus ngen meket Si.

¹³ Mulo-mulo tobo'o mbinne ngen Hanas adeba setuang Kayafas de pado taun o jijai Imem Lai.

¹⁴ Kayafas ba de melei nasihat ngen tobo pemuko Yahudi, “Lebiak beguno amen suang tun matei utuk kute bangso.”

Petrus muker Yesus

¹⁵ Simon Petrus ngen suang penotoa luyen temotoa Yesus. Penotoa o kemnal Imem Lai ngen si masuk sesamo-samo ngen Yesus moi latet Istana Imem Lai,

¹⁶ tapi Petrus tinggea neak luea pa'ok bang. Penotoa de luyen, de kemnal Imem Lai, belek moi luea, miling selawei penjago bang lajau mbin Petrus masuk.

¹⁷ Nadeak pelayan selawei penjago bang ngen Petrus, “Iso Ko kulo penotoa tun o?” Jawab Petrus, “Iso!”

¹⁸ Sementaro o pelayan-pelayan ngen penjago-penjago Bait Allah bi midup opoi a'ang, sebab udaro sengok waktau o, ngen tobo'o je bediang neak di, Petrus kulo je bediang sesamo ngen tobo'o.

Imem lai temanye Yesus

¹⁹ Sesudo'o muloi ba Imem Lai temanye Yesus tetang penotoa-penotoa-Ne ngen ajaran-Ne.

²⁰ Jawab Yesus ngen si, “Uku miling te'us te'ang ngen dunio. Uku bogoa ngajea neak umeak-umeak semyang ngen neak Bait Allah, penan kute tun Yahudi bekopoa. Uku coa perneak miling bebunyin.

²¹ Getai ko temnai Uku? Temnai ba ngen tobo'o, de sudo temi'uk jano de Uku madeak ngen tobo'o; sungguak, tobo'o namen jano de sudo Uku madeak.”

²² Waktau Si madeak hal o, suang penjago de je neak di, tempok papea-Ne samo madeak, “Awei'o jawab-Nu ngen Imem Lai?”

²³ Jawab Yesus ngen si, “Amen kecek-Ku o saleak, madeakba saleakne, tapi amen kecek-Ku o benea, getai ko tempok Uku?”

²⁴ Lajau Hanas kemirim Si lem keadaan tepeket ngen Imem Lai Kayafas.

Petrus muker Yesus igai

²⁵ Simon Petrus masiak je ngen bediang. Nadeak tun-tun neak di ngen si, “Iso ko kulo saleak suang penotoa-Ne?” Petrus menyangkalne, nadeakne, “Iso!”

²⁶ Padeak suang pelayan Imem Lai, suang keluargo kunei pelayan de ti'ukne notong Petrus, “Iso uku kemliak ko neak taman o sesamo ngen Si?”

²⁷ Petrus kulo menyangkal igai ngen waktau o kulo bekokokba monok.

Yesus neak adep Pilatus

²⁸ Sesudo'o, tobo'o mbin Yesus kunei Kayafas moi istana gubernur. Waktau'o bilai masiak pueng. Tobo'o suang coa masuk moi istana gubernur'o, supayo jibeak jijai najis, sebab tobo'o lok mbuk Paskah.

²⁹ Sebab o Pilatus keluea magea tobo'o ngen madeak, “Jano tuduak udi te'adep tun yo?”

³⁰ Jawab tobo'o ngen Si, “Amen Si suang penjahat, keme coa semreakne ngen udi!”

³¹ Nadeak Pilatus ngen tobo'o, “Mokba Si ngen mukumba Si temurut ukum agamo Yahudi o, nadeakne, ‘Keme coa buliak mukum matei suang tun.’ ” (

³² Awei yo ba kelokne supayo tejijai firman Yesus, de nadeakne utuk madeak awei ipe ca'one Si bakea matei.)

³³ Pilatus masuk igai moi lem istana gubernur, lajau menok Yesus ngen betanye, “Jano Ko Rajo tun Yahudi?”

³⁴ Jawab Yesus, “Jano ko nadeak hal o kunei ateinu suang, jano tun luyen de madeak ngen ko tetang Uku?”

³⁵ Nadeak Pilatus, “Jano uku suang Yahudi? Bangso-Nu suang ngen imem-imem kepalo de sudo semreak Ko ngen uku, jano de sudo Ko menea?”

³⁶ Jawab Yesus, “Kerajaan-Ku iso kunei dunio yo. Amen Kerajaan-Ku kunei dunio yo, paset pelayan-pelayan-Ku bi melawen, supayo Uku jibeak semreak ngen tun Yahudi. Tapi Kerajaan-Ku iso kunei dunio yo!”

³⁷ Lajau nadeak Pilatus ngen Si, “Jijai Ko adeba rajo?” Jawab Yesus, “Ko madeak bahwo Uku adeba rajo. Utuk do'o ba Uku laher ngen utuk do'oba Uku teko moi lem dunio yo, supayo Uku melei saksai tetang de benea. Tiep tun de berasal kunei de benea temi'uk sa'ei-Ku.”

^38a Nadeak Pilatus ngen Si, “Jano de benea o?”

Yesus nukum matei

^38b Sesudo madeak awei yo, Pilatus keluea igai magea tun-tun Yahudi ngen madeak ngen tobo'o, “Uku coa dapet saleak jano bae kunei Si.

³⁹ Tapi pado udi ade kebiasoan bahwo pado Bilai Paskah Uku mbebas suang utuknu. Lok udi, supayo Uku mbebas rajo tun Yahudi utuknu?”

⁴⁰ Tobo'o menggang kulo, “Jibeak Si, tapi Barabas!” (Barabas adeba suang perapok.)