YOHANES 11 - JANJAI BLAU Lem Bahaso Jang Bebilai

Lazarus idup igai

¹ Ade suang tun de dong bolon, genne Lazarus, kunei Betania, sadei Maria ngen pasuakne, Marta.

² Maria adeba selawei de melomok minyok um neak kekea Tuhan, menut ngen bukne; Lazarus de bolon o adeba pasuakne.

³ Keduai selawei o kulo kemirim bito ngen Yesus, “Tuhan, pasuak keme de Tuhan kasiak o bolon.”

⁴ Tapi waktau Yesus temi'uk bito o, Si madeak, “Olon o coa bakea menea Lazarus jijai matei, tapi bakea tejijai kemulian Allah, supayo liwet olon o anok Allah de mulio.”

⁵ Yesus kemasiak Marta, Maria ngen Lazarus.

⁶ Tapi sesudo teni'uk-Ne bahwo Lazarus bolon, Si sengajo tinggea duai bilai igai neak penan Si ade.

⁷ Tapi sesudo'o Si madeak ngen penotoa-penotoa-Ne, “Maro ite belek igai moi Yudea.”

⁸ Penotoa-penotoa o madeak ngen Si, “Rabi, tembei yo ba tun-tun Yahudi cemubo meluk Ko, masiak lok Ko belek moi mindi?”

⁹ Jawab Yesus, “Iso ba ade duai belas jam lem de bilai? Api de paneu tengeak bilai, kekeane coa tatuk, kerno si kemliak te'ang dunio yo.

¹⁰ Tapi amen suang tun paneu uak malem, kekeane tatuk, kerno coa ade te'ang lem dirai-Ne.”

¹¹ Awei yo ba kecek-Ne, ngen sesudo'o Si madeak ngen tobo'o, “Lazarus pasuak ite, bi tidua, tapi Uku lalau moi mindi utuk geminggut si kunei tiduane.”

¹² Lajau padeak penotoa-penotoa o ngen-Si, “Tuhan, amen si tetidua, si bakea ka'en.”

¹³ Tapi sebeneane Yesus miling tetang mateine Lazarus, tapi udi sako tobo'o Yesus miling tetang tidua biaso.

¹⁴ Kerno o, Yesus madeak ngen sebeneane, “Lazarus bi matei.

¹⁵ Tapi Uku sukocito, Uku coa ade waktau o, sebab awei yo lebiak baik utuknu, supayo koi dapet pecayo. Maroba ite lalau uyo ngen si.”

¹⁶ Lajau Tomas de senbut “Didimus”, madeak ngen kekuatne, adeba penotoa-penotoa Yesus de luyen, “Maroba ite lalau kulo utuk matei serpok ngen Si.”

Yesus midup igai ngen melei idup

¹⁷ Ketiko Yesus sapei, Lazarus bi pat bilai ke'anne kenubua.

¹⁸ Betania pa'ok Yerusalem kekiro telau kilometer uakne.

¹⁹ Dau tun Yahudi bi teko ngen Marta ngen Maria utuk mibur tobo'o kerno pasuakne matei.

²⁰ Ketiko Marta temi'uk bahwo Yesus teko, si lalau magea-Ne. Tapi maria tinggea neak dasei.

²¹ Lajau padeak Marta ngen Yesus, “Tuhan, sekirone Ko ade neak yo, pasuakku paset coa matei.

²² Tapi uyo uku namen bahwo Allah bakea melei ngen Ko kute de Ko minoi ngen-Si.”

²³ Padeak Yesus ngen Marta, “Pasuaknu bakea idup igai.”

²⁴ Padeak Marta ngen-Si, “Uku namen bahwo si bakea idup igai pado waktau tun-tun idup igai pado Bilai Kiamat.”

²⁵ Jawab Yesus, “Uku ba de melei idup ngen midup igai tun matei. Api bae de pecayo ngen Uku, si bakea idup kunyau si bi matei.

²⁶ Ngen tiep tun de idup ngen de pecayo ngen Uku, cao bakea matei seke'anne. Pecayo ko bakea hal yo?”

²⁷ Jawab Marta, “Au, Tuhan, uku pecayo, bahwo Ko ba Rajo Penyelamat, Anok Allah, de bakea teko moi lem dunio yo.”

Yesus ngindoi

²⁸ Sesudo madeak awei yo si lalau menok pasuakne Maria, ngen misik ngen si, “Gu'au ade neak di ngen Si menok ko.”

²⁹ Temi'uk do'o, Maria segro je lajau lalau magea Yesus.

³⁰ Tapi waktau o Yesus ati sapei neak sadei o. Si masiak ade neak penan Marta temau Si.

³¹ Ketiko tun-tun Yahudi de serpok ngen Maria neak umeak o utuk miburne, kemliak bahwo Maria segro je ngen lalau moi luea, tobo'o temotoa si, kerno tobo'o sako bahwo si lalau moi kubua utuk ngindoi neak di.

³² Sapeine Maria neak penan Yesus ade ngen kemliak Si, sujudba si neak adep kekea-Ne ngen madeak ngen-Si, “Tuhan, sekirone Ko ade neak yo, pasuakku paset coa matei.”

³³ Ketiko Yesus kemliak Maria ngindoi, ngen kulo tun-tun Yahudi de teko serpok si, mako ibo ba atei-Ne. Si kembiak ibo ngen madeak,

³⁴ “Neak ipe udi gemuling si?” Jawab tobo'o, “Tuhan, maroba ngen keliakba!”

³⁵ Lajau ngindoi ba Yesus.

³⁶ Padeak tun-tun Yahudi, “Keliakba, Si sungguak kemasiakne!”

³⁷ Tapi kekedau tun neak antarone madeak, “Si de menea matai tun sutai o pacok ngeliak. Getai Si coa nam menea supayo Lazarus coa matei?”

Lazarus idup igai

³⁸ Yesus kembiak ibo igai, lajau lalau moi kubua o. Kubua o adeba do guo de tenutup ngen butau lai.

³⁹ Padeak Yesus, “Naket butau o!” Marta, pasuak tun de ninggea o, madeak ngen-Si, “Tuhan, si sudo kembon, sebab sudo pat bilai si matei.”

⁴⁰ Jawab Yesus, “Iso sudo Uku madeak ngen udi: Amen ko pecayo ko bakea kemliak kemulian Allah?”

⁴¹ Tobo'o maket butua o. Lajau Yesus nanggeak moi das ngen madeak, “Bak, Uku mucep syukur ngen Ko, kerno Ko bi temi'uk Uku.

⁴² Uku namen bahwo Ko bogoa temi'uk Uku, tapi kerno tun dau de je neak yo gemlung Uku, Uku madeakne, supayo tobo'o pecayo bahwo Ko ba de sudo mutus Uku.”

⁴³ Sesudo madeak awei yo, menggang ba Si ngen sa'ei lek, “Lazarus maroba keluea!”

⁴⁴ Tun de sudo matei o keluea. Kekea ngen tangenne masiak tepeket ngen kain kepan ngen papeane tetutup ngen kain peluh. Nadeak Yesus ngen tobo'o, “Nukok ba kain-kain o ngen kunyau ba si lalau.”

Sepakat utuk munuak Yesus

⁴⁵ Dau neak antaro tun-tun Yahudi de teko semulau Maria, pecayo ngen Yesus waktau tobo'o kemliak kejijai o.

⁴⁶ Tapi kekedau neak antaro tobo'o lalau ngen tun-tun Farisi ngen cemrito ngen tobo'o, jano de nea Yesus o.

⁴⁷ Lajau imem-imem kepalo ngen tun-tun Farisi menok Mahkamah Agamo utuk bepkopoa ngen tobo'o madeak, “Jano de arus ite menea? Sebab tun o menea dau mujizat.

⁴⁸ Amen ite munyau Si, mako kute tun bakea pecayo ngen-Si, tun-tun Roma bakea teko ngen bakea merapok Penan Sucai ite serto bangso ite!”

⁴⁹ Tapi saleak suang neak antaro tobo'o, adeba Kayafas, imem lai pado taun o. Si madeak ngen tobo'o, “Ko coa namen jejano.

⁵⁰ Udi coa tobat, bahwo lebiak beguno utuknu, amen do tun matei utuk bangso ite kunei kute bangso ite yo ajua.”

⁵¹ Hal o de nadeakne iso kunei diraine suang. Tapi awei imem lai pado taun o madeak bahwo Yesus bakea matei utuk bangso o.

⁵² Iso utuk bangso o bae tapi kulo utuk kemopoa ngen menea jijai do anok-anok Allah de cibea.

⁵³ Muloi bilai o tobo'o sepakat utuk munuak Yesus.

⁵⁴ Kerno o Yesus coa timboa igai neak muko umum neak antaro tun-tun Yahudi, tapi Si berakat kunei di moi daerah pa'ok benei libea, moi do kota genne Efraim. Si tinggea sesamo penotoa-penotoa-Ne neak di.

⁵⁵ Pado waktau o bilai rayo Paskah tun Yahudi bi pa'ok ngen dau tun kunei negrai o berakat moi Yerusalem utuk semucai dirai ayok Paskah o.

⁵⁶ Tobo'o mesoa Yesus ngen samo je neak lem Bait Allah, tobo'o madeak suang ngen de luyen, “Awei ipe pedapetnu? Bakea teko kulo Si moi pesta?”

⁵⁷ Sementaro o imem-imem kepalo ngen tun-tun Farisi bi melei periteak supayo tiep tun de namen neak ipe Si ade melei namenne, kunyau tobo'o dapet temakep Si.