YAKOBUS 2 - JANJAI BLAU Lem Bahaso Jang Bebilai

Teguran teadep prasangka

¹ Saudaro-saudaroku! Sebagai tun de pecayo ngen Tuhan Yesus Kristus, Tuhan De Mahamulio, jibeakba udi mbeda tun das dasar hal-hal laher.

² Sebab amen ade tun kayo de makei cicin mas ngen makei keracok ba'es teko moi pertemuan udi, lajau teko kulo tun peset de makei keracok ceca'ik,

³ mako udi lebiak hormat ngen tun de makei keracok baes o. Udi madeak ngen si, “Maroba Tuan temot neak kersai de lebiak baik yo.” Tapi ngen tun de peset udi madeak, “Je ba neak di,” atau “Temotba neak beak.”

⁴ Ngen menea awei o, udi menea perbedaan neak antaro sesamo udi ngen kemliak tun das dasar pekeran de kidek.

⁵ Ingetba, Saudaro-saudaro de tecito! Tun de peset neak dunio yo, niliak Allah utuk jijai tun de kayo lem imen. Tun-tun o bakea jijai anggota umat Allah awei de jenanjai Allah ngen tun de mengasihi-Ne.

⁶ Tapi udi malah mino tun peset, padahal tun-tun kayoba de temindes udi ngen mbin udi moi pengadilan!

⁷ Tobo'oba de mino gen de mulio de udi temimo kunei Allah!

⁸ Udi menea de benea, amen udi kemerjo hukum Kerajaan de ade neak lem ayat Kiteb Sucai yo, “Citoba sesamonu awei ko cito dirainu su'ang.”

⁹ Tapi amen udi mbeda tun das dasar laher, udi menea duso, ngen hukum Allah madeak bahwo udi adeba tun de melanggea hukum.

¹⁰ Tun de melangea saleak do kunei Hukum-hukum Allah, tai'ne melanggea kutene.

¹¹ Sebab de madeak, “Jibeak berzinah,” siba kulo de madeak, “Jibeak munuak.” Jijai, amen udi coa berzinah, tapi munuak, mako udi adeba tun de melanggea hukum kulo.

¹² Milingba ngen betindakba sebagai tun de bakea nukum temurut hukum Allah de mbebas manusio.

¹³ Sebab Allah coa bakea temunjuk ibo ngen tun de coa kemnal ibo. Tapi ibo lebiak kuet kunei hukuman!

Imen ngen perbuatan

¹⁴ Saudaro-saudaro! Jano gunone tun madeak, “Uku tun de pecayo”, amen si coa temunjukne ngen perbuatanne? Jano dapet imen de awei o semlamatne?

¹⁵ Seandaine suang saudaro atau saudari perlu keracok ngen coa ade cukup kembuk utuk bebilai.

¹⁶ Jano gunone udi madeak ngen si, “Makeiba bajau sengok ngen mbukba!” – amen udi coa melei ngen jano de si perlu utuk idup?

¹⁷ Awei o kulo ngen imen, amen coa nea ngen perbuatan, mako imen o coa de guno ne.

¹⁸ Mukin ade de madeak, “Ade tun de nyangget ngen imenne, ade kulo de nyangget ngen perbuatanne.” Uku bakea jemawab, “Tenunjukba ngen uku awei ipe tun dapet temuan imen tapi coa kemerjone, uku bakea temunjuk ngen perbuatan bahwo uku temuan imen.”

¹⁹ Udi pecayo bahwo Allah cuma do? Nah, roh-roh kidek kulo pecayo tapi tobo'o kemtea kerno saben!

²⁰ Udi bodong nien! Jano udi perlu bukti bahwo coa ade gunone temuan imen tapi coa kemerjone?

²¹ Keliak bae Abraham ninik puyang ite. Si tenimo baik ngen Allah kerno perbuatanne, adeba waktau si melei Ishak, anokne, ngen Allah neak das mezbah.

²² Neak yo jelasba bahwo imen harus kenten ngen perbuatan supayo jijai sempurno.

²³ Do'o sesuai ngen ayat Kiteb Sucai yo, “Abraham pecayo ngen Allah, kerno imenne o Allah temimone sebagai tun de menea kelok Allah.” Do'o sebabne Abraham senbut, “Kuat Allah”.

²⁴ Jelasba uyo, bahwo tun tenimo baik ngen Allah kerno jano de nea tun o, ngen coa kerno imenne bae.

²⁵ Kemliak kulo Rahab, selawei nakea o. Si tenimo baik ngen Allah kerno perbuatanne, adeba ketiko si temimo nek lem umeakne pengintai-pengintai bangso Israel ngen temulung tobo'o lalau liwet dalen luyen.

²⁶ Nah, awei awok tanpa roh adeba awok de matei, awei o kulo imen tapi coa kenerjone adeba imen de matei.