WAHYU 5 - JANJAI BLAU Lem Bahaso Jang Bebilai

Gulungan bukau ngen Anok Bebirai

¹ Sesudo'o uku kemliak debueak gulungan bukau neak tangen Si de temot neak takhta o. Bukau o penuak ngen tulisan peak lem ngen peak lueane ngen dimeteraikan ngen tujuak bueak segel.

² Lajau uku kemliak suang malaikat de perkasa menggang ngen sa'ei de lek, “Api de layak mukok segel-segel yo ngen mukok bukau yo?”

³ Tapi baik neak surgo, neak bumai, atau neak beak bumai, de dapet mukok gulungan kiteb o atau de dapet kemliak peak lemne.

⁴ Mako uku ngindoi ngen kembiak ibone sebab coa ade suang tun kulo de layak mukok bukau o, ngen kemliak lemne.

⁵ Lajau saleak suang kunei pemipin-pemipin o madeak ngen uku, “Jibeak ngindoi! Keliak! Singo kunei suku bangsa Yehuda, royot Daud, bi menang. Si sanggup mecuak tujuak segel ngen mukok bukau o.”

⁶ Sesudo'o uku kemliak dikup anok bebirai je neak tengeak-tengeak takhta o, kenliling pat makhluk ngen kute pemipin o. Anok bebirai o ketenne awei bi sembeliak. Si temuan tujuak tanduk ngen tujuak matai: adeba tujuak roh kunei Allah de sudo nutus moi kute dunio.

⁷ Sesudo'o Anok Bebirai o maju ngen mok gulungan bukau o kunei tangen kanen tun de temot neak das takhta.

⁸ Sementaro Anok bebirai o menea awei o, tukupba kepat makhluk ngen keduai puluak pat pemipin o neak adep-Ne. Tobo'o masing-masing megong kecapi ngen makuk mas de isaine kemenyen, adeba du'o-du'o umat Allah.

⁹ Tobo'o mbin legau de blau: “Ko layak mok bukau o ngen mecuak segel-segelne Sebab Ko bi nunuak, ngen kematian-Nu, manusio kunei kute suku, bahaso, negara ngen bangsa bi nukuanu utuk Allah.

¹⁰ Ko bi jemijai tobo'o do bangsa khusus imem-imem, supayo tobo'o melayan Allah ite, ngen meriteak neak das bumai.”

¹¹ Sesudo'o uku kemliak igai. Uku temi'uk sa'ei malaikat de beribau-ribau ngen berjuta-juta daune. Tobo'o je kemliling takhta ngen kepat makhluk serto tobo pemipin o.

¹² Ngen tobo'o nyanyi ngen sa'ei de lek, “Anok Bebirai de sudo sembeliak o, layak utuk temimo kuaso, kekayaan, kebijaksanaan ngen kekuatan; Si layak nelei hormat, diagungkan ngen nujai!”

¹³ Lajau uku temi'uk kute makhluk neak lenget, neak bumai, neak beak bumai ngen neak lem laut – siketne kute makhluk neak semesta alam yo – nyanyi, “Si de temot neak das takhta, ngen Sang Anok Bebirai o, adeba tepujai ngen terhormat serto agung ngen bekuaso utuk selamo-lamone!”

¹⁴ Mako kepat makhluk o jemawab, “Amin!” Ngen pemipin-pemipin o tukup ngen nyembeak.