WAHYU 22 - JANJAI BLAU Lem Bahaso Jang Bebilai

¹ Malaikat o kulo kemten ngen uku bioa lai de bioane melei kehidupan. Bioa o jeniak awei kristal ngen mengalir kunei takhta Allah ngen Anok Bebirai o.

² Neak tengeak-tengeak dalen neak kota o, adeba neak seb'ang bioa o, ade pun-pun kehidupan de bebuak duai belas kilai lem de taun, adeba bulen debat. Daunne nakei utuk kemaen bangsa-bangsa.

³ Neak lem kota o coa bakea ade de keno supeak Allah. Takhta Allah ngen Anok Bebirai o bakea ade neak lem kota o. Hamba-hamba-Ne bakea beribadah ngen-Si,

⁴ ngen kemliak papea-Ne. Gen-Ne bakea tenulis neak ning tobo'o.

⁵ Tobo'o coa bakea perlu lapu atau cahayo matai bilai, sebab kelmen coa ade igai, ngen Tuhan Allah su'ang bakea tem'ang tobo'o. Mako tobo'o bakea meriteak sebagai rajo utuk selamo-lamone.

Tekone Yesus

⁶ Lajau malaikat o madeak ngen uku, “Kecek-kecek yo benea ngen dapet cayo. Tuhan Allah de melei Roh-Ne ngen nebai-nebai, sudo mutus malaikat-Ne utuk melei namen ngen hamba-hamba-Ne jano de bakea tejijai.”

⁷ “Kemliakba dio!” nadeak Yesus, “Uku bakea segero teko. Riangba tun de ta'at ngen kecek-kecek nubuat lem kiteb yo!”

⁸ Uku, Yohanes, sudo temi'uk ngen kemliak kutene yo. Sesudo uku selsei temi'uk ngen kemliakne uku tukup neak adep malaikat de sudo melei namen kutene o ngen uku, ngen uku lok nyembeak si,

⁹ tapi si madeak ngen uku, “Jibeak! Jibeak nyembeak uku! Senbeakba Allah! Sebab uku kulo hamba awei udi, ngen awei saudaro-saudaronu paro nebai ngen kute tun de taat ngen pesen-pesen lem kiteb yo!”

¹⁰ Lajau si madeak igai, “Jibeakba nunyin kecek-kecek nubuat lem kiteb yo, sebab bi pa'ok waktaune kutene bakea tejijai.

¹¹ Tun de jahat, kunyauba terus menea jahat; tun de najis, kunyauba diraine najis; tun de temotoa kelok Allah, kunyauba terus temotoa kelok Allah, ngen tun de hidup cuma utuk Allah, kunyauba terus hidup cuma utuk Allah.”

¹² “Kemliakba dio!” nadeak Yesus, “Coa an igai uku bakea teko ngen mbin upeak utuk males tiep tun temotoa jano de sudo nea ne.

¹³ Ukuba de pertamo ngen terakhir; Ukuba Tuhan kunei Pertamo sapei Terakhir.”

¹⁴ Riangba tun de mpuk jubahne sapei bersi sehinggo tobo'o berhok mbuk bueak kunei pun kehidupan ngen masuk moi lem kota o liwet gerbangne.

¹⁵ Tapi tun-tun de menea hal-hal de keji, de makei lemau-lemau gaib, tun-tun de menea plep-plep kidek, de munuak, de nyembeak patung, ngen tun-tun de ngike, baik ngen kecek-kecek atau ngen plep, kute tun o penanne neak luea kota o.

¹⁶ “Uku, Yesus, sudo mbo malaikat-Ku ngen udi supayo si melei namen hal-hal yo utuk kepentinggan jemaat-jemaat. Uku yo royot Daud; Ukuba Bitang Timur de te'ang o.”

¹⁷ Roh Allah ngen Pengaten Selawei madeak, “Maroba!” Tiep tun de temi'uk dio harus kulo madeak, “Maroba!” Api de haus, lokba si teko! Ngen api de kemlok, lokba si mok bioa de melei kehidupan o ngen cuma-cuma.

Penutup

¹⁸ Ngen tiep tun de temi'uk kecek-kecek nubuat lem kiteb yo, uku, Yohanes, melei peringatan yo: amen tun temambeak suaktau ngen kecek-kecek nubuat yo, mako Allah bakea temambeak ukuman tun o ngen bencano-bencano de tetulis lem kiteb yo.

¹⁹ Ngen amen tun kemu'ang sesuaktau kunei kecek-kecek nubuat yo, mako Allah kulo bakea kemu'ang bagianne de tenulis lem kiteb yo – adeba bagian kunei pun kehidupan ngen kunei kota sucai o.

²⁰ Si de melei namen kute bito yo madeak, “Benea, Uku bakea segero teko!” Amin! Tekoba, ya Tuhan Yesus!

²¹ Semoga Tuhan Yesus melei berkat-Ne ngen kute umat Allah.