WAHYU 8 - JANJAI BLAU Lem Bahaso Jang Bebilai

Segel de ketujuak

¹ Ketiko Anok Bebirai o mukok segel de ketujuak, surgo jijai sunyai selamo kekiro tengeak jam.

² Lajau uku kemliak ketujuak malaikat de je neak adep Allah, ngen tobo'o nelei tujuak bueak trupet.

³ Suang malaikat luyen, de mbin debueak pedupaan mas, teko ngen je neak adep mezbah. Ngen si nelei dau nien kemenyen utuk persembahan ngen du'o-du'o kute umat Allah ngen utuk persembahan neak mezbah mas de ade neak adep takhta.

⁴ Besamo ngen du'o-du'o tobo umat Allah, asep kemenyen de gidong idup o kenek kunei tangen malaikat de je neak adep Allah o.

⁵ Sesudo'o malaikat o mok pedupaan o, semi'ingne ngen opoi kunei mezbah, lajau melukne moi das bumai. Mako gutua gemruduk, serto glep ngen gepo.

Trupet-trupet

⁶ Sesudo'o, tujuak malaikat de megong tujuak trupet o siap-siap utuk kembus.

⁷ Lajau malaikat de pertamo kembus trupetne ngen tejijaiba ujen es, ngen opoi capua daleak tu'un ngen de'esne moi bumai. Sepertelau bumai habis tekemben; awei'o kulo sepertelau kunei pun-pun ngen tiep dukut de ijo.

⁸ Lajau malaikat keduai kembus trupetne, ade sesuaktau awei tebo lai de menyala-nyala neluk moi lem laut. Sepertelau lautan bubeak jijai daleak,

⁹ ngen mateiba sepertelau kunei kute makhluk neak laut; awei'o kulo sepertelau kunei kepea-kepea.

¹⁰ Sesudo'o malaikat ketelau kembus trupetne ngen usba kunei lenget debueak bitang lai, bernyala awei obor, lajau menimpa sepertelau kunei sungai-sungai ngen matai bioa.

¹¹ Gen bitang o adeba “Pet”. Mako sepertelau kunei bioa jijai pet, ngen mateiba dau tun kerno mbuk bioa de sudo jijai pet o.

¹² Lajau malaikat kepat kembus trupetne. Mako tetepokba sepertelau kunei matai bilai, sepertelau kunei bulen, ngen sepertelau kunei bitang-bitang sehinggo nyepba sepertelau kunei kekuatan cahayo tobo'o. Kulo sepertelau kunei lueng coa te'ang ngen awei o kulo sepertelau kunei kelmen.

¹³ Lajau uku kemliak, mako uku temi'uk dikup burung rajowali de gidong tebang lekat neak udaro, menggang, “Celako! Celako! Celakoba kute tun neak bumai amen temi'uk ketelau malaikat luyenne kembus trupetne be!”