YOHANES 10 - JANJAI BLAU Lem Bahaso Jang Bebilai

Perumpamo tetang Gembala ngen Bebirai

¹ “Sesungguakne Uku madeak ngen udi: Api de masuk moi lem ke'ung bebirai coa liwet bang tapi kenek kunei penan luyen. Si adeba tukang maling ngen perapok:

² Tapi api de masuk liwet bang, si adeba gembala de baik.

³ Tukang jago ke'ung mukok bang utukne ngen bebirai temi'uk sa'eine ngen si menok bebiraine suang temurut genne ngen mi'ingne moi luea.

⁴ Amen kute bebiraine bi mbinne moi luea, si paneu neak adep tobo'o ngen bebirai o temotoa-Ne, kerno tobo'o namen sa'eine.

⁵ Tapi tobo'o coa bakea lok temotoa tun luyen, tapi tobo'o bakea lalau kunei tun o, kerno coa kemnal sa'ei ne.”

⁶ Yesus madeak perumpamo yo ngen tobo'o, tapi tobo'o coa ngertai jano maksudne Si madeak awei yo ngen tobo'o.

Yesus gembala de baik

⁷ Kerno o Yesus madeak igai, “Sesungguakne Uku madeak ngen udi; Ukuba bang kunei bebirai o.

⁸ Kute tun de teko ayok Uku, adeba tukang maling ngen perapok, ngen bebirai o coa temi'uk tobo'o.

⁹ Uku ba bang. Api bae de masuk liwet Uku, si bakea semlamat ngen si bakea masuk ngen keluea temau padang dukut.

¹⁰ Tukang maling teko utuk maling ngen munuak ngen musak. Uku teko, supayo tobo'o temuan idup – idup de belebiak.

¹¹ Uku ba gembala de baik. Gembala de baik melei nyabaine utuk bebirai ne.

¹² Tun upeak de iso gembala, ngen de iso temuan bebirai o suang, waktau kemliak srigala teko. Teminggea bebirai o lajau melilai, sehinggo srigala o temkem ngen cem'ei bebirai o.

¹³ Si melilai kerno si suang tun upeak ngen coa dulai bebirai o.

¹⁴ Uku ba gembala de baik ngen Uku namen bebirai-Ku ngen bebirai-Ku namen ngen Uku.

¹⁵ Serai awei Bak namen ngen Uku ngen Uku namen ngen Bak, Uku melei nyabai-Ku utuk bebirai-Ku.

¹⁶ Tapi Uku kulo temuan bebirai de luyen de iso kunei ke'ung yo. Bebirai o arus napeak kulo ngen tobo'o bakea temi'uk sa'ei-Ku ngen tobo'o bakea jijai do klopok ngen do gembala.

¹⁷ Bak kemasiak Uku, kerno Uku melei nyabai-Ku supayo Uku temimone igai.

¹⁸ Coa suang tun mokne kunei Uku, seluyen Uku meleine temurut kelok-Ku suang. Uku bekuaso meleine ngen bekuaso mokne igai. Dioba periteak de Uku temimo kunei Bapa-Ku.”

¹⁹ Kerno Yesus madeak awei o, tun-tun Yahudi muloi betekea, dau neak antaro tobo'o madeak,

²⁰ “Si pasuk semat ngen gilo; getai udi temi'uk Si?”

²¹ De luyen madeak, “Do'o iso kecek tun de pasuk semat. Jano nam semat menea tun sutai pacok ngeliak?”

Tun Yahudi coa temimo Yesus

²² Coa an sesudo o sapei ba Bilai Rayo Meresmi Bait Allah neak Yerusalem; waktau o musim sengok.

²³ Yesus rundo neak Bait Allah, neak Berendo Solomo.

²⁴ Lajau tun-tun Yahudi gemlung Yesus ngen madeak ngen Si, “Kedau ke'an igai Ko munyau keme ragau-ragau? Amen Ko Rajo Penyelamat, nadeakba de benea ngen keme.”

²⁵ Yesus jemawab tobo'o, “Uku bi madeakne ngen udi, tapi udi coa pecayo. Kerjo de Uku menea lem gen Bak-Ku, do'oba de melei saksai tetang Uku.

²⁶ Tapi udi coa pecayo kerno udi coa temasuk bebirai-Ku.

²⁷ Bebirai-Ku temi'uk sa'ei-Ku ngen Uku namen tobo'o ngen tobo'o temotoa Uku.

²⁸ Uku melei idup de kekal ngen tobo'o ngen coa bakea benaso sapei seke'anne ngen coa suang tun mok tobo'o kunei tangen-Ku.

²⁹ Bak-Ku, de melei tobo'o ngen Uku, lebiak lai kunei api bae, ngen coa suang tun dapet mok tobo'o kunei tangen Bak.

³⁰ Uku ngen Bak adeba do.”

³¹ Debat igai tun-tun Yahudi mok butau utuk meluk Yesus.

³² Padeak Yesus ngen tobo'o, “Dau kerjo de baik de be'asal kunei Bak-Ku de Uku kemten ngen udi. Kerjo de ipe neak antarone de sembab udi lok meluk Uku?”

³³ Jawab tun-tun Yahudi o, “Iso kerno kerjo-Nu de baik o keme lok meluk Ko ngen butau, tapi kerno Ko mino Allah. Ko suang manusio, lok jemijai dirai-Nu Allah.”

³⁴ Nadeak Yesus ngen tobo'o, “Iso ba ade tetulis lem Kiteb Tauratnu: Uku bi befirman, ‘Ko adeba Ilah’?

³⁵ Amen tobo'o, ngen api firman o senapei, de senbut Ilah dong Kiteb Sucai coa dapet buye.

³⁶ Masiak udi madeak ngen Si de senucai ngen Bak ngen de sudo nutus-Ne moi lem dunio. Ko mino Allah! Kerno Uku bi madeak: Uku anok Allah?

³⁷ Amen Uku coa menea kerjo Bak-Ku, jibeakba pecayo ngen Uku.

³⁸ Tapi amen Uku kemerjone ngen udi coa lok pecayo ngen Uku, pecayoba ngen kerjo-kerjo o. Supayo udi buliak namen ngen ngertai bahwo Bak neak lem Uku ngen Uku neak lem Bak.”

³⁹ Debat igai tobo'o cemubo makep Si, tapi Si lolos kunei tangen tobo'o.

⁴⁰ Sesudo Yesus lalau igai moi dipoa Bioa Yordan, moi penan Yohanes baptis bel'o, lajau Si tinggea neak di.

⁴¹ Dau tun teko ngen Si ngen madeak, “Yohanes coa menea do tando mujizat, tapi kute de perneak de nadeak Yohanes tetang tun yo memang benea.”

⁴² Lajau dau tun neak di pecayo ngen Si.