WAHYU 3 - JANJAI BLAU Lem Bahaso Jang Bebilai

Pesen utuk jemaat neak Sardis

¹ “Ngen jemaat neak Sardis, tulisba awei yo: Dioba pesen kunei Si de temuan ketujuak roh kunei Allah ngen ketujuak bitang o. Uku namen jano de udi nea. Nadeakne udi idup, padahal udi matei!

² Sebab o, kelongonba, kenuetba jano de masiak ade ngen udi ayok do'o matei samo sekilai. Sebab uku dapet bahwo jano de udi nea, ati ade do kulo de sempurno neak adep Allah.

³ Jijai, tingetba igai ngen jano de sudo najea ngen udi bel'o ngen jano de sudo udi teni'uk. Temotoaba do'o ngen tobatba kunei duso-duso udi. Amen udi coa kelongon, uku bakea teko ngen udi awei maling; ngen udi coa bakea namen tengen waktaune Uku teko.

⁴ Tapi neak tengeak-tengeak udi neak Sardis masiak ade tun de jemago supayo keracokne tep bersih. Tobo'o bakea paneu besamo-samo Uku ngen makei keracok putiak, sebab tobo'o patas utuk do'o.

⁵ Api de menang bakea nakei jubah putiak. Uku coa bakea mapus genne kunei Bukau Tun Idup. Ngen neak adep Bapa-Ku ngen malaikat-malaikat-Ne Uku bakea makau bahwo tobo'o adeba de Uku temuan.

⁶ Api temuan ti'uk, lokba temi'uk jano de nadeak Roh Allah ngen jemaat-jemaat!”

Pesen utuk jemaat neak Filadelfia

⁷ “Ngen malaikat jemaat neak Filadelfia, tulisba awei yo: Dioba pesen kunei Si de sucai ngen sejati. Siba de megong kucai Daud; amen Si mukok, coa suang kulo dapet kematupne, ngen amen Si kematupne, coa suang kulo dapet mukokne.

⁸ Uku namen jano de udi nea. Uku namen bahwo udi coa kuet; udi bi temotoa ajaran-Ku, setia ngen Uku. Utuk udi bi Uku mukok bang, de coa dapet nukok api bae.

⁹ Tingetba dio: Tun-tun de jijai umat Iblis o, pendusta-pendusta de makau diraine tun Yahudi padahal iso, Uku nea tobo'o sehinggo teko sujud neak adep nu. Ngen tobo'o bakea namen bahwo Uku mengasiak udi.

¹⁰ Kerno udi bi kemerjo periteak-Ku supayo tekun, Uku kulo bakea jemago udi kunei bilai pencobaan de bakea teko moi kute dunio. Hal o bakea tejijai utuk cemubo kute tun neak bumai.

¹¹ Uku segro teko! Jagoba baik-baik jano de udi temuan, supayo coa suang kulo mok hadiah kemenangannu.

¹² Tun de menang, Uku jemijai sebagai tiang lem Umeak Sucai Allah-Ku, ngen si bakea tinggea neak penan o selamo-lamone. Gen Allah-Ku, gen kota Allah-Ku – adeba Yerusalem blau de bakea tu'un kunei surgo, kunei Allah-Ku – bakea Uku temulis neak dirai tun o. Kulo gen-Ku de blau bakea Uku temulis neak diraine.

¹³ Api temuan ti'uk, lokba si temi'uk jano de nadeak jemaat-jemaat!”

Pesen utuk jemaat neak Laodikia

¹⁴ “Ngen jemaat neak Laodikia, tulisba awei yo: Dioba pesen kunei Sang Amin, Saksai de setia ngen benea, sumber kute sesuaktau de ciptaan Allah.

¹⁵ Uku namen jano de udi nea; Uku namen udi coa sengok ngen coa kulo panes. Seharusne udi o sengok atau panes!

¹⁶ Tapi udi antaro panes ngen sengok; panes coa, sengok kulo coa. Do'o sebabne udi bakea Uku muntahkan kunei bibia-Ku

¹⁷ Udi madeak, ‘Keme kayo ngen serbo ade; keme coa kekurangan.’ Tapi udi coa namen bahwo udi kembiak peset ngen kembiak ibo keadaannu! Udi peset, beleseng, ngen sutai.

¹⁸ Sebab o Uku melei nasihat udi supayo temukua kunei pado-Ku mas, adeba mas de murni, supayo udi jijai kayo. Nukuaba kulo keracok putiak kunei pado-Ku supayo udi makei keracok ngen temutup awok udi de beleseng ngen nyelek. Ngen mukuaba kulo ubet utuk nusep neak matainu supayo udi dapet ngeliak.

¹⁹ Tun-tun de uku kasihi, tobo'oba de Uku tema'ok ngen Uku cambuk. Kerno o lokba udi semangat, ngen tobatba kunei duso-dusonu.

²⁰ Keliak! Uku je neak adep bang ngen kemtuk bang. Amen ade tun de temi'uk suaro-Ku, ngen mukok bang, Uku bakea masuk magea si; Uku bakea mukmei besamo-samo si ngen si mukmei besamo-samo Uku.

²¹ Tobo'o de menang, bakea Uku melei izin temot neak takhta-Ku besamo Uku, serai awei Uku suang bi menang ngen uyo temot besamo Bapa-Ku neak takhta-Ne.

²² Api temuan ti'uk, lokba temi'uk jano de nadeak Roh Allah ngen jemaat-jemaat!”