WAHYU 9 - JANJAI BLAU Lem Bahaso Jang Bebilai

¹ Lajau malaikat de kelemo kembus trupetne, ngen uku kemliak debueak bitang us kunei lenget moi das bumai. Bitang o nelei anok kucai jurang maut. Penan uak neak beak bumai neak ipe roh-roh jahat nukum sapei bilai ukumanne de terakhir.

² Mako bitang o mukok jurang maut o, lajau asep keluea kunei lemne awei asep kunei tukau de lai. Matai bilai ngen angkasa jijai kelem kerno asep kunei jurang o.

³ Lajau kunei lem asep o kelueaba belalang-belalang de tu'un moi bumai. Belalang-belalang o nelei kuaso de serai awei de nelei ngen kalo.

⁴ Tobo'o cao buliak musak dukut, atau pun-pun, atau tanem-tanem luyenne. Tobo'o cuma buliak semrang tun-tun de neak ningne coa ade tando segel kunei Allah.

⁵ Blalang-blalang o coa buliak munuak tun-tun o, tapi cuma semikso tobo'o selamo lemo bulen. Gis kunei sikso blalang-blalang o serai awei gis nenget kalo.

⁶ Selamo lemo bulen o, tun-tun o berusaho supayo matei, tapi tobo'o coa nam matei; tobo'o lok matei, tapi maut uak kunei tobo'o.

⁷ Betuk belalang o awei kudo de siap utuk perang. Neak ulau tobo'o ade suaktau de ketenne awei makhota mas. Papea tobo'o awei papea manusio.

⁸ Buk tobo'o awei buk selawei, ngen epen tobo'o awei epen singo.

⁹ Dado tobo'o tenutup ngen suaktau de awei bajau besi. Sa'ei sayep tobo'o awei sa'ei kerita-kerita kudo de gidong moi lem perang.

¹⁰ Tobo'o temuan ikoa ngen bisai awei kalo. Ngen neak ekor tobo'oba ade kekuatan tobo'o utuk semikso manusio selamo lemo bulen.

¹¹ Tobo'o temuan rajo de meriteak tobo'o, rajo o adeba malaikat de tanggung jawab das jurang maut. Neak lem bahaso Ibrani, genne adeba Abadon; lem bahaso Yunani Apolion (taine “Pengusak”).

¹² Celako de pertamo bi liwet. Sesudo'o ade duai celako igai de harus teko.

¹³ Sesudo'o malaikat de kenum kembus trupetne. Mako uku temi'uk sa'ei teko kunei kepat sudut mezbah mas de ade neak adep Allah.

¹⁴ Sa'ei o madeak ngen malaikat kenum o, “Pasba kepat malaikat de neket neak Bioa Efrat o!”

¹⁵ Kepat malaikat o nepas. Tobo'o sudo seniap khusus bagiak jam, bilai, bulen ngen taun o utuk munuak sepertelau kunei kute umat manusio.

¹⁶ Uku nelei namen bahwo jumlah pasukan-pasukan bekudo o adeba duai otos juta.

¹⁷ Ngen lem pengeliak, uku kemliak kudo-kudo ngen penunggang-penunggangne. Penunggang-penunggangne makei bajau besai warno mileak te'ang, biru awei butau nilam, ngen kuning bli'ang. Ulau kudo-kudo o awei ulau singo, ngen kunei bibiane keluea opoi, asep, ngen bli'ang.

¹⁸ Sepertelau kunei umat manusio matei kerno bencana o; adeba opoi, asep ngen bli'ang de keluea kunei bibia kudo-kudo o.

¹⁹ Kekuatan kudo-kudo o ade neak bibiane ngen ikoane. Ikoa-ikoane awei dung. Ngen ikoane o, kudo-kudo o semikso manusio.

²⁰ Tapi ti'eak kunei umat manusio de coa matei kerno bencano-bencano o, coa tobat kunei uleak tangen tobo'o suang. Tobo'o coa bedan nyembeak roh-roh jahat ngen patung-patung mas, pirok, temagai, butau ngen kieu de coa dapet ngeliak, temi'uk, atau paneu.

²¹ Tobo'o coa kulo teminggea plep-plep kidekne, adeba munuak tun, lemau-lemau gaib, zinah ngen maling.